الثلاثاء، 20 مارس 2007

الله يا سى محمد

فى مسرحية موسيقى فى الحى الشرقى بطولة سمير وجورج وصفاء ابو السعود والمقتبسه من فيلم الملك وانا او ملك سيام او صوت الموسيقى (من فكره واحده مع اختلاف المعالجات) فاصل فكاهى بين سمير غانم وصفاء ابو السعود يسخر فيه بشده من الغناء والمطربين (اعتقد انه كان فيه خروجاً عن النص المكتوب) ، وممن سخر منهم الريس محمد طه (بتاع آى ياى ياى يعينى) مدعياً ان كل من يشيد به قائلاً الله يا سى محمد أنما يقولها رعباً من مجموعه المخبرين خلفه ( يقصد فرقه العازفين) وبطبيعه الحال لن يجروأ احد على الخروج عن هذا النسك وإلا تعرض لعقاب المخبرين ، وان نسى احدهم الهتاف والتصفيق فسينزل المخبر على حد تعبير سمير غانم "يلبه" ليهتف ويصفق

اذكر هذه الحاله غالباً -اعنى حاله من يهتف ويصفق خوفاً من المخبرين- عند متابعتى لأغلب التعليقات بالمدونات ( ولا اثثنى من ذلك مدونتى أو نفسى كمعلق) فأجد ان 90% من التعليقات لا يعدو كونها هتاف وتصفيق على شاكلة الله يا سى محمد بشكل قد يصل لحد الملل فى كثير من الأحيان ، أو الظن بأنهما تعليقات مدفوعه الأجر ، او رد جمايل بين المدونين والمدونات، سيل متصل من المديح والأطراء بشكل يفقد التعليقات قيمتها ويفرغ التدوينه من مضمونها ، وقلما تجد فكر يضيف به المعلق للموضوع او نقد بناء يعدل به مسار ما او نصيحه مفيده يحويها التعليق ، لدرجه فكرت معها ان اتوقف عن أستقبال التعليقات كما فعلت اختى مبعثره الأحلام فى مدونتها ، وسرعان ما عدلت عن الفكرة حيث ان التعليقات جزئ مكمل للتدوينه لما يشكل من حراك وتفاعل –هذا ان كان تعليقاً ذو قيمة وليس مجرد الله يا سى محمد– ولما يرجى من دوره فى التوجيه والتجويد والإثراء الفكرى

وتثير هذه الحاله فى نفسى تساؤلات عدة تلح على عفلى دوماً، الظاهرة جلية وواضحه للعيان الم يلحظها قط اياً من المعلقين أومستقبلى التعليقات فضلاً عن الزوار واثارت حفيظه احدهم مره؟ ام تراهم استمرؤها؟ ام انها لفتت انتباههم ومنعهم الخوف من الإشارة اليها؟ خوفهم من رد الفعل العنيف لسيف الحرية والردود من نوعية مدونتى وانا حر فيها وتعليقى وملكش دعوه ، ان كان هذا او ذاك فنحن بصدد كارثه، فالمفترض فينا اننا جئنا هنا لنتمتع بحريه ما فى نقد واظهار العيوب ونعول على انفسنا صلاح الوطن كله، فإن كان الأول فلسنا اهل لدورنا إذن حيث لا يلفت الخطأ نظرنا فكيف يراد بنا تصويبه، وأن كان الثانى فقد أصابنا ما اصاب الصفوة، وإن كان الثالث فعلى الدنيا السلام

ليس هناك أولى من تقويم النفس وإصلاح ذات البين ، ولا يصح ان نكون ممن يبصرون القثى فى عيون إخوانهم ولا يرون العود فى اعينهم فلزم التنويه مع كامل أحترامى للمدونين والمعلقين على حد سواء


تحديث


أنا لا انكر اهمية التعليق ولا المعلقين فلا ينكرها الا جاهل ولا اصنف التعليقات بين تافه ومهم وقوى وضعيف فلست اهلاً لذلك ولا اناقش اذواق الناس فانا اعلم يقينا ان عقول واذواق الناس مختلفه وقدراتهم كذلك ، انما اعترض على ان تكون تظاهره المديح والإشاده وكلمات الأطراء المتكرره والتصفيق المتواصل صلب ومجمل التعليقات ومبتغاها دون اضافه فكره او تصحيح مفوم او شرح لنقطه ما، فقط اطالب بتقنين التعليق حتى لا تضيع قيمته واهميته ويصير غثاء

>

هناك 47 تعليقًا:

مصر هى أمى يقول...

محمد
انا اول واحد اخد جايزة كده ولا ولأ
بلاش لحسن تقول ان التعليق ده مجاملة

بص يا صديقى التعليقات مهمة ممكن تستفيد منها وممكن تكون تعليق ملوش اى لازمة
اهم حاجة انك تقدر تستفيد من اى تعليق انا عن نفسى استفدت من تعليقات جاتلى وضحتلى حاجات كتير مكنتش اعرفها
كل حاجة ليها مميزات وعيوب اهم حاجة ان احنا نقدر نستفيد من المميزات

غير معرف يقول...

يا سلام عليك .. جبتها بالمللي !

الموضوع هذا كان يضايقني من فترة .. أتوقع أخي الكريم ان اللي صاير هو حكاية علقلي وأعلقلك!! لدرجة إن في بعض المدونات أشوف أحد المعلقين يشكر المدون على زيارته له والتعليق عنده، فكأن هذا ردّ للجميل!

فكرت مثلك أخي الكريم في إلغاء خاصية التعليق، خصوصا اني أخشى ان القضية توصل إلى "مين هو صاحب أعلى تعليقات"! لكني تراجعت في الأخير لنفس السبب اللي انت ذكرته ألا وهو ان من أساسيات التدوين التواصل بين الناس، وإن بإغلاق خاصية التعليق أكون حرمت نفسي من تعليقات ممتازة جدا وتوزن بالذهب.

تحياتي لك أخوي الكريم، وتدوينة موفقة

Tamer Nabil Moussa يقول...

شوف ياعم محمد انا اتفق معاك فى حكاية الردود بس عايز اقول ان عالم التدوين كبير والناس اللى فية تختلف من حيث الاعمار والثقافة

كما اننى ممكن ادخل اشوف موضوع عجبنى لكن مش عندى رد بالسلبى او الايجابية علية ودة يرجع لعدم معرفتى لية من الناحية العلمية لكن كبوست وفكرة عجبنى دة لازم اشكر صاحبة علية ولا عيب فية.

ولما يكون فية موضوع اقدر اعبر عنة وعندى معلومات ومتمكن منة اقدر اتكلم واقول سواء كان اعتراض او قبول او نقد لية

الرد لية اهمية كبيرة اى كان نوعة وخلفيتة وانا بشوف مدونين كتير الرد عندهم يفوق الموضوع نفسة شكلاا ومضمونا


اشكرك على الموضوع

تحياتى

شخبطة ملوكى يقول...

اتفق معك فى رصدك واتفق معك فى ان التعليق جزء مهم و حيوى فى عالم المدونات فمهم جدا ان تشعر ان هناك من يتفاعل معك او يشد ازرك ويقول لك انك على الطريق الصحيح
طيب التفاعل بقى ممكن ييجى من بعض الناس اللى عندها فكر ما و عندها اضافة و ابتكار مش كل الناس ثوار فيه ثائر و معاه ناس مقربين ثوار ايضا و البقية تكون من العامة الذين يشعرون بصدق ذلك الثائر
كلنا ايدينا مغلولة ولا نملك الا الكلمات تحليل و قراءة لما يجرى و رصد و تسجيل ولكن ماذا بعد
مش عارف حاسس انى مهما كتبت بايجابية من حق اى واحد من اللى بيصقفوا يقولى لا تعايرنى ولا اعايرك الهم طايلنى و طايلك
بس بجد اشكرك على جراتك فى الطرح و الدافع وراء الطرح الجميل الغيور على حالنا
دمت بخير

غير معرف يقول...

الله عليك يا سي محمدكلامك صح الصح انازائرة عاديةللمدونات ادخل للقراءة وفي بعض الاحيان اعلق وفوجئت ان بعض المدونين الاختلاف معهم يفسد للود قضية ويعلقون علي التعليقات باسلوب مستفز يفتقر الي ابسط قواعد الذوق اما بالنسبة في مجتمع المدونين فما هو الانموذج وصورة من صور المجتمع الاكبر الذي اصبح التهليل والتصفيق هو احدي سماته بدون هدف غير لاثبات الحضور وحتي اعطي لكل ذي حق حقه لا اقول الجميع بل البعض منهم ويايي يايي يايي يا عيني والفراولة بتاع الفراولة" مش عارفة اشمعنه الفراولة" اعد يا سي محمد اعد "هالة

غير معرف يقول...

ايه يا سي محمد اللي انت كاتبه ده
؟؟؟؟؟؟؟

انا مش متفقه معاك كليا
لكن متفقه معاك في بعض الأجزاء

االتعليق بالنسبه لي هو اهتمام من المعلق
حتى لو كان كلمه واحده

لأني ممكن اقرا موضوع و معلقش
حتى لو كان عاجبني

لكن لأن التدوين و النت أصله المشاركه و التفاعل مع الكاتب

يعني ده مش كتاب بتقراه و تحطه على جنب

يبقى التعليق شيء جميل بيحسس اللي بيكتب باللي حواليه

انا دايما اشكر كل اللي بيعلق عندي
لأنه أخذ وقت عشان يقول لي انه قرا لي

بالنسبه للمجاملات
ففي ناس بتقول حلو و هي بتجامل
ممكن
و في ناس بتقول حلو و هي مستمتعه فعلا بالموضوع
و في ناس بتقول حلو عشان تدخل عندها و تقول حلو
ده حقيقي

لكن في النهايه المشاركه مطلوبه
و لو انت منافقتش اللي نافقك مش حينافقك تاني

فريده

سهر الليالى يقول...

انا معاك ان فى تعليقات كتير بتبقى مالهاش لازمة لكن برضه رغم كدة ليها اهمية

زى ما تعمل ندوة وييجى واحد يحضرها مهما قال حتى لو بس قال سلاموا عليكم برضه هيبقى اثبت حضوره و وجوده

زيارة أى حد فى مدونتك بتسعدك و لما يسيب تعليق ولو بسيط بنفرح

تحياتى

عمرو غريب يقول...

متشكر اوي علي التعليق الجميل واشكرك علي التصحيح الغوي

soosa el-mafroosa يقول...

عشان ماتزعلش

أنا مش عاجبني أي حاجة من اللي انت كاتبها دي

طب ماتزعلش ماتزعلش..شوف ..أنا عن نفسي لما أدخل على مدونة و ألاقي موضوع موش عاجبني ..ساعات كتير باكتفي بإني أسيبها و أمشي من غير ماكتب تعليق

لما بيبقى فيه حاجة تتناقش و ماله نتناقش و لما بتبقى وجهة النظر مطابقة تماما لوجهة نظري أو الموضوع متناول من وجهة نظر جديدة عليا و ماكنتش واخدة بالي منها..باشكر طبعا صاحب المدونة
أكتر حاجة باتحاشاها اني أقرا حاجة عجبتني و أهز رأسي و أمشي و خلاص ..لأن ممكن المدون اللي عجبني موضوعه من قلة التعليقات اللي عنده يزهق و يقفل زي ناس كتير و أخسر أنا البوستات الجميلة اللي كانت بتسعدني

طولت عليك؟

رغاية أنا شوية ..معلش يا سي محمد

mohammed يقول...

:) .. مساءك سكر

بدايةً أتفق معك عزيزي في بعض ما قلت ، لكن لدي ما أود قوله آنا أيضاً ، وأرجو أن تسمح لي بذلك ، أمامك رأي كرأيي - كمثال - في موضوعك هذا ، أنا لم أتشرف بمعرفتك من قبل عزيزي ، وعلى الرغم من هذا فقد دفعني ما كتبته للرد عليك ، لا توجد أي مجاملة في هذا الموضوع ، ربما كانت المجاملة في طريقة عرض الرأي نفسه ، لكن ليس في الرأي نفسه ، بمعنى أن صديق لك من خلال المدونات يقوم بالرد عليك في مدونته - مثلما تفعل أنت معه مثلاً - هنا بعض المجاملة ، ولا أنكر ذلك ، لكن في النهاية لن يقوم صديقك - أو أي شخص آخر - بالاتفاق معك دائماً فيما تذكره في موضوعاتك ، فقد يختلف أو يتفق ، لكن تبقى طريقة العرض المُجاملة للرأي في النهاية ، لأننا لا نُشهر السكين كلٌ أمام الآخر ، ولا نحاول فرض آرائنا بالقوة الجبرية ، نعم أرحب \ لا أرحب برأيك لأن هناك كذا وكذا وكيت وكيت .. الخ

هناك من يعبر عن رأيه بطريقة - واسمح لي- تخلو من اللياقة ، ولهذا استطاع الأجانب - بعد تفهمهم لما أذكره - معرفة كيفية التواصل - على عكس الكثيرين منا للأسف ! - فكما قرأت الأجنبي لا يقول لإبنه ، إن أخطأ :
You're Bad
بل يقول :
You're Not Good

..لِم ؟
لأن هناك فرق كبير جداً بين " سئ \ " و " لست جيداً " ، فال " سئ " تعني أنك مهما فعلت لن تصبح " جيداً " في يوم ما ، والعكس في " لست جيد " .. هنا يتضح طريقة عرض الرأي ، بطريقة لطيفة ، بها ذوق عالي جداً ، لكنها في نفس الوقت توجه وتُرشد ، وهو شئ هام جداً على ما أظن

:) أسعدني جداً موضوعك - بالرغم من اختلافي معك - لكني أحييك على طريقة عرضك المُذهلة لما تود قوله ..

تحياتي
محمد عادل \ أوسكار
http://oscarization.wordpress.com/

AbdElRaHmaN Ayyash يقول...

http://al-ghareeb.blogspot.com/2007/03/blog-post_1866.html

-------------
لنضع من هنا التصاميم التي نعبر بها عن رفضنا للتعديلات الدستورية
شاركونا

قاسم أفندي يقول...

عبد الغفار
أولا حمد الله ع السلامة
ثانيا معاك حق هي فعلا ساعات بتبقي حاجه تفقع
ثالثا في ظواهر تانية كتير في التعليقات زي مثلا الاقي حد بيقول مش هعلق عندك لو معلقتش عندي .. دي فقعة أكبر حاجه رابعة أكثر فقعا اللي داير يلف بأي كومنت هنا وهناك عشان تتردلوا المجاملة ويتباهي قدام "صوحابه" ان عنده أد كده وآخر حاجه بقي بتفقع مرارتي جدا السهوكة لاموخزة في التعليقات
كويس اديتني فرصة أفضفض شوية
فيما عدا ذلك يمكن قبوله علي سبيل المدح والتشجيع والمجاملات بين الاصدقاء وأعتقد أنها أمورا مقبولة
:)
تحياتي

أسوور يقول...

المدونة تعتبر بيتك
والتعليق يعتبر ضيف
اللى يدخل مدونتك كأنه دخل بيتك بالظبط
ساعات يبقى ضيف ثقيل .. أو أحمق
وساعات يبقى ضيف ذكى .. مثقف .. قريب من القلب
انت وحظك
فى ناس لو اتضايقت من الضيف تطرده وفى ناس مشممكن تطرد أى ضيف مهما وصلت درجة سخافته وتفاهته
انا من النوع التانى لكنى لا أنتقد النوع الأول واعتبرهم شجعان يا ريتنى أعرف أعمل زيهم
لكن كل اللى اقدر أعمله انى أوعدك ما أكونش ابدا ضيف ثقيل .. غبى .. تافه

تحية من قلب مجروح

Ahmad Hegab يقول...

عندك حق

بس المشكلة دى موجودة فى معظم المواقع اللى موجودة على الانترنت و خصوصا بين العرب

و بصراحة فكرت فيها كتير و مفهمتهاش

eldoctor يقول...

هل الهدف هو التعليق .. للتعليق .. ولا لطرح نقطة لفتح حوار ..
مشكلة المدونات انها تختلف عن المنتديات فى الحوار ... فى المنتدى الحوار مستمر .. لنما فى المدونة .. الموضوع الاصلى انتهى بكلام صاحب المدونة .. التعليق بيبقى لنقد فكرة .. او لفتح خط أخر مختلف لتدوينة جديدة ..

بدون خروج عن الموضوع .. احنا مش كنا نوينا نعمل موضوع شهرى مجمع لاكثر من مدون .. ؟

دينا فهمي يقول...

كلامك مظبوط يا محمد
وأنا نفسي كتير مابعلقش إلابحلو وجميل وتسلم ايدك ومش كتير لما بقول رأيي في موضوع
بس أنا بعمل كد ليه؟؟
علشان أنا ببأى عايزة أحسس الشخص اللي كتب الموضوع إن فيه ناس قرت الكلام ده وعجبها لأن ماننكرش إن لما حد بيكتب بوست وماحدش خالص بيقول عنه إنه كويس أو صادق أو أو اننا بنتدايأ
فيبأى ممكن نبص لفكرة التعليقات المديحية الهتافية التصقيفية على رأيك إنها تشجيعية وبتقول لك استمر في ناس متابعاك وهاممها تقرا اللي بتكتبه

أحمد يقول...

معلش هاقولك حاجة بره موضوع البوست
I tagged you

ma 3lina يقول...

افتكرته بوست سياسي .. أصل .. سي محمد واللي يعترض وما يسقفش المخبرين يلبوه .. قلت بس أستاذ محمد عبد الغفار حيضرب بوست سياسي معتبر .. بس لقيته بينا وبين بعض ..
أظن استاذ إن تنوع التعليقات بين مدح لرفع معنويات الكاتب واعتراض لتصحيح المفاهيم .. وطرح أفكار جديدة لاثراء الموضوع .. كل ده كويس .. واوحش التعليقات اللي تبقى نوع من المجاملة بكلمتين أو إثبات الوجود بس في عالم المدونات

علي الالفي يقول...

انا عندى وجهة نظر
ممكن تكون غبية في الموضوع ده
لكنى غالبا باعملها
لو البوست ماعجبنيش
مش لازم اجيب اللي كاتبه و البه كلمتين و خلاص
لان ساعات في حاجات مش هاتتصلح
بس بجد ع البوست اللي انت كاتبه دلوقت

الله يا سي محمد

غير معرف يقول...

السلام عليكم .. أعتقد أن الاختلاف على موضوع التعليقات ده مثل أسرة قد طهت ديكاً رومياً واختلفت على لون شريط الزينة الذي يوضع على قدم الديك هل يكون لبني للرومانسية أم أحمر للاحتفال أم أسود تضامناً مع أطفال الشوارع !! في حين أن مشكلة أطفال الشوارع لا يمكن حلها من خلال تناولهم للديك الرومي إطلاقاً !! أعتقد أنه من الأفضل لكم جميعاً ان تناقشوا فكرة المدونات من أساسها .. لقد حصلتم على الحرية التي تريدونها فماذا فعلتم بها .. الحرية هي غاية العبد .. ولكن من صار حراً لا يمكن أن تظل الحرية هي هدفه بل يجب أن تكون وسيلته لتحرير الآخرين .. فما هو تأثير المدونات في المجتمع ؟ كم عددكم ؟ وإلى من تتحدثون ؟ ما هي المشاكل التي حلتها المدونات ؟ سيقول البعض لقد كشفنا حقائق وسبقنا الصحافة!! وماذا فعلت الصحافة أصلاً ؟ والأهرام توزع 100 ألف نسخة فقط يومياً .. وكم عددنا ؟ من تخاطب الصحف؟ وماذا حلت من مشاكل ؟؟ الكلام هو لعبتنا لإراحة ضمائرنا لأن الفعل ثقيل حتى على العاقلين .. وشكراً

أحمد زكي

كلام لوجيك يقول...

انا متفق معاك تمام فى كل اللى كتبته
وبلاحظ الكلام فى مدونات كتير
بدخل والقى موضوع عادي جدا وعليه كم كومنتات ضخم
وكلها تتمحور حول
جميل
رائع
ممتاز
معبر جدا

انا عن نفسى لا اعلق الا اذا كان لدي ما اضيفه فى الموضوع

تحياتى

يا مراكبي يقول...

أولا أشكرك على زيارتك الكريمة

ثانيا بالنسبة للتعليقات والمعلقين .. فمن الطبيعي أن نعرف أنها ذات أنواع مختلفة في أغراضها وتتنوع بتنوع أطياف مجتمع المدونين كأي مجتمع آخر

ستجد من يعلق لشرح وجهة نظره المخالفة لصاحب المدونة

وستجد من يعلق كي يلفت إنتباه الآخرين لزيارته .. وهو أمر لابد منه إذا أردت أن يعرفك الآخرين

وهناك من يعلق مجاملة كرد للزيارة وهو أمر إجتماعي غير مذموم بل يوطد أحيانا أواصر الصداقة

والأمثلة لا زالت كثيرة

لذلك يبقى في النهاية بأن نتقبل كل هذه الأنواع طالما إرتضينا أن ننضم لمجتمع جديد كمجتمع المدونين لأنها ستكون موجودة تماما كما توجد كل أنواع البشر في عائلاتنا .. وشارعنا .. ومدينتنا

تحياتي الغالية لك

بيتنا القديم يقول...

الله ياسي محمد !!!!

حائر في دنيا الله يقول...

الله يا سي محمد
كلامك في الصميم
فثقافة المنتديات من الحب في جعل موضوعك الأكثر رد وانت كعضو أكثر مشاركة قد انتقلت تدريجيا للمدونات حتى غطت على اغلب المفاهيم

ونا شخصيا يضايقني ويثير حنقي من يدخل ليكتب شكرا وخلاص
طب شكرا على ايه مش عارف

التعليق الذي يأخذ ويزيد ويغسل في الكاتب هو التعليق الذييجذبني لأنه ينبهني أن هناك أشخاص تقرأ بالفعل ولا تعدي وخلاص
لدرجة أن أحدهم لو كتب بربع جنيه يالب ستجد من يدخل يعلق ويشكر أيضاً

لعله يناله من اللب نصيب

مع تحياتي يا سي محمد

بنوتة من وسط البلد يقول...

والله يا محمد بيه
موضوعك غريب .. انا شخصيا بفرح جدا لما بشوف اى كومنت حتى لو بيقول سلاموا عليكوا
او الله يا بنوتة
وانا ما فهمتش منه حاجة
واغلبهم بشكرهم فعلا على زيارتهم

اصل انت متخيل ان واحد استحمل مدونتى فترة من الوقت وقرا اى هرتلة انا كاتباها وكمان تفضل مشكورا وساب كومنت
ده تبقى حاجة كبيرة كبيرة اوى فى سلو بلدنا يا باشا

بس انا معاك فى ان التعليقات لازم تتوجه انها تكون موضوعية

بس حتى لو ما كنتش موضوعية .. ده لا يجعل منها شي سئيل او مالوش لازمة

اعتذر جدا للاطالة
وشكرا على موضوعك :)

Amira يقول...

فهمت يا سي محمد و التحديث أوضح الكثير

بس سي محمد دي
حتكون لقبك لفتره
طويله
هههههههه

تحياتي الخالصه ليك

و على فكره انا بعلق عندك بس عشان انت بتعلق عندي
ههههههههههه
ههههههههههه

لا طبعا

انا مستنيه جديدك
بجد
عاوزين موضوع كده نتكلم فيه
انا لاحظت انه بالرغم من صداقتنا الا اننا كتير بنختلف
و في رأيي الاختلاف بيخلق تربه خصبه للنقاش و الاستفاده

جبهة التهييس الشعبية يقول...

ايه ده

انت ما بتخشش مدونة وائل عباس؟

ده فيه واحد كان مستقصده يشتمه باقبح الالفاظ

وبعدين نقل عليا ولما قلت له انا عارفة انك من الامن اختفى

وكان فيه واحد تاني اسمه اهل الجنة

كان هاري امي شتايم وكل شوية يدخل باسم واحد تاني ويشتمني لحد ما قلت له قول للسعودية اللي باعتاك تحل عني برضه اختفى

ما اعرفش بيزعلوا من حاجات بسيطة قوي ومش بيزعلوا من الشتيمة مثلا

عموما انا مش بادخل مدونة حد بيضايقني اساسا ولا باعلق عنده

عشان كده بادخل على مدونات اللي باحبهم وباعلق

والله مش بتبقى : الله يا محمد الله يا محمد

رفقة عمر يقول...

بجد انت اتكلمت فى اكتر شئ كان بيغظنى فى التدوين وهو التعليقات المجامله حتى ساعات اشعر انه لم يقرا الموضوع اصلا انا مبسوطه ان واحد من المدونين المحترمين اللى له كلمه مسموعه وسط المدونين تطرق للموضوع دة لان فعلا التعليقات دى مهمه جدا بس لفتح مجالات للحوار والمناقشه علشان كل واحد يستفيد من الاخر ولو لاحظت انى مش بعلق على معظم المدونات كتير لانى ساعات مش بكون فاهمه القصد من الموضوع ايه او يكون موضوع لايستحق التعليق فا مش بحب اضع تعليق نفاق وخلاص علشان ارضى صاحب المدونه وانا بكتب مش علشان انول كلمات الشكر انا عايزة زى ما انا استفدت مما تعلمت افيد كما استفدت وارجو ان يقبلها الله منى

bastokka طهقانة يقول...

فكرتني بالمقطع الظريف ده
فعلا التعليق في الاغلب محلسة و حليطة
بس و فيها اية لو ننقد
هو يعني حيمد ايده يمسك في زمارة رقابتنا

اكتر حاجة بتفرسني في المدونات الشعر العاتفي
تلاقي الشحتفة بتخر من البوست
و مش بعيد يكون صاحبه لابس شبشب حمام و فانلة مقطعة و هو قاعد على البي سي
و يقولك
و سبحت فوق السحاب مطلقا لمعرفش ايه العنان

عيشوا عيشة اهاليكوا بقى

نفسي اكتب السطر اللي فات ده في مدونات كتير

بس طمني الاول البلوجسبوت ده فيه كارت اصفر؟

ماتبقى تيجي

غير معرف يقول...

عاجبنى اوى راى سوسه المفروسه

أصلى بعمل زيها
اللى مابتعجبنيش مدونته مش بعلق عنده أصلا وفى مدونات كتير انا سبتها ولا يمكن أبدا أعلق فيها
وممكن أديك امثلة كتير قوى يعنى
فطبيعى ان اللى بيعجبنى هو اللى بعلق عنده فطبيعى برضه انك تلاقى فى اتفاق أو مديح
ولو فى وجهات نظر مختلفه بقول

بس مش كله مديح ماتقلقش
أكتب انت بس حاجه وحشه وانا هانتقدك
بس كده ؟
;)

ودمت بكل خير وحب وود
سلام

عمرو غريب يقول...

الف شكر علي التعليق الجميل

khaled يقول...

انا معاك فى اهمية التعليق
بس عايز اقلك انه فى معظم الحالات مجاملة
ايوة مجاملة
حتى الزيارات بقت مجاملة
يعنى علشان اربى زبون لمدونتى يبقى لازم كل يوم ادخل مدونتك علشان تيجى ورايا مدونتى و هكذا
:)
بس اقلك
مجاملة لطيفة
و انا جاى اربى زبون
هههههههههههههه
دعوة جميلة منك و اتمنى الاتساء الفهم

Bella يقول...

اتفق معك فيما يخص التعليق

عن نفسي اهتم جدا عند دخولي مدونة بالقراءة ولاأضيف تعليق الا بعد قراءة كل التعليقات المصاحبة للموضوع

ولااعلق الا اذا كان تعليقي سيضيف جديد بخلاف ماقاله السابقون لي في التعليق

يعني باختصار لااحبذ التعليق لمجرد التعليق وخلاص

وعلى فكرة التعليقات المفيدة تفتح في ذهني نقاط جديدة او تجعلني انظر للموضوع من زاوية اخرى
اي ان التعليق اثرى الفكرة

اما المجاملات لمجرد رد الجميل او لإكثار عدد المعلقين وخلاص فلااحبها صراحة.

تحياتي وعذراً للإطالة

Music Gates يقول...

الاول دي اول زيارة ليا لمدونتك و علي فكره من الشكل العام بيقول انها جداو بمعني اصح ليها مضمون لشخص مثقف وطبعا انا مش بقول ده مجمالة بس انا بقول الي شفته مع اني بعيب عليك في شئ اللغه تقيله حبتين يعني انا لو جبت اخويا الي اصغر مني بسنه مش هيقدر يفهم ولا كلمة وبالنسبة لموضوع التعليقات انا كان جالي تاج بتااع ايميلك لما يموت كان في سؤال عن التعليقاتت اجاابتي عليه كانت مختصرهه وكان مضمونها نفس الكلام الي قلته بس انت قلته بشكل افضل مني و الزيارةهتكرر ان شاء الله

حوريه يقول...

مساء الخير
من زمان و انا متابعة موضوعاتك و اؤيدك فى كثير من الاراء و لا اعلق خوفا من ان تعتقد اننى انافقك
لكنى فى هذا الموضوع بالذات اختلف معك لانى اعتقد ان " تبسمك فى وجه اخيك صدقة " ممكن كلمة رقيقة تكون مشجعة لانسان يحتاجها او دافع له على ابداع اكبر ... لكن للاسف فيه ناس ماعندهمش ذوق خصوصا فى حديثهم مع البنات كانهم يقصدون جذب اهتمامهم
مثلا انا فى مدونتى اتحدث عن فكرة رومانسية فهمها الكثيرون لقيت واحد داخل شمال و بدون ذوق بيقول كل اللى كاتبين لك دول منافقين و ما بيفهموش .. طب ليه كده ؟ اضطريت ارد عليه بالمثل ثم تحدثت بذوق و لم يرد
- المهم
سيبك من اسم محمد طه احسن هزعل منك
ده اسم والدى
عايزين موضوع جديد عشان وحشنا التصفيق و النبى
ادعوك لزيارة مدونتى بمكتوب
nadiataha.maktoobblog.com

Amr Ahmed يقول...

الموضوع ده كان من اسباب

ابتعادي فنرة
حسيت انها بقت مجاملة

وعلي فكرة كلبوزة برضو قفلت المدونة لفترة لانها حست بكده

المهم انا بصراحة مقرر اني معلقش عند اي حد الا اذا كنت حاسس الموضوع

حتي لو كان صديق او مدون قريب مني

بس فعلا فيه موضوعات لازم تحيي اللي كاتبها
ودي بتبقي ازمة
لانك عاوز توضح ان الرد بتاعك مش نفاق
لان البوست بيبقي حلو فعلا

اتمني ان الناس تعلق علي اللي تحسه بس

FATMA يقول...

انت حطيت نفسك قصدي مدونتك في خانة اليك
كل اللي دخلو يعلقو بيقولو لك
انا مش قصدي مجاملة قبل ما يقولو ان البوست مهم لازم يقولو الجملة دي
بس لو يا ترى الموضوع معجبش حد هيقولك هو وحش او مش عاجبه
هيسيبك و يمشي
و هيقول انا هقوله وحش هيقولي ايه اللي جابك ما المدونات مفيش اكتر منها
مش عارفة
بس انا ممكن اقولك على البوست لو مش عاجبني انه مش عاجبني
او ممكن اسيبه و امشي من غير ما اسيب تعليق
بس لو عاجبني
هقولك انه عاجبني من غير ما اقولك بعدها على فكرة من غير مجاملة
سلام
اه نسيت
كلامي ده من غير مجاملة

كلبوزة لكن سمباتيك يقول...

تصور انا بتفرج على المسرحية دي دلوقتي حالا على قناة حكايات
art
صدفة مش كده
انا موافقاك على كلامك بس مفيش حل للاسف
غير اننا نقولهم
كفاية يا نفيسة كفاية

koukawy يقول...

هو احيانا التعليقات بتبقي مشجعه حتي لو كانت عبيطه و متزودش و لا تنقص بس انت كمدون لو يوم دخلت ما لقيتش تعليق حتي لو كان مجامله عتزعل و انا كده بس انا عن نفسي ساعات بخش مدونات بلاقي كلام مش عاجبني خالص بعلق ان الكلام ده مش عاجبني و اننا اعارض

الحصان الأسود يقول...

فعلا عندك حق

بعض الهتافين يثيرون الغثيان

وبعض المدونين ايضا ممن يحذفون تعليقات معارضيهم يثيرون الغثيان ايضاً

وتكرر معي الموقف مرات عديدة

واعتقد ان كثير من المدونين يعقلون فقط عند من يوافقونة في الرأي ويمتنعون عن مهاجمة او انتقاد شخصا ما في مجونتة تجنبا للحذف او الهجوم علية وبالاخص من بعض "كدابين الزفة" كما اسميهم

فاصبحت افضل اجتناب المدونات التي اراها سيئة بآراء مدونيها واجتنب حتى التعليق فيها

ولكن اهتم بمدونات الاصدقاء المحترمون الذين اعتدت على زيارتهم وزيارتي و يتقبلون النقد بصدر رحب
طالما لم يخرج عن حدود الادب والذوق

واتعجب ممن يدفنون روؤسهم في الرمال و يرفضون سماع الرأي الآخر و يحذفونة مع انة اهم بكثير من سماع تصفيق المهللون وكذابين الزفة

تحياتي

saso يقول...

ولو دخلت علي بوست يتفق تماما مع رأيك ؟ هل ستغلق الصفحة بدون اشارة لاتفاقك مع سطور الكاتب
او نص أعجبك ستغلقة بعد ان تقرأ دون ان تذكر لصاحب النص انه جيد

ربما يكون النص سخيف بالنسبة لك -يحدث هذا معي كثيرا -والمعلقون كثر ويرون انه جيد ..ربما تكون مجاملة وربما يكون رأيهم الخاص

في كل الاحوال لست مسئولة عنه، وليس علي سوي ترك تعليقي او عدم التعليق علي الاطلاق

اذن المسالة شخصية بحتة، ماهو جيد بالنسبة لك ويستحق الاشادة ربما لا يستحقها بالنسبة لي والعكس

BinO يقول...

طبعأً انا مينفعش بعد اللي انت قلتله أوافق علي اللي أنت قلته
يعين انا مبسوط طبعاً
الناس تروح وتقول الله ينور
وناس تقول أحسنت
وعظمة علي عظمة
وناس تقول وحشتوني
يعني لازم اهبد تعليق وخلاص
:)
انا مش موافق علي اي حاجة من اللي انت قولتها
أنت بتفتري علي الناس
مش كفاية انهم بيعبرونا
:)

وعظمة علي عظمة يا سي السيد

Dananeer يقول...

بص يا محمد
معاك و كلامك كويس جدا

بس ساعات كتير بتلاقيك قدام حاجه أثرت فيك
و مش لاقى كلام
فى نفس الوقت مش قادر تمشى من غير ما تعرف صاحب الحاجه انها علمت فيك

مش عارفه
يمكن انا واحد من الناس اللى كتير مش بالاقى كلمات اوصف بيها قرايتى لحاجه اثرت اوى علمت فيا
بالشكل المثرى اللى بتتكلم عنه

عارف لو خلو فى البلوجات ايكونز متحركه
حاجه كده زى لمعه عيون دموع ضحكه حضن
:)

-_- يقول...

الله عليك يا سي محمد

:)))


مش لازم نحجر على الناس و نقولهم يا اما تفيدونا يا اما بلاش .. التعليق في حد ذاته بينبهك هل موضوعك على طريق الاستحسان ام الاستياء

ثم بعد ذلك نأتى للنقطة الاضافة او المناقشة

لكن لا بد من كلمات مثل الله عليك يا سي محمد او اخص عليك يا سي محمد

و دمتم بخير يا سي محمد

Unknown يقول...

بص يا محمد
انا مش جاي اعلق عندك علشان تعلق عندي ولا حاجة انا جاي اعلقلك علشان انا عاوز اعلقلك

عموما متنساش تيجي تعلق عندي
ههههههههههههههههههه
تحياتي يا جميل
تامر العفيفي

... يقول...

بص يا سى محمد
انا باعلق تضامناً مع رأيك
رغم ان التعليقات جزء مهم جدا من التدوين
ربما اكون انتهجت نهجا آخر
وكل ما اود قوله .. على جنب كدة
وضعته فى اماكن اخرى غير صفحتى الرئيسية
اهتم فيها ايضا بالتعليقات
لكنى ادع غيرى يقيم فقط
وخاصة انها لا تثير موضوعات
ولا تحتاج مناقشة
تحياتى لك

محمد عبد الغفار يقول...

يما يبدو ان مقالى اثار من الإختلاف اكثر مما اثار من الإتفاق فأعتذر عن التعقيب

ولمن لم يستوضح وجهه نظرى كما هو بادى فى غالبيه التعليقات عليه قراة ما كتبت بتأنى ولا سيما التحديث الأخير

وتحياتى واحترامى للجميع