الأحد، 11 فبراير، 2007

لاوازع . . لا رادع . . لا تعليق


      تتناول هذه الأيام هالة سرحان على ثلاث حلقات فى برنامجها بقناة روتانا حكايات لمن زعمت انهم فتيات ليل محترفات ، بعد فتره دعايه مهولة وقد تناولت الموضوع الأخت تمر حنة فى موضوع لها تحت عنوان واحد سيجوريا وأنتقدت فيه الحلقات بشدة ومعها كل الحق

المدهش فى الأمر التطور الجديد المفاجئ الذى لم يكن لا على بال ولا على خاطر رغم انه غير مستبعد فى كل أحداثنا حيث طلع علينا برنامج 90 دقيقة تقديم معنز الدمرداش ومى على قناه المحور بحلقة يوم امس السبت 10/02 بموضوع للحلقة مفاده ان القصة عبارة عن تلفيق فى تلفيق و أستضاف البرنامج الثلاث فتيات اللائى مثلن دور فتيات الليل فى حلقات هاله سرحان ليروين قصصهن الحقيقية

ثم فى عدد اليوم الأحد 11/2 بجريدة المصرى اليوم خبر مفصل (أضغط هنا) يؤكد ويروى تفاصيل الواقعة
_ _ _ _ _ _ _ _ _ _ _ _ _ _ _

تطورات الأحداث

قرر المستشار عبد المجيد محمود النائب العام مساء الأحد 11/2 فتح تحقيق قضائي موسع، حول حلقة برنامج هالة سرحان الخاصة بفتيات الليل وما بثته قناة «المحور» في برنامج «٩٠ دقيقة» منسوباً لهن من أن هالة سرحان دفعت مبالغ مالية لهن، مقابل الإدلاء ببيانات ومعلومات كاذبة ولتفاصيل الخبر بجريدة المصرى اليوم أضغط هنا
ز

هناك 26 تعليقًا:

غير معرف يقول...

تابعت هالة سرحان منذ زمن طويل من ايام كان ليها عمود في صفحة الفن "جريدة الاخبار علي ما اذكر اعجبت بطريقة كتابتاتها عن المراءة وكنت متابعة لعمودها اليومي ولا اعرف ماذا اصابها "الشايب لما يدلع" عموما معروف للجميع انهم فتيات لسنا فتيات ليل ففتات الليل لا تضبع وقتها في الظهور مختفية لبضع ساعات وتتحدث بصراحة عن سقوطها معظم برامج الحوار علي الهواء للاسف مواضيعها متفبركة اقول لل فتيات الثلاث لا تلومن الا نفسك فانت قبلتي فمابني علي غلط فهو غلط هالة

Pakinam Nasser يقول...

انا كمان تابعت الموضوع ده و قرأت المقالة التى نشرت فى المصرى اليوم عن تلك المأساة ، انا مش عارفة اولا بالنسبة للبنات دول الواحد من المفروض ان يشعر تجاههم بالقرف و الاشمئزاز ولا يتعاطف معهم لانهم اضطروا للجوء لتلك الوسائل الرخيصة من أجل توفير لقمة العيش،

ثانيا يمكن تكون خارج الموضوع ، استاذ محمد انا فعلا مش عارفة اشكر حضرتك ازاى مش بس على تعليقاتك الرائعة التى كتبتها فى مدونتى و لكن لاهتمامك و قرائتك اكثر من موضوع ، و تعليق حضرتك اسعدنى جدا بالذات بعد لما رايت مدونة حضرتك، انا لسة الحقيقة بقرا فيها و لكنها تدل عى ثقافتك .. اشكرك مرة أخرى و اتمنى ان تتابعنى دائما لاستفيد.

باكينام ناصر

LAMIA MAHMOUD يقول...

لاء هي الاخت اصلا سواء تلفيق ولا جد تقعد ساكتة وتتلهي .. يعني والله اخر حاجة تعملها انها تناقش قضية مجتمع او قضية متعلقة باي حاجة .. هي اخرها تستضيف خالد ابو النجا وهاني سلامة عشان تدلع فيهم .. منتهى الاستفزاز

te3mah يقول...

كنت ناوية أعمل موضوع في مدونتي عن الفضيحة دي
بس حسيت إنها ماتستاهلش

هالة طبعا إللي ماتستاهلش :)

daktara يقول...

يا عم ايه القرف ده
انا قول لما فتحت المدونة قرفت وجالي غثيان وكنت هارجع علي شاشة الكمبيوتر وكنت هاقفل المدونة قول لما شفت صورة الشمطاء هالة سرحان
بس لان انت حبيبي قلت اقرأ انت كاتب ايه
لمن العنوان فيه الخلاصة والموضوع فعلا لا دين ولا اخلاق ولا رادع

الدبور يقول...

ياااة تصدق انا كنت نفسي اشوف الحلقات دي
كويس انها طلعت متفبركه
ورايي ان هاله سرحان لم تحترم المشاهد فلم يحترمها هو
دي عجوزة متصابيه ياباشا

تحياتي
الدبور

ahmEd_H يقول...

من ايام هالة شو على قناة دريم و انا لاحظت مدى الهيافه و السطحيه اللى بتستخدمها هالة سرحان فى ادارة حوارتها وفى اعتقادى ان النوعيه دى من البرامج بتساعد فى تلويث الدماغ ليس اكتر و اكيد ماستغربتش لما عرفت موضوع البنات والتلفيق لانى كنت معدى من قدام التليفزيون و سمعت الحكايات و مصدقتش بس زى كل النايس كنت مخنوق من طريقة الكلام البجحهللبنات و انا شايف انهم يستهلوا اللى حصلهم لانهم لما كانوا بيتكلموا كانوا بيلوثوا سمعة بنات شعب بالكامل و زى ما قال عبد الفتاح القصرى من حفر بير لاخيه تزحلق فيه

فلة يقول...

روتانا سينما
هو انت لسه شفت حاجة

harmless يقول...

يا ترى احنا زعلانين ليه؟

عشان هالة شخصية مستفزة

عشان الفاظها خارجه ومواضيعها غير لائقه

عشان اهدافها من برامجها غير موضوعية وتهدف لافتعال ضجه وادراك شهرة

عشان ضحكت علينا وفبركت الموضوع

ولا

عشان فاكرين ان الموضوع ده تاليف وافترا ومش موجود فى الحياة

منذ سبع سنوات اشتركت من خلال مؤسسه ثقافيه فى بحث عن نفس الموضوع
ورأيت وعشت واندمجت وسمعت من القصص ما لم يكن ممكن ان اصدقه

احذروا ان تظنوا انكم عينه مثالية للمجتمع وتقيسوا عليه ما تقيسونه على انفسكم

كل شخص فينا بكل معارفه واقاربه واصدقاءه هو تعبير عن شريحه واحده فقط وهو لايدرى شيئا عن الاف الشرائح الاخرى فى العشوائيات فى الارياف فى الصعيد فى النوبه فى الصحراء الخ الخ

اقسم بالله لن تتخيلوا كيف قهر هذا المجتمع الملايين حتى تشوهوا وتلفوا وضاعت نخوتهم وشجاعتهم وقيمهم ومثلهم وصاروا نفايات ادميه

مصر هى أمى يقول...

محمد
انا متشكر اوى على زيارتك عندى
طبعا انا من اكتر الحاجات اللى بكرهها ونسيت اكتبها عندى
هالة سرحان
انا مش عارف الست ديه عاملة كده ليه ولا بتحترم سنها ولا وظيفتها ولا اى حاجة وكا قناة تروحها لازم تخرج منها بفضيحة
يعنى حتى لو البنات اللى جابوها بنات ليل فعلا ايه لزمت الحلقة اصلا
يعنى فى الوقت اللى الواحد مش لاقى ياكل ولا يعيش اما يلاقى واحدة تقول انها بتكسب 10 الاف جنية فى الشهر البنت الغلبانة اللى مش لاقية شغل هتعمل ايه
هالة هانم مفكرتش فى شعور الناس ديه
احسن عقاب لهالة انهم وقفوا البرنامج

amany يقول...

عادى يا محمد كل حاجه فى بلدنا ممكن تتلفق .وبعدين بنات ليل ولا مش بنات ليل المفروض المشاهد يعملهم ايه ؟يقول استغفر الله العظيم.ولاالبنات تعتبرهم قدوه وتقلدهم ايه الهدف من البرنامج عموماوكمان فين الاعلام الهادف اللى بتقدمه ست هاله هانم؟؟؟؟؟

whyme يقول...

للاسف هاله سرحان عملت زى الحكومه بالظبط

فهى بدل متتعب نفسها و تجييب ناس بجد
راحت فبركت حكايات اغلبها بتحصل فعلاً

بس ده ميبررش انها تضحك على الجمهور و تستغفله زى الحكومه بالظبط
و انا رأيي لو اتحكم عليها بالسجن مثلاُ هيبقى ظلم كبير لانها ممعملتش حاجه بالنسبه للى بتعمله الحكومه كل يوم

ماهى بايظه بايظه
تحياتى
واحد مقتنع اننا عايشين فى كدبه كبيره
و مبقيتش تفرق

قاسم أفندي يقول...

عبد الغفار
طب ممكن نسأل مذيعة زي دي نجحت ازاي؟؟
مش برضه الجمهور عايز كده؟ ولا تبرر بأيه نجاحها الباهر بشهادة مبيعات الأعلانات في برامجها؟؟
صدقني يا عزيزي أنها جزء أساسي من منظومة هبوط الذوق العام وانهيار المبادئ والأخلاق في بلدنا والعالم كله زيها زي أي مطربة ساقطة كل مؤهلاتها جسدها العاري
مش برضه بيشار اليها لامؤخذة بالبنان؟؟
هو مش تامر حسني المزور الهربان من خدمة الوطن طلع أنه شهيد الوطن وأحنا اللي مش بنقدر؟
يا عزيزي كلنالصوص
بكرة هتلاقي مظاهرات بتطالب بالافراج عن هالة .. ويفط بتقول كلنا بنحبك يا هالة
حاجه تقرف
يجعله عامر ومتشكرين ع التاج

أحمد شعبان يقول...

مساء الفل
تعليقي يمكن مالوش علاقة بالبوست
إنما حابب أحييك على بلوجك الجميل دا

أممم

والله ليه لأ؟
بأقولك إيه ياجميل.. كنت جاوبت تاج زي اللي انته جاوبته آخر مرة، وكتبت تاج بعديه حابب إنك تجاوبه.. إيه رأيك؟

بص عليه.. والإجابة مش إجبارية عشان مااخسرش صداقة لسه حاتبتدي
ليلتك فل

يا قلبي يا غريب يقول...

السلام عليكم ..اولا انا احترم جدا كلامك و اجدك متابع جيد للمدونات الشيقه و رئيي في الست دي انها ينطبق عليها قول ربنا سبحانه و تعالي...إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ [النور : 19] و لا نعطيعا اكبر مما تستحق ولكل واحد عقل يميز به الخبيث و الطيب هل انسان عاقل يعتقد انه ياخذ الخير و النصح من جهاز فاسد مثل الاعلام من تصور هذا فانه يستحق ما يراه...علي انا لسه جديد في عالم التدوين و عايز اعرف ازاي انزل صوت في المدونه ان تكرمت يلا هتاقل عليك يا بشمهندس ..تحياتي

كلام لوجيك يقول...

بصراحة يا محمد انا الست دي لا اعترف بيها كمذيعه ولا احترمها ابدا
برامجها بتقوم على السفاهة والسفالة
وتضخيم ذات الضيف الى حد الانفجار
مهما كانت ضآلة واضمحلال هذا الضيف سواء من القيمة الفنية او الثقافية او الادبيه
تعتمد على ادخال فقرات راقصه خلاعية ليس لها داع وسط كل برامجها الحوارية
وتنتهج على الاثارة والمواضيع التى تدخل فى المنطقة الحمراء المحظورة
وكأن الحرية لا تتم الا بالدخول فى هذه المواضيع الوقحة والغوص فى اوحالها المقززة
لقد كانت جرعاتها الهابطة قليله وشيئا فشيئا صارت تزيد من هذه الفقرات الفاجرة والمواضيع الخارجه حتى يعتاد الناس على مثل تلك الاشياء وتصبح عادية
وهكذا ينتشر بين الناس الاعتقاد بأن مجتمعاتنا اصبحت كلها هكذا واننا دخلنا فى اخر درجات الانحطاط فى سلم الحضارة

كفاية كده عشان انا اتفقعت

دمتم جميعا بخير

Fancy يقول...

اعتقد ان الغلط ليس على هالة سرحان وحدها

هى لم تضغط لاحد على زر الريموت كنترول و تجبرنا على مشاهدة روتانا سينما بلاش تغمض عينيك لاتاخد بمبة

اذا لم يشاهد احد برامجها لن تأخذ كل هذة الشهرة

ببساطة نحن اعطيناها الحق فى ان تدخل بيوتنا من خلال تلك القناة لماذا الان الاعتراض على ما تقدمة

بسهولة جدا غير المحطة

فنحن غير مجبرين على مشاهدة تفاهتها

اما عن الفتيات اظن انهم ايضا لم يتم اجبارهم على تقديم تلك الحلقة

القانون لا يحمى المغفلين

Sampateek يقول...

نفسي افرح في الست دي و اشوفها مشرفة على البرش جنب الساقطات و بائعات الجسد و تبقى تعمل معاهم لقائات زي ماهي عايزة
كل سنة و انت طيب يا محمد عبد الغفار و الله عبد الغفار
متزقش
:)

شــــمـس الديـن يقول...

مممم

لا استبعد علي واحدة بتقولوا عليها انها بتتناول الموضوعات دي انها تكذب ... فان لم تستحي ففعل ما شئت


و معلش الرأي اللي بيقول ان الجمهور عايز كدا ... معلش دي انسانة بتخاطب الغرائز فقط ... و علشان اغلب جمهورنا سطحي , فبينساق ورائها ... يعني حد يقدر يقول ان افعلا ايناس الدغيدي مثلا مش ناجحة . ولا ان الجمهور مش عايز كدا ... بس لو سيبنا الموضوع للجمهور ثقوا ان القيم فعلا هتنهار بمرور الوقت و ما كان مستقبحاف ي الماضي سوف يكون عاديا جدا في الغد القريب


الحمد لله اني معنديش دش !!!

حسن محمود يقول...

ماشاء الله ياشمس الدين
بس يابنتى الدش فى حاجات تانيه غير الوليه الهايفه دى
أنا برضه لسه مركب الدش قريب
الواحد حس انه شاف العالم ياستى
والله عمرى ماشفت البرنامج بتاعها خالص ولا هاشوفه

بس مش لازم نحبس نفسنا فى قوقعه عالشان خايفين من الدش
على كل حال انا مش بتفرج عليه كتير برضه

وشكرا يامحمد باشا على الموضوع
ان شاء الله نسمع خبر انها اتسجنت قريب مش يقبضو على الست هويدا ويسيبوا الست دى

شــــمـس الديـن يقول...

اخي الفاضل حسن محمود

:)

تقريبا انت فهمت موضوع اننا مش عندنا دش دا تقريبا و الله اعلم كنوع من التشدد او التقوقع ... بس هقول لك حاجة بجد و بدون مبالغة ...
احنا اتربينا علي رتم حياة سريع جدا لدرجة انه فعلا وقتي معادش فيه مكان غير ان الواحد يتفرج علي فيلم اجنبي كويس كدا كل كام اسبوع كنوع من تغيير الجو :)

التليفيزيون عامة بحس انه بيجيب تخلف عقلي و بيخلي الواحد قاعد زي التنبل مش بيعمل اي مجهود في تلقي المعلومة ...و بفضل اني احصل علي معلوماتي يا من محاورات الناس مباشرة يا من النت يا من كتب اشتريها بنفسي لكتاب ثقات يا اما اروح اسمع ندوات بنفسي ... مش تقوقع و الله خالص ...

هي يمكن طريقة تربيتي اساسا هي الليمختلفة بعض الشئ لكن اعتقد انها ابعد ما تكون عن التقوقع ...
هي المشكلة كلها في الوقت ... لو ينفع اشتري الوقت و اخلي يومي 50 ساعة كنت بقيت مبسوطة اوي

دمت اخي في حفظ الله و امنه

koukawy يقول...

عارف المثل اللي بيقول لبس عمة ده لده00
اهو انا احساسي بيقولي ان الموضوع فيه شئ ملفق لهاله سرحان 00
بس الله اعلم00 لأن ايه الجديد 00 ما هي طول عمرها قليلة الأدب 00
و يعني هي الحلقات اللي كانت بتلم شوية ستات مقاطيع و يجيبوا راجل و يبهدلوه هي اللي كانت حلوه اوي 00
و بعدين لو واحد غبي و عنده ديل كان هيعرف من الأول ان الحلقات بتاعت بنات اللي تمثيل 00
فيعني هما اتفجؤا ليه 00
ما كان غي قبلهم حلقات المدمنات 00
و بعدين حلقات بنات اللي دي مش جديده
هما الظاهر عايزين يلبسوها حاجه و ياريت انا مش بحبها اصلا

Mohamed A. Ghaffar يقول...

أعزائى جميع الزوار سعدت بكم جميعاً وبتجاوبكم والذى اتمنى ان يستمر وارجوات من الله ان اكون عند قدر المسؤولية ، وبعدين مش قلت لكم لا تعليق

الموضوع مش مع او ضد ، ولا كذب ولا صدق ن ولا ده بيحصل ولا مبيحصلش

الموضوع ببساطه ان الناس دى معدش عنها أى وازع ولا اى رادع يمنعهم عن شيئين
الأول . . انتهاج ممارسات قذره فى للوصول للنجاح بأى شكل ووسيلة وهذا شأنهم
الثانى . . أستحمارنا واحتقارنا والأستخفاف بنا لأقصى الحود وهذ شأننا ولهذا اردت فضحهم

بقى ان اضيف أنه لم يعجبنى فى مجمل التعليقات شيئين (معلش استحملونى)وهما
الأول . . نبرة الشماته لدى البعض
الثانى . . تمنى أذيتها والإستمتاع بذلك لمجرد انها أرتكبت خطأ ما

دوللي يقول...

كنت في يوم بتفرج علي برنامجها عادي وطبعا مش لأنه مهم و لكن لمجرد التسليه بمشاهده تفاهات الحياه وفجأه0000000 الكاميرا جابت شويه بنات بصراحه لابسين قطع بسيطه و اولاد عاملين حاجات غريبه و شاورت و قالت0000 هو ده بقي الشباب المصري 000000000 بصراحه انا صوعقت و بصيت لنفسي في المرايا و افتكرت شكل اصحابي و اخلاقهم و قلت 0000ازاي طيب ما احنا مش كده و معظم البنات محجبات او محتشمات و رجالتنا رجاله بجد و تعبانين و طالع عينهم يبقي ازاي تقول كده وليه الهوجه اللي حصلت ما تناولتش الموضوع ده افتكر ده اهم بكتير لأنها كده بتشوه صوره الشباب المصري امام عالم بحاله وبجد الشباب مايستاهلش كده0

lonely يقول...

انا من اشد الناس كراهيه لهذه المخلوقه التى تدعى هاله سرحان
وعمرى ما فكرت اتابع اى كلام هى بتقولو لانها وكل اللى بتقدمه مجرد تفاهات ودعايا رخيصه لناس ما لهاش لزمه
والاسم انها بتناقش القضايا
انا افتكر انها كانت بتتكلم عن الدين ومستضيفه ايناس الدغيدى وعبير صبرى
بصراحه كان نفسى اكسر التلفزيون بس قلت خسراه فيهم
وبالنسبه لموضوع الحلقات اللى اثار القلق دا كله
سواء كانوا فتيات ليل او لاء اظن دى موش مشكله اساسا لانهم لو موش كدا ما كانوش قبلوا على نفسهم انهم يطلعوا يقولو كدا مقابل مبلغ مادى دول اكيد اسوء من فتيات الليل كمان
المشكله فاننا ننشر غسيلنا اللى موش نضيف ادام الناس فى الفضائيات ونشوه سمعة بنات مصر كلها اكتر ماهى متنيله
موش كفايه الافلام والمسلسلات اللى ما بتنقيش الا النماذج السيئه وتتكلم عنها وكان مصر كلها ما فيهاش شاب ولا بنت محترمين
وفى الاخر لو حد فينا مسافر اى دوله عربيه هيعرف هما بيبصوا لينا ازاى على ضوء اللى الفن عندنا بيعرضوا عنا
والله اللى احنا فيه دا خيبه بكل المقايس

عمرو غريب يقول...

هالة سرحان لوثت سمعة مصر والي كان كان والف شكر علي تعليقق في مدونتي اخوك عمرو