السبت، 17 فبراير 2007

الثالث


حدف على احمد شعبان تاج ثالث ، وخلانى اتقمص دور حسن الهلالى وانا بقضى عليه ، بس يا ترى الرابع اما يجينى هيقلى سيبنى اعيش زى رابع دائرة الأنتقام ؟؟ التاج ده مختلف شويه عشان فى مكاشفه اكتر واراء فى ناس تانيه ممكن يختلف عليها الناس على العموم انا قلت الى فى ضميرى وشكراً

اسم مدونتك؟

ممكن تبص اول حاجه فوق خالص هتعرف
لماذا اخترته.. ماذا تقصد به؟
اقصد به انى مش هقول اى كلام والسلام وهكون بحريتى ده الظاهر ، اما الباطن هو ان فى عمق القهر والقيود تقدر تلاقى مكان للحرية وبتوضيح اكثر ان مفيش حاجه اسمها مفيش حريه حتى لو فى أعماق باطن القيد وانه لا يمكن تقييد حرية كائن من كان فحريتك فى دماغك
هل فكرت في إغلاق المدونة.. والسبب؟
لا لم افكر
صورتك ف المدونة، رمزيتها؟
انا مش حاطط رمز دى صورتى انا
طبيعة كتابتك في المدونة بشكل عام.. سياسة.. قصة.. عبث.. كلام فاضي؟
مفكرتش أبدا ان يكون للمدونة طابع معين فقط احرص على الإحترام فى اى شئ أجد انه حركنى للكتابه عنه
لماذا تدون أصلاً؟
عشان اغير المجتمع
أحلى جملة قيلت لك في وصف مدونتك؟
نادر ان تذكرت مجاملات لى يمكن عشان بعتقد انها مجاملات مش اكتر وكلام حلو من باب التشجيع
التعليقات بالنسبة لك.. أهميتها؟
رجع الصدى
أحلى بوست كتبته.. ضع اللينك.. ثم اذكر لماذا؟
سأختار لكل شهر موضوع واخترتهم لأنهم قطع من نفسى
سبتمبر : القضية
أكتوبر : أبراهيم الدسوقى سيد أحمد – بثينة عبد اللطيف دنانة
نوفمبر : الحيوانات أصدقائى
ديسمبر : دمع الأسى المكتوم
يناير : الحلم . . السعادة . . العمر
واترك للزوار ترشيح مماثل من وجهة نظرهم
أفضل مدونة قرأتها.. يمكن اختيار عدة مدونات؟
على سبيل المثال وليس الحصر عشان محدش يفتكر انى نسيته او مش شايف ان مدونته جميله كل اللى فى اللنكات عندى بالإضافة الى اول عشره هيجوا على بالى وهم كبير المتشردين ، طعمة ، حائر فى دنيا الله ، كلبوزة ، النديم ، طيارة ، قاسم أفندى ، بالعربى الفصيح ، ما علينا وأكرر على سبيل المثال
أفضل بوست قرأته.. يمكن اختيار أكثر من بوست.. ومتنساش اللينك؟
الحج وجهة نظر أخرى ، وقهوة امى ، خواطر وتأملات من زنزانة الزواج ، أول يوم شغل ، الموظفة ، أنا واخى
هل خسرت صديق بسبب كتابة هنا؟
لا
حد قل أدبه فى التعليق.. إيه رد فعلك؟
واحد أسمه مايكل أستيفن فى تعليق له على موضوع واحد كأبة ساده وصلحة وممكن تشوف ردى عليه فى تعليقات الموضوع
أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟
كل مدونات المثليين والمثليات ، منال وعلاء ، مالك ، داليا زياده ، سيجارة ، حاجات تانيه
أسوأ بوست.. لازم تجاوب.. ويسمح بتعدد الاختيارات؟
العنقاء ليحيى مجاهد ، سرتن سرتن فى أى مكان صحراً كان او بستان لمنال ، كل موضوعات مناصره كريم
أسوأ مدون.. ما هو حاتجاوب حاتجاوب؟
علاء
انشر الآن بشكل حصري بوست لم تجرؤ على نشره من قبل.. مش محتاج أقول إجباري
هو فى فعلاً موضوع واحد فقط كنت عاوزه انشره ومنشرتوش بناء على توصيات الأسرة ومش هنشره لأن أنا باخد بمشورتهم ولأن نشره لن ياتى بأى ثمره غير انى اشرف على البورش فعلاً يدخل السجن بدون مبالغة


والأن أنتقم من دينا فهمى كنت ضحيتها مرتين وإذا كنت كنت انت أنا كونت دى مونت كريستو ، اما بقى الناس فإللى نفسى اسمع ردهم على التاج ده هما عارفين نفسهم وعشان العلاقه بينا فى الفضاء البلوجرى بقت قويه مش هسميهم ، هما المفروض يعرفوا نفسهم بنفسهم ويجابوا من غير حاجه ولو معملوش كده هزعل جداً 
.

هناك 61 تعليقًا:

حائر في دنيا الله يقول...

إذن الي التاج
وأي ضحايا يسقطون مسئوليت الشخصية
أنا قلت أهو

سلام مؤقت

غير معرف يقول...

مش هشكر علي جمايلك ومجاملاتك لانها كتير اوووي فوق الوصف والشكر مش هيديك حقك والتاج بجد رائع وانت كنت اروع في الاجابات بعيد بقا عن كل ده انت مالك حاسس انك زهقان من حاجة يا تري مرحلة عدم اتزان ولا الدنيا زودتها معاك عموما ربنا يكرمك يا محمد وطمني عليك

Amira يقول...

انت أدمنت التاج و لا إيه

و بعدين سيادتك حاطط اللينك بتاع خواطر و تأملات من زنزانة الزواج غلط

مع احترامي لهيثم طبعا

و بعدين ايه الأغنيه الحلوه دي اللي كاتبها يوم عيد الحب و بعدين كاتب تنويه

"مش عشان عيد الحب"

طب كنت أكتب حاجه تانيه
اكتب عن الباذنجان
مش اغنيه لعبد الحليم

و بعدين التيجان كترت قوي اليومين دول
و مش عاجباني برضه
هه
الحسنه الوحيدخ اني حقرا تاني بوستاتك اللي بتعتبرها الأفضل

أحمد شعبان يقول...

قشطات يامعلم.. سعيد بإجابتك

بالمناسبة أنا قريت حاجة زي طلب إني أجاوب هذا التاج.. كنت بتهزر صح؟
:)

محمد عبد الغفار يقول...

حائر
الجزئ الأول فهمت منه انك فهمتنى وهتشارك ، الجزئ التانى مفهمتش منه اى حاجه

كبير المتشردين
عرفت منين انى زهقان ، هو انا مفضوح اوى كده

فريدة
لا أدمان ولا شئ ناس بتورطنى وورا بعضه ورا بعضه ومبرداش اكسفهم ومبقدرش اجرى واهرب واعمل نفسى مش واخد بالى زى مناس تانيه بتعمل كده بعتبر التاجات والألتزام بيها من أدبيات المدونات

مش عاجبك انت حره طبعاً بس انت فاهمه وانا فاهم هه

أحمد شعبان
جد مش هزار يا خفيف

ma 3lina يقول...

عمنا كلنا - مفيش أستاذنا أهو عشان ما تزعلش - ..
إن حضرتك بتدخل مدونتي فدا شرف ليا
وإن حضرتك بتترك تعليق عندي فدا فخر ليا ولمدونتي ولسبع مدونات عن يميني وسبع مدونات عن شمالي ..
أما إن اسم مدونتي تذكره في مدونتك فدا شيء لا يوصف .. مش عارف أقول إيه .. ..
كلامك محترم جداً ومدونتك مثال في الرقي ولو جاءني التاج فحجاوب نفس إجاباتك .. ولكن حسأل حضرتك سؤال .. ودا لأني أثق في تقييمك .. ليه حاطط مدونة د زيادة مع المدونات السيئة .. متهيألي البنت دي غيرهم .. هما الكام بوست إياهم بتوع لئيم بس اللي يزعلوا ..وأرجو إنها ما تكررهمش تاني .. لكن ليها بوستات تانية معقولة وما وصلتش لمستوى الناس التانية ..

رفقة عمر يقول...

بمناسبه اسوأ لمدونات وهى مدونات المثلين والمثليات انا كنت عامله بوست عن ديمقراطيه المدونين وارسل لى احد اصحاب مدونات المثلين تعليق وبقولى ابقى زورى مدونتى وهو يعلم انا مدونتى نوعا ما اتجاهتها دينه حاسيت انه متعمد يحرجنى علشان ان بتكلم عن الديمقراطيه يبقى لازم اتقبله فكرت اعمل ايه قلت احسن حاجه اترك تعليقه واعمل نفسر مش واخدة بالى ورديت بكلمتين شكرا لزيارتك مدونتى وخرجت من الفخ اللى كان عايز يحطنى فيه اكيد كان منتظر منى انى اجادله بس لم اعطى له الفرصه لانهم للاسف يعتقدون انهم على حق ربنا يعفو عنا وعنهم امين يارب العالمين

شــــمـس الديـن يقول...

اسئلةالتاج دي اكثرؤ نضجا علي فكرة من التاج التاني

اصلا انا اول مرة افهم يعني ايه دا ...لانيكنت اول مرة قرأته بالعنجليزي و مش فهمت اي حاجة من الموضوع

انا متفقه معاك في نقاط كتيرة و كويس اني لاقيت حد يتفق معايا فيها اساسا لاني كنت فاكرة اني لوحدي اللي ليا وجهات النظر دي ... خير ( طبعا اقصد بعض اجابات اسئلة التاج دا )

عقبال ما تاخد تاج الجزيرة , و تبقي ملك التيجان

غير معرف يقول...

والله يا أخى انا معجب جدا برأيك وفعلا يكفى أنك صادق وتصدق اجاباتك 90% متفقه مع اجاباتى اذا كنت أتسالت يعنى
والله سعيد جدا بوجود ناس زى حضرتك كده

لا حقيقى لسه مصر بخير
وربنا يوفقك ويسعدك

مصر هى أمى يقول...

اجاباتك حلوة اوى
بس انا ليا اعتراض على سؤال اسوء مدون مش لازم نقلب المدونات لحرب بين المدونيين وان احنا نقعد ننتقد بعض
وعلى فكرة انا اكتر واحد بينتقد مدونات المثليين والمثليات
بس انتى من اجاباتك شخصية محترمة اوى

أسوور يقول...

كانت مدونة ابراهيم الدسوقى من أجمل ما كتبت على وجه لإطلاق

كالعادة تعليقاتك .. ذكية .. واضحة .. مباشرة .. صريحة .. تلقائية

تحياتى

شيمـــــاء يقول...

يا نهار منيل
هو كمان بقى فيه مدونات مثليين ومثليات
لا حول ولا قوة الا بالله العلى العظيم وحسبى الله ونعم الوكيل


عجبتنى اجاباتك يا محمد
و تقريبا هيبقى فيه اجابات متشابهه بينى وبينك

قاسم أفندي يقول...

محمد
عجبتني جدا صراحتك وحسستني أنك قريب مني، وبالتأكيد بأشكرك علي أنك فاكرني ويارب يديم الخير والمعروف
وصلت الرسالة ومش عارف أعمل أيه الهوم وورك اتكوم عليا وخايف أسقط
عجبتني أوي الحتة دي:
لماذا تدون أصلاً؟
عشان اغير المجتمع

salwa hegazy يقول...

ممكن متكنش عيشت ايامها ولا رن في ودنك صوتها الحنين و هي بتقول يا حبيابي يا حلوين
بس اكيد سمعت عنها استهويتك مرة حواديتها او شعرها او لقائتها اكيد قريت نهايتها المؤلمة
احي ذكراها يوم 21فبراير اديها فرصة تعيش في قلوبنا تاني متخليش ذكراها تموت

بيتنا القديم يقول...

الله ينور

إيمان الحسيني يقول...

عوض عليا عوض الصابرين يا رب
ليك يوم يا محمد

كلبوزة لكن سمباتيك يقول...

ربنا يكرمك يا رب
فرحتني ان حد مميز زيك تعجبه مدونتي
ميرسي على ذوقك
و طبعا انا مش حعتبر نفسي من اللي لازم يجاوبوا على السلطنية دي اقصد تاج الجزيرة
علشان انا مبعرفش اسيح لنفسي


شكرا مرة تانية
:)

أسوور يقول...

كل دى تيجان

انت بقيت ولا السلاطين

:))))

انت ليه ما بقتش تيجى عندى زى الأول
حاسة انك مابقتش متحمس لية اليومين دول

انت اتضايقت لما قلتلك ان الصورة عاجبانى؟؟

أرجو انك ما تكونش زعلان منى فى حاجة

Unknown يقول...

اجباتك علي التاج صريحه وجميله
وفكرة التاجات دي فعلا حلوه لأنها بتعرفنا علي بعض أكتر (:

كراكيب عادل يقول...

عجبتني كلمه الفضاء البلوجري دي

مدونتك هايله استمر ربنا يوفقك



اخوك

محمد عبد الغفار يقول...

ما علينا
أيه ده كله يا عم الحج ، انا وشى احمر ، بالنسبة لداليا زياده ما قلته يعد راى شخصى فى مدونتها لا ألام عليه، انما لو قلت اسباب وتفاصيل على الملئ يصير تجريح وهذا لا يجوز لمجرد أختلاف الرأى وألام عليه ولن أنزلق لهذا المنزلق فإعذرنى

رفقة العمر
انا جانى تعليق من واحد منهم على مدونتى هذه فى موضوع هاله سرحان واخر فى مدونة الصور الخاصة بى وكانت تعليقات محترمة فى مجملها ، انما وجوده هو شخصياً فى مدونتى فهو شئ غير محترم فلغيت التعليق ولم اسمح بنشره وهذا يعد اول تعليق اقوم بإلغائه

شمس الدين
الله يخليكى ومنورة المدونة دائماً ، اتمنى اشوف ردودك على التاج فى مدونتك

حسن محمود
أخجلتم تواضعنا ، وارجوا تكرار الزياره

مصر هى امى
حق الأعتراض مكفول ، وهذه ليست حرب وان كانت فلا بد منها حيث يجب ان يعرف السئ انه سيئ ليعدل من نفسه ولا يتمادى او يلفظ ان تمادى

قاسم افندى
الحمد لله لقيت فى حد بيفهم ومبيستعبطش عشان كتير ناس بتستعبط وهيزعلونى

سلوى حجازى
الله يرحمها

سمسم
عليك يا باشا

طعمة
تشوفى فى اكتر من كده حرام عليك ، وعلى العموم لو ده الثمن انك تجاوبى انا موافق ربنا يوريكى

سمباتيك
انت فاكره نفسك شويه ولا ايه ، لالالا ده انت كتير اوى على الأقل فى نظرى وبعدين متميز دى سمعتها فين ؟؟؟؟ أه أفتكرت سواق المكروباص بينده عليها وهو داخل على أكتوبر عشان اصلها حى فى اول اكتوبر
وهتجاوبى يعنى هتجاوبى

ياسمين
اه تصدقى ، وتصدقى ان ولا واحد منهم اخدتيه وجاوبتى عليه
انا مشغول جداً الفتره دى اوى فى الشغل ومنقطع عن المدونات والتدوين معنديش وقت خالص ، بس لا زعل ولا شئ والصورة فعلاً كانت غير مناسبه وانت حره ، بس انا مش تافهه اوى كده يعنى يا ياسمين

إسراء
طب ممكن نتعرف عليكى فى التاجات دى

عادل
فكرتنى بعد المنعم مدبولى الله يرحمه ( أنت كويس . . أستمر . . هتخف) مرحباً بك دوماً يا ريس

سهر الليالى يقول...

أحييك على صراحتك فى كل تاج عملته

بجد أحييك

انت ما بتجيش نزورنى ليه يا ترى

smraa alnil يقول...

تصدق ان كدة عيب بقي
ماشي بقي انا اللي مسعداك في التاج دة
ومش تجيب سيرتي
ماشي يا عمنا
بس حلوة الردود دي
انا التاج دة جالي وفوته علي امه لا اله الا الله
بس مش رديت اجيب سيرتك عشان عارفة انك كنت بتعملوا
بس حلوة اجاباتك

shabfa2re يقول...

هييييييييييه
انا فرحان فى دينا فهمى

soosa el-mafroosa يقول...

حلو التاج ده

احلى من التاجين اللي كانوا ماشيين اليومين اللي فاتوا دول

اتبعتلي من سمسم و عجبني و انشاء الله

مدونة ناضجة و قيمة

تحياتي

أسوور يقول...

محمد

كان نفسى تبقى معانا

raspoutine يقول...

محمد فى البدايه وحشتينى
وحاجه تانيه انا زعلت انك مجتش اللقاء لانك من المؤسيسن ليه
بس اعمل حسابك لن نلتمس لك الاعذار فى المره القادمه

واعتبرو تحذير

اخوك ايمن

محمد عبد الغفار يقول...

أمانى
شكراً لك ، بس للأسف انا مشغول جداً

شاب فقرى
أنا كمان فرحان بس مش عارف ادخل عندها

سوسة
متشكر اوى لزيارتك واتمنى اكون عند حسن ظنك دائماً

ياسمين
وانا كمان بس اعمل ايه انت حددتى الموعد قبلها بوقت ضيق اوى ، ومتشكر لأهتمامك

راسبوتين
حاضر يا فندم بس ياريت المره القادمة تحددو الموعد قبلها بوقت كاف، وسعيد اوى بمشاعرك الرقيقة الجايه تحددو الموعد قبلها بوق

hosnysoliman يقول...

الله الله محمد جعفر بك وباشا كمان يشرفنى وينور البلوج بتاعى ايه الحلاوة دى..ده شرف عظيم ليا..انت عارف انا من زمان وانا نفسى اتعرف عليك لكن عندى حته بايظه كده حصلت مع بعض المدونين..اظهرت ودى لهم فكان واضح انهم رموا ودى فى اول صندوق تحت التعليق..هذا الامر جعل عندى حرج..وقتل عصفورة قلبى من تطير فى سماء البلوجات زى ما قلت فى البلوج قبل الاخير ولكن الحمد لله انما الاعمال بالنيات وكما قال ابو الحسن الشاذلى اذا اردت ان تختار فاختار الا تختار فاليس هناك افضل من اختيار الله..انت من اختيار الله لى وانا واثق اننا فى اللقاء القادم باذن الله..سوف تتوثق عرى الصداقه والمحبة بيننا ..اشكر لك مرة اخرى هذه الزياره الميمونه

أحمد شعبان يقول...

محمد
بص وراك كدا
:)

-_- يقول...

كل تاج وانت طيب يا جميل و تعيش و نبعتلك

مصر هى أمى يقول...

محمد

بص انا معرفكش غير من المدونات وتعليقاتك الحلوة عندى
بس كان نفسى اشوفك فى الاجتماع من كتر ما حكولنا عنك ياريت تيجى الاجتماع اللى جاى

Haitham Abu Akrab يقول...

احلي حاجه ف التاج ده كلو هي
صراحتك اللي عودتنا عليها دايما




وباعدين يا محمد هو الي كاتب التاج ده كل شويه يقول هتجاو و اجباري
ع العموم هتستني ردي كالعاده علشان
حاجه واحده بس
انت كاتب انك هتزعل
؟؟

قاسم أفندي يقول...

ياريت تشرفني بزيارتك ضروري
http://kassemafandi.blogspot.com/

واحـــد مـــــن الـنـــاس يقول...

شكرا يا استاذ محمد على التنويه عن تدوينتي انا واخي

وانا بالفعل استمعت جدا وانا اقرا ردودك على التاج

والمدونة بشكل عام جميلة جدا
وان شاء الله اكون زائر دائم لها

raspoutine يقول...

محمد
ادينى جتلك قبلها بأسبوع
المكان دار الاوبرا المصريه
كوفى شوب الابداع
بالنسبه ليك وليا ولياسمي وانجى واستاذ حسنى كنا عايزين نروح بدرى شويه قبلها بساعه عشان هنتكلم فى كام موضوع مهم
الميعاد يا باشا هيتحدد بالظبط بعد اربعه وعشرين ساعه لما نعتر على ياسمين ونشوف ايه النظام

شــــمـس الديـن يقول...

ايه دا !!!

انت دبستني في التاج !!!

طيب هجاوب عليه بس بعد يوم السبت

ارجو الدخول علي مدونة قاسم افندي و المشاركة http://kassemafandi.blogspot.com/

مع خالص تحياتي :)

غير معرف يقول...

أزيك يامحمد؟

طال غيابك
لعل المانع خير

كان الله فى العون

Memo يقول...

kefaia tagat 3izin postttttttttt

أسوور يقول...

عاوزين بوست جديد
عاوزين بوست جديد
عاوزين بوست جديد
عاوزين بوست جديد
عاوزين بوست جديد
عاوزين بوست جديد

Rivendell** يقول...

احم احم ... هو انت حضرتك يعني روحت فين

أُكتب بالرصاص يقول...

جعفر


بتضايقك جعفر

طيب
يا جعفر يا جعفر


بجد
اجاباتك كانت واضحة وعفوية
وشعرت بالصدق فيها
بالاضافة أني احترمتك في كتير من وجهات نظرك
واتفق معك فيها

تحياتي
عبد الغفار باشا

Memo يقول...

عاوزين بوست
انت مقاطعني يا جعغر و لا ايه

اياك و الله لاحرمك من الميراث

www.blogs4arab.com يقول...

يسعدنا تشريفك
www.blogs4arab.com

Haitham Abu Akrab يقول...

عاوزين بوست جديد
عاوزين بوست جديد
عاوزين بوست جديد
عاوزين بوست جديد
عاوزين بوست جديد
عاوزين بوست جديد

الحمقاء المضلله innominate x يقول...

اظرف حاجه ان و انا بقرا مكنتش فاهمه يعني ايه تاج و بعدين خدت بالي ان قصدكtagggggggggg

سهر الليالى يقول...

ايه كل التيجان دى هو استقصاد ولا ايه ادوله فرصه يكتب بوست ولا التشويش وصل المدونات
:)

حائر في دنيا الله يقول...

فينك يعم
عيان ولا ايه
كل اما ادخل ملكيش جديد
طمني عليك
سلام

محمد عبد الغفار يقول...

hosnysoliman
حضرتك يعنى مجامل اوى بجد مش عارف اقول ايه ن على العموم بإذن الله اللقاء الجاى اكون من الحضور واتشرف بحضرتك

أحمد شعبان
وراى محمد سليم زميلى فى الشغل

شارم
منور المدونة وانت بصحة وسلام

مصر هى امى
نتقابل بإذن الله المره القادمة ن القلوب عند بعضها

هيثم ابو عقرب
أحلى حاجه انه جابك عندى ، اما أسلوب التاج فاللى كتبه هو احمد شعبان ممكن تراجع معاه

قاسم أفندى
أنا على طول متشرف بزيارتك يا باشا حتى وان لم اعلق

واحد من الناس
ده احنا نتشرف بوجودك يا باشا ، ويارب اخوات دائماً

أيمن
من الحضور بإذن الله يا ايمن ومتشكر لمشاعرك الجميلة وهحاول اجى بدرى بإذن الله

شمس الدين
اه دبستك ومنتظر ردك ، وزرت قاسم افندى

حسن محمود
أزيك انت يا ابو على ، معلش اعذرنىفى غيابى مشغول اوى اوى فى الشغل وبسهر للصبح وببات ده غير بقى نقلى للشقه الجديدة أنشاء الله ارجع قريب

ميمو
تعليق واحد . . حاضر يافندم أفضى بس واشم نفسى
تعليق أثنين . . مقدرش اقاطعك رغم انك بتغيظينى

ياسمين
أنشاء الله أفوق بس

Rivendell**
نتوجد عشان خاطرك يا فندم ، اظن اول مره مدونتى تتشرف بالزيارة ، اتمنى متكونش اخر مره

أكتب بالرصاص
ده انا اللى هضربك بالرصاص ، منور يا ريس والمدونة اتملت فوارغ ، ومتشكر اوى اوى لتشجيعك ومتحرمناش من زيارتك

www.blogs4arab.com
يسعدنى تشريفك واعدك بالمتابعه بإذن الله

هيثم ابو عقرب
مش عارف اقلك ايه حاضر يا ريس واعذرنى فى غيابى

innominatex
والله ولا انا كنت فاهم ، تشرفت بزيارتك ولعلها تكون دائمة

حائر فى دينا الله
بخير وصحه الحمد لله ، انشغال عمل للركب وتنقلات بين المصانع وباليومين مروحش البيت ، الحمد لله ده غير بقى انى كنت بنقل لستة اكتوبر انت والله زوق اوى وممتن لك اوى

كل زوارى الأعزاء والأعزاء جداً أعتذر عن طول فتره الغياب ، وبحمد ربنا عليها عشان عرفتنى غلاوتى عندكم متشكر لكم كلكم

Ahmad Hegab يقول...

اوعى متجيش بكرة

asadma7bos يقول...

اوافقك الراى تماماً فى موضوع اسوأمدونة
ولكن اقترح ان عبكريم يبقى اسوأمدون

عايزه اتجوز مدوٌن يقول...

اعتدر مقدما و اكنها دعوه لزياره مدونتي التي اطلقتها اليوم

hesterua يقول...

انا معاك فى كلامك عن اسوأمدونات وكده
بس من ناحية اسوأ مدون علاء
لأ دور حبة
هتلاقى اسوأ منه واهطل منه ميت مرة
هتلاقى المدعيييييييين كتير

daktara يقول...

ايه يا عم انت ادمنت التاجات ولا ايه
ومفيش حاجة جديدة ليه من زمان

محمد عبد الغفار يقول...

Ahmed_H
بكل اسف مقدرتش اجى لظروف خاصه ، متاسف بس انا اتصلت واعتذرت يارب يكون بلغك اعتذارى

أسد محبوس
حريه الراى مكفوله طبعاً ، وياريت نشوف التاج ده عندم وتجاوب ونعرف رأيك فى كل حاجه

عاوزه اتجوز مدون
انا زرتك وقرات اول انتاجك ، مرحباً بك فى عالم التدوين ، بس المشكلة انى معرفتش اعلق لأن قصرتى التعليقات على الأعضاء

hesterua
متشكر لزيارة حضرتك واهتمامك وتعليقك، والله انا اخترت الأسوأ فى حدود متابعتى انا المحدودة اكيد فى اسوأ ممن اخترت وافضل ممن اخترت فسامحنى لعدم قدرتى على متابعة الكل

دكتره
وحشنى والله ، بس اعمل ايه غصب عنى أكل العيش بقى ، بس انشاء الله اعود قريباً

شخبطة ملوكى يقول...

جميلة جدا ردودك
بسم الله ما شاء الله سريع البديهة و صريح
اتمنى اتشرف بزيارتك قريبا
دمت بخير

كلبوزة لكن سمباتيك يقول...

اخبارك اية؟

شــــمـس الديـن يقول...

السلام عليكم و رحمة الله و بركاتة

اعتذر عن قطع الموضوع و الخروج عنه ... و لكن ارجو انت تزوروني علي المدونة

خالص تحياتي للجميع

david santos يقول...

جيد الاسبوع

دينا فهمي يقول...

ماشي يا فندم
بإذن الله في أقرب فرصة هرد عليه
وليك يوم بردو
التاجات أكتر من الرايحات (:

غير معرف يقول...

فى الحقيقة اول مره اشاهد فى مدونتك
لن اقول عنها اكثر من
" فى العمق ...مكان للحرية "