الخميس، 17 مايو 2007

حسن محمود . . عود أحمد

كنت اتسائل عن اختفاء الأخ العزيز حسن محمود وظننت انى وحدى من افتقده ولكنهم كثر كما اتضح من التعليقات على الموضوع ولهم الحق فقد كان حضوره مميزاً ، وجاء رد الرجل ليعلمنا ان جانباً من اسباب اختفائه انه قد كان سأم منا وحار فى جدوى ما نفعله بالتدوين وما يفعله هو بالتعليق واورد تعليقه هنا كما هو بالنص ليعلم ويطمأن عليه كل من شغلهم امره ، فقط ترددت كثيراً فى نشر ما به من اطراء لا استحقه ثم نشرته التعليق كاملاً لمقتضيات الأمانة وبما انه موجود اصلاً كتعليق على الموضوع
وللأصالة عنوان
أخى العزيز محمد عبد الغفار
لم أكن أتصور يوما أن احدا سوف يذكرنى حينما أختفى .
وذلك لأنى كنت قد قررت أن أرحل فى صمت ولا أخفى عليك انك لمست جانب مما دار فى مخيلتى من حيث ما فائدة المدونات ؟ ولماذا أعلق ؟ وللأسف كنت أقول ان المدونات مجرد هوجه وسوف تنتهى كما أن بعضها ردىء وبغيض . ولكن على مايبدو ان هناك تواصل انسانى على الرغم من اننا فقط قد تبادلنا بعض الافكار او التعليقات
لا أعرف كيف اشكرك على اهتمامك بى وسؤالك عليه. واتذكر القول العربى المشهور رب أخ ٍ لك .. لم تلده امك. و أعدك بانى سوف احاول ان اكون على اتصال دائم بك فأنا حقا معجب بمدونتك واكثر مايعجبنى ضحكتك البهية فى الصورة الموضوعه وكلماتك القائلة أنك صادق وكفى .
يالايتنا كلنا صادقون على كل حال سوف اعاود التعليق من جديد فهناك ناس قد عرفتهم من خلال مدوناتهم أعتقد انهم كنوز وكما قلت هناك فعلا مايستحق القراءة ودمت بكل خير وحب وتقدير وسلاملك جزيل شكرى وخالص احترامى يا اخى العزيز

أشكرك عزيزى على اطرائك الشديد لشخصى المتواضع والذى اخجلنى حقاً وحملنى من المسؤلية ما لا اطيق، وانقل لك سعادتى بعودتك وفرحى بوجودك معنا واضع تعليقك امام الزملاء حتى يستشعر كل منا ان وجودنا هنا امانه يجب ان نصونها

هناك 37 تعليقًا:

Esmeralda يقول...

اعتقد المدونات ليها تاثير و الا مكانش حيبقى فيه هجوم عليها و مطالبه باغلاق بعض المدونات

على الاقل حجر اترمى فى المياه الراكده
فيه ناس ببتكلم و تعبر و تفنن
و ناس بتفضفض بدل ما تطرشق و ناس بتكتشف حاجه جديده عن نفسهم حتى

حياه تانيه

ممكن الملل يتسرب للمدون باتمنى ده ميحصلش لاى حد

Shreif fahmy يقول...

http://sfahmy78.blogspot.com/2007/05/blog-post.html
منتظر تعقيبك على البوست ده

غير معرف يقول...

عود أحمد

أو لنقل

عود محمود

:)

كلبوزة لكن سمباتيك يقول...

احلى شئ في الحياة هو التواصل النفسي بين الناس و الصداقة اللي ممكن تنشأ بين اسماء قد تكون وهمية
و لكن الصدق الحقيقي لا يمكن ان يكون وهمي
ادام الله عليكم و علينا الود و الايخاء في الله
خالص تحياتي

عصفور المدينة يقول...

هذا يطح أهمية وجود المعلقين مثل وجود المدونين بل أهم

كراكيب عادل يقول...

دام الوفاء ودام التواصل الراقي بين الاخلاء

Unknown يقول...

حمد لله على السلامه يا حسن و نورت المدونات

و على فكره دى فتره بجد بنمر بيها كلنا و بنكون محتاجين حد زى ابو حميد يسأل علينا


بجد التدوين اكتر من مجرد هوجه التدوين بقه حياه


تحياتى ليك على مشاعرك الجميله و على سؤالك على اصحابك

أمــانــى يقول...

الســـلام عليكم
استاذ محمد بكتابة حضرتك للموضوع اثبت للجميع الوجه الاخر لهذا العالم وهو الصدق والمحبة فى الله والاخوه وتبادل الافكار مع احترام الاخر
تحياتى لحضرتك

Reemo يقول...

أعتقد ان المدونات ليها فايده
حتى وان كان مجرد طفيف
بس كفايه التواصل اللى بيخلقه ما بين الشباب
كفايه ان الواحد يحس انه بيكتب وغيره بيقرى وبيعلق حتى لو كان مجامله كفايه ان الكلام اللى الواحد حسه يخرج ويوصل لاكتر من نفسه
حمداللع على سلامه الاستاذ حسن محمود
اتمنى دوام الاخوه بينكما
تحياتى

AHMED SAMIR يقول...

عود احمد وحمد لله ع السلامة
المدونات حتى وان لم يكن لها تاثير كبير هي وسيلة لنقل الافكار والتنفيس عن النفس
تحياتي واحتراماتي

غير معرف يقول...

سبقتني يا محمد وكتبت عنه مش هشكر فيه ولا همدح ولا هقول فضله عليه لان ده البوست بتاعي الجديد بس بجد فرحتي برجوعه احسن من فرحتي برجوع اي مدون اعتزل

hamasat يقول...

اخوتي في رايي المدونات هامة جدا فنحن نتواصل ونتبادل الاراء والافكار وكوننا لانعرف بعض الا باسماء وهمية فهذا احري ان كل منا علي سجيته يخرج ما بداخله من هموم وافراح واحاسيس واحلام يدونها دون حرج ممن حوله اعني ان بها صدق فلا داعي للتجملانا شخصيا انعكست علي حياتي بالايجابيه استطعت ان انفس عن بعض ما بداخلي من هموم وافكار اعتقد انها ليست ضمن اهتمام الكثيرين من حولي ولكني تواصلت بها وكونت اصدقاء قد نتفق في بعض الاحيان وقد لا نتفق وقد نصحح لبعض بعض الاخطاء
اري انها مساحة حرة للتعبير عن النفس في حدود اللائق
تحياتي لكم جميعا

Shiko يقول...

دى فايده من ضمن فوائد التدوين بتعرفنا على ناس ليهم اراء بتأثر فينا وبتنشأ صداقات ومعارف بينا
تحياتى لك

حقى اهرتل يقول...

مش هقدر ادخل واستكشف
بيقولوا ان العمق مريب
فى القشره الارضيه وخوفى
وف وطنى انا بابقى غرييب

غير معرف يقول...

كان نفسى أكون اول تعليق انما معلش
حصل خير
مش عارف أقول ليك ايه
مكنش فى داعى لكل ده

فى حاجه تانيه مشتركه بينا وهو ان احنا الاتنين بنسمع ال بى بى سى
بس من حين لأخر بطلت اسمعها نتيجة الاخبار اللى تودى على مستشفى الامراض العقليه عدل

عاجز عن الشكر أخى الفاضل الكريم
وان شاء الله نكون عند حسن ظنكم
ومتشكر جدا للكل
الست ازميرالدا والست منه الله والست سامبتيك والاستاذ شريف فهمى
ومش ناسى الباقيين وكل المدونين المحترمين
ربنا يهدينا ويوفقنا ويدخلنا الجنة
ان شاء الله

ودمت بكل خير وحب وتقدير ومودة
سلام

غير معرف يقول...

السلام عليكم ورحمة الله وبركاته
مرحباً بك من جديد أستاذ/ محمود
نعم هناك مدونات رديئة ولكن فى المقابل هناك القيم والجاد الهادف
ودورنا أن نقف بجانب الجيد وندعمه حتى يصبح الأفضل هو السائد، والتدوين تجربة جديدة قد تنجح وقد تفشل وإن كان الواضح جالياً حتى الان أنها مبشرة بكل خير
فى انتظار ك وانتظار آرائك
****
شكراً لك أخى الفاضل : محمد
على أنك ساهمة فى عودة إنسان قدير بحجم الأستاذ محمود من جديد إلى عالم التدوين

بارك الله فيكم جميعاً

أخوكم
محمد الجرايحى
******
دعوة كريمة

العقل أم الغريزة؟؟!!
هل نحن أمة لاتقرأ ؟؟!!

هنا على هذا الرابط
http://www.nooriyat.com/

FATMA يقول...

حلوة اوي المشاعر دي

بس حسن محمود مش بيعلق عندي ليه

شــــمـس الديـن يقول...

السلام عليكم و رحمة الله و بركاتة

الي الاخ الفاضل الكريم حسن محمود

انا كنت هنزل التعليق دا في مدونتي بس اعتقد انه هنا انسب لك لان دا موضوع مخصوص ليك

اولا ... لقد اقلقتنا عليك حقا
بس عايزة اقول لك شئ مختلف

المدونة علي حسب ما انشئها صاحبها
و اكيد الاسلوب بيبان
فيه مدونات فعلا كتيرة مجرد تهييس و بس و لا قيمة لها
و فيه مدونات معمولة للترويح عن النفس او كمساحة لفك الضغط النفسي مما قد يستطيع المرء ان يتكلم فيه مع اناس لا يعرفونهم و قد يجد منهم دعم ما يمكنه من الاستمرار
و دي علي فكرة مهمة جدا في وقتنا الحاضر

كأننا شوية عاقلين بنلاقي بعض وسط العالم اللي اتجنن من حولنا

مش بذمتك لما بتلاقي ود و حب في الله دون اي مصلحة مش دا بيخلي روحك تحس انه لسة فيه امل في بكرة انه يطصلح رغم كل شئ ؟؟؟

انا بعتبر التدوين اكبر من مجرد كلام و خلاص

التديون المحترم في مصر بجد هو روح مصر الحقيقية التي تأبي ان تخضع لكل عوامل الهدم ... لسة هناك ارواح نقية ... عاشة وسط الناس بجد مش في بروج عاجية ... بتنقل احاسيسها و الامها و كل ما يعنيها

الواحد في الحياة العادية اكيد كتير اوي بيتكلم باسلوب الناس اللي حوليه مش متعودة عليه ... لان السطحية بقت غالبة علي تفكير الاغلب
كون انك بتلاقي نناس بتتكلم نفس اللغة و نفس الاسلوب و حاسين ان البلددي بتاعتهم مش خلاص ... دا في حد ذاتة بيدي عزيمة للواحد و بيخيلية مش حاسس انه لوحدة

و انه في يوم ما هنغير ... طال امد هذا اليوم ام قصر

عذرا علي الاطناب و التكرار , و لكن كنت عايزة اقل كلام اكتر من كدا لحضرتك

بارك الله فيك و اعزك
و اكيد لو نظرت للتدوين بشكل مختلف , هتحس بقارق كبير
خالص تياتي

shermen يقول...

الحمد لله طلع لنا تأثير قوي

---------------
على فكرة انا بهديلك تاج
لو تحب تجاوب

تحياتي

رفقة عمر يقول...

ربنا يكرمك استاذ محمد دايما بجد سباق بالخير مش بقولك انك الاخ الاكبر للمدونين
والبوست دة يثبت لاستاذ حسن قد ايه احنا كلنا بنقدره ونحترمه فعلا

daktara يقول...

الله علي المشاعر الانسانية وروح المودة والحب بين المدونين
اعتقد ان هذا هو الغرض الاساسي من التدوين
ولك وله تحياتي
ولكل المدونون
د. خالد عزب

daktara يقول...

اه نسيت
مبروك علي جعل التعليقات في نفس الصغحة وليس صفحة جديدة
لو تفتكر انا كنت طالبت بكده في بوست ليا
وتحياتي

غير معرف يقول...

allah yes3edko

كلام لوجيك يقول...

حمدلله على سلامته وانا سعيد جدا بهذا التواصل وهذه الروح الجميلة
انت من السباقين فى الخير دائما يا استاذ محمد

وجميعنا قد افتقد تعليقات ومشاركات ومساهمات العزيز حسن محمود

دمتم جميعا فى حفظ الله

-_- يقول...

الراجل ده انا افتقدته جدا

غير معرف يقول...

سعد سعد يحيا سعد

غير معرف يقول...

التليق السابق كان بتاعى هىهى لامؤاخسه

BinO يقول...

حقيقة أن أحترم المدونين للكلمات أمر عظيم أثر في كثيراً
ربنا يبارك لك استاذ محمد
وجزاكم الله خيراً مهندس حسن محمود

Amira يقول...

عزيزي محمد

هذا الرجل "حسن محمود" واحد من أكثر المعلقين تأثيرا في
أولا لأنه يقرأ بإهتمام
و يرد بإسهاب
فيجعلك نشعر أن لما تكتبه قيمه
و أنك يجب أن تصير أفضل

أحترم فيك أنت تنويهك عن غيابه
و سؤالك عنه

و كما قال هو
هذا يثبت أن التدوين تواصل فكري بين بشر
فنحن في النهايه بشر
لاصفحات الكترونيه و كلمات مبعثره في فضاء النت

غير معرف يقول...

كل كلمه حق بتتقال ليها تأثير
دى مساحتنا اللى بنتكلم فيها بحريتنا
دى بطاقاتنا البريديه اللى بنتلاقى ونتواصل ونفكر مع بعض من خلالها
احنا بقينا قوه كبيره قوى لا يستهان بهايبقى ازاى تقول ايه جدواها؟؟؟
راجع نفسك يا حسن
احنا محتاجين لكل رأى بناء صادق لو عاوزين نعمل حاجه بجد
تحياتى وشكرا ليك يا محمد

Rania Lelah يقول...

المدونات بقت مهمه جدا
على الاقل الواحد بقى بيعرف ازى يطلع الى عندة من غير خوف و لا قلق
هو ايوة فى هجوم عليها دلوقت و مراقبة بردة اعتقد
انما مينعش اننا نقول و نقول و نتكلم على اى حاجة عايزنها من غير خوف
الف مليون حمدلله على السلامة لصحبك
و انت فين
غايب ليه؟
ابقى طمنى عليك
تحياتى

Bipolar-Girl يقول...

حتي لو بينا مدونات فارغة او تافهة او مبتذلة او صغيرة الحجم او التأثير
لكنها ستظل مساحة شخصية بحته
لنا فيها حق النشر والادارة والحجر والحوار وكل الحقوق التي حرمنا منها في المنزل والوطن

والتأثيير والتغيير مش هيحصل في من المدونات لكن هيحصل من عدوي الوعي اللي هتتنقل للمدونين وهما اللي عليهم مهمة نقلها للشارع فيأتي التغيير

انا معجبة جدا بمدونتك

Love & Peace
Nancy

خمسة فضفضة يقول...

السلام عليكم ورحمة الله وبركاته

حمد الله علي السلامه يا استاذ محمد
ايه الغيبه دي كلها

في رايي ان التعليقات احيانا بتبقي اهم من البوست ، بتناقشه وتوضح جوانبه او تؤيد فكرته او تنفيها

لا اعرف الباشمهندس محمود ولم اسعد باي من تعليقاته
بس تبقي حاجه جميله جدا لما الواحد يحس ان فيه حد متابعه ودايما بيعلق علي موضوعاته بالرغم من انه حتي ماعندوش مدونه ، ده بيدي احساس ان الشخص ده بيدخل عندك بس لان كتاباتك عجباه وتستحق انه يعلق عليها من وجهة نظره


حمد لله علي السلامه مره تانيه
سلام

قاسم أفندي يقول...

مش هقول غير اني سعيد جدا بالموضوع ده من يوم ما اتنشر اول مرة رغم اني مشرفتش بالاستاذ حسن محمود في مدونتي ولا أعلم ان كان يتابع كتاباتي أم لا ولكني كثيرا ما تابعت تعليقاته الثرية علي مدونات كثيرة فحمد لله علي السلامة استاذ محمود وأشكر عبد الغفار علي روحه الطيبة التي تعطي نموذجا طيبا وقدوة للعلاقات الانسانية
تحياتي ودمت بكل خير

LOJAIN يقول...

اكيد للتدوين فايدة
بس المهم تكون فايدة مش بس من وجهة نظر المدون لا و قراؤه كمان
لان فى مدونات صراحة عايزة الحرق هى و اصحابها
فايدة بالسالب

تحيتى لمدونتك المحترمة

Regards:
Lojain :)

نفسنا يقول...

تم أفتتاح العدد الأول من مجلة نفسنا
نتمنى منكم زيارتنا

عصفور المدينة يقول...

حمدا لله على السلامة يا استاذ محمد انت فين
لعلك بخير