الأربعاء، 10 يناير 2007

ولن تصل للحقيقة أبداً


سفـاح المعادى

وقت انتظارنا للصلاة الظهر او العصر فى عملى يكون وقت المناقشات وتبادل اخر اخبار عالم الأعمال والسياسه والدنيا بأسرها ، بادرنى اليوم صاحب العمل فى وقت صلاه الظهر بسؤاله "سمعت عن سفاح المعادى" ففغرت الفاه دهشه وكان هذا دعوه مفتوحه ليستكمل حديثه خاصه وان احداً من الحضور لم يظهر انه يعلم شيئاً عن الموضوع برمته فإستطرد قائلاً ان برنامج القاهرة اليوم والمذاع على قناه اوربت المشفره تناول فى أخر حلقاته هذا الموضوع والذى يتلخص فى أن أحدهم يترصد النساء والفتيات قاطنى المنطقة ممن يرتدين البناطيل الديقة ويعترضهن ثم بأداه حاده يبقرهن من منطقه التناسل والى هنا يبدو الأمر كإشاعه

ولكن المسئول الأمنى اعترف بوجود اربع حالات فعلاً فيما اوضحت المكالمات التليفونية الواردة للبرنامج ان العدد قد يزيد عن اربعين ضحية واجهن نفس المصير ، وناشد المسئول الناس وطالبهم بعدم الفزع وممارسه حياتهم الطبيعية حيث ان الأمر لا يشكل ظاهره ولا توجد خطوره ، واوضحت المكالمات ان الكثير من اولياء الأمور شرعوا فى الأحتياط للأمر وبدأوا بالفعل منع فتياتهم من الذهاب الى اشغالهن وكلياتهن ومدارسهن
وبدأت المناقشات فمن الحضور من دفع بمنطق "يستاهلو"ا وهو ما ارفضه ، ومنهم من دفع بان الغضب والحنق قد بلغ بالجميع مبلغه "ومعه كل الحق" مما قد يدفع بالكثيرين للأتيان بتصرفات هستيريه قد لا تكون مبرره من حيث المنطق ، ودفع العبد لله بانى فى مثل هذه الحوادث استبعد دافع الغضب حيث اعتقد ان مبلغه لم يصل بعد لحد هذا الإنفجار الهستيرى رغم وجود بعض الحالات الفرديه السابقه التى قد تدل على ذلك وقلت انى اعذى معظم هذه التصرفات للعمل المخابراتى سواء كان القائم بالعمل الجهاز القومى لأسباب ودوافع لا يجهلها احد أو كان القائم بالعمل جهاز معادى لأسباب ودوافع لا يمكن ان يغفلها احد

ونخلص فى النهايه لعدة رؤى
أولاً . . إن كان عمل فردى هستيرى فليس من مسئوليه ولا طاقه وزاره الداخليه منع مثل هذا الحدث قبل وقوعه لا فى بلادنا ولا فى اكثر بلاد العالم تقدم ، ولكن دورها ينحصر فقط فى بذل كل جهد للوصول للمجرم وتقليص عدد الضحايا قدر الأمكان فضلاً عن إظهار الجديه القصوى للجماهير والشفافيه المطلقة فى التعامل مع القضية حتى يعم اكبر قدر من الشعور بالأمان داخل المجتمع رغم الخطر المتربص وهو ما اعتقد انه لم ولن يحدث

ثانياً . . حان وقت الأعتراف ان مجتمعنا تغير بصوره حاده لابد من الوقوف لدراستها وتحليلها وإلا سنصل لما هو ابشع ، وهذه الوقفه والمراجعة إن جاز التعبير ليست فرض كفايه يقوم به الصفوة ويسقط بذلك عن الباقين وانما أحسبه فرض عين على كل فرد يحمل عقل يعمل فى رأسه

ثالثاً . . سيرتفع الحدث الى عنان السماء فى وقت قصير جداً وسيغترف منه وينهل كل طامع وطامح لمكسب ما دونما اى نية او دافع مخلص للحل فقط تحقيق اكبر قدر من المكاسب ولا يستثنى من ذلك احد على الصعيد السياسى والدينى او حتى التجارى

رابعاً . . ستخبوا نار الحدث بعد قليل بفعل الوقت او بفعل صعود حدث اخر الى الصدارة وقد يكون بالقبض على من سيسمى بالمجرم السفاح دون ان تصل أنت أو انا أو اى فرد فى المجتمع للحقيقة
_ _ _ _ _ _ _ _ _ _ _ _ _ _ _ _ _
تحديث
تنشر جريدتى الأهرام والأخبار فى عدد اليوم 11/01/2007 تكذيباً للخبر وتأكيد على انه مجرد شائعات . . . ولن تصل للحقيقة أبداً

تحديث
تراجعت جريده الأهرام عن تكذيبها السابق للخير ونشرت اليوم 13/01/2007 أعتراف بالواقعة زكرت فيه ان عدد الضحيا لم يتجاوز اربعة فتيات فقط تتراوح أعمراهم بين 10 - 17 سنة من قاطنى منطقتى البساتين والمعادى الجديدة
ثم فى مساء اليوم افرد برنامج 90 دقيقة على على قناه المحور جزئ لا بأس به من وقته لهذا الموضوع فى كلام شبه معاد لما نشر فى الاهرام ومحاولات مستميته للتأكيد على ان الحدث ليس بالخطير . . . ولن تصل للحقيقة أبدا
ً

هناك 19 تعليقًا:

غير معرف يقول...

يبدو ان العصى تقترب منك يا عسل

حائر في دنيا الله يقول...

لا أدري هل ما تتحدث عنه حقيقة بالفعل أم ماذا
ولكن بالفعل تحليلك رائع جدا ومنطقي وواقعي وحدث ويحدث في كثير من حوادثنا وآخرها أحداث وسط البلد
لأنه ببساطة لا يوجد من يتوقف حتى يدرس ويعالج
أو بمعني أدق ليس هناك من أحد لديه الاستعداد أساسا

nooooooooooo يقول...

حاجة تخوف يارب تكون اشاعات

غير معرف يقول...

موضوعك جميل واسلوبك بسيط جدا بس اتمني تكون اشاعة بس احب اطمنك طالما الصحف كدبوها تبقي صح الصح ربنا يستر

غير معرف يقول...

الوقت ده كل حاجة تسمعها لازم بيكون فيها جزء من الحقيقه ومع الوقت كل حاجة هتتكشف
وعموماً اللي بيحصل دلوقتي ممكن يكون افظع 100 مره من سفاح المعادي وربنا يستر

ALiaa يقول...

أنا بقي شايفة انهم عايزين يحيوا من جديد حدوتة القاتل اللي بيقتل ناس كتير أو عايزين يثبتوا تمدنهم عن طريق ظهور سفاح علي غرار السفاح الأوروبي شديد الذكاء و لا يمكن الايقاع به ... و طبعا مش هيحصل كدة لأن البوليس المصري غبي بما فيه الكفايه عشان يوقع بحرامي موتوسيكلات....و الأغنية دوختني و عايزة أدخل أنام
ZzZ

Yasmine Adel Fouad يقول...

انا صاحبتى فى المعادى جنب المكان اللى بيحصل فيه الحوادث و حكيتلى فعلا
دلوقتى اخواتها بيوصلوها الشغل و يجيبوها
بس هى قالتلى فعلا انهم 4 حالات

ربنا يستر
سيبك من كلام الاعلام مامنوش فايدة

frozen love يقول...

ومن امتى بنوصلها....في اي حاجة!!

محمد عبد الغفار يقول...

أسامه جمال
ولا يهمنا يا باشا ، العصى للجدعان وبعدين انت اول اسم هينكتب فى الورقه اللى هيدوهالى فخاف على نفسك وأدعيلى انها تفضل بعيد

حائر في دنيا الله
ولن يدرى احد يوماً ماهي حقيقة هذا الأمر ، ولك عظيم الأمتنان لزيارتك وثنائك ولن يردس أحد او يهتم بالدراسه لأن الأستعداد الغائب موجه الى امور أخرى

Fancy
ربنا يجيب العواقب سليمة ويحمى بناتنا من اى ضرر وانتهز الفرصه دى عشان اقلك منوره المدونة دائماً يا نانسى ، وعاوز اقلك ان مدونتك وكتاباتك للاحسن ومعجب بيها اوى ويارب دائماً

Anonymous 1
شرفت المدونة ، وعندك الف حق وحق ومتشكر اوى على الأطراء وربنا يقدرنى اكون عند حسن الظن دائماً

Anonymous 2
يسمع منك بقك ربنا ونكتشف حقيقة اى شئ فى اى يوم ، وشرفت المدونة

ALiaa
متشكر اوى على متابعتك المستمرة ، وعلى فكره هتلاقى تحليلات يامه للموضوع بس الحقيقه فين محدش هيقدر يعرف اما بالنسبة للبوليس فهو ذكى جداً بس فى حاجات حاجات ولو الأغنيه تعبتك الغيها يا فندم

أنـــا حـــــــــرة
ده الموضوع جد بقى اهه ، ربنا يحميها ويحفظهى وشكراً على الزياره واتمنى تتكرر

frozen love
الزياره الأولى واتمنى الا تكون الأخيره ، وفعلاً انا مفتكرش ان فى سابقه لمعرفه الحقيقة

محمد عبد الغفار يقول...

متشكر جداً جداً على الأيضاح والتصحيح ، وياريت الغلطه دى متمنعش زيارتك للمدونه مرعه تانيه وثالثه

nooooooooooo يقول...

اشكرك جدا يا محمد

انا مبسوطة ان المدونة عجبتك رغم انها مش على مستوى مدونتك خالص و حتى اسلوب الكتابة مش اد كدة

على فكرة انا ل يوم افتح مدونتك و مفيش جديد من يومين
منتظرين الجديد ياريت ماتغبش علينا

Memo يقول...

ربنا يسترها علينا و على بناتنا يا رب الااشمعني البنات صحيح

غير معرف يقول...

مش قولتك طالما كدبوها تبقي حقيقة في البيت اللي هو مبقاش بيتك ضحكوة علينا للمرة المليون وبيقولوة اطمنوة تعرفوة لية علشان الناس دي مش بتمشي في الشارع زينا وبناتهم معاهم البودي جارد في كل مكان يعني عامة الشعب مش مهم وكلة تمام وربنا يجعلة عامر بالسفاحين والحرامية والنصابين وكلة بيضحك علي كلة

Ahmad Hegab يقول...

تحميل الضحية السبب علشان اللى هى لبساه هو فى اعتقادى شئ مقرف و طبعا مادام الحكومة كدبت يبقى الموضوع صحيحو اظن ان الموضوع فردى و مش ظاهرة ولا حاجة بس يا ريت وزارة الداخلية تحاول تعمل حاجة بدل ماتجيب واد اهبل و تلبسه الموضوع

غير معرف يقول...

مين قالك ان هذا ال حديث صحيح

Amira يقول...

اعجبني مقالك
.وطريقة تحليلك للموقف

فعلا مصر تغيرت و الإحساس بالأمان صار معدوما

أعجبني جدا التحديث
و الإيضاح بدون تعليق من جانبك على الحال الذي وصل إليه إعلام الحكومه

هل تعلم أني توقفت عن شراء الصحف القوميه

خساره فيهم الفلوس
:)


على أية حال أحييك

محمد عبد الغفار يقول...

fancy
مش هنعد نرد المديح والمجاملات لبعض على الهواء فهطنش الحته دى ، حكايه الجديد دى بقى عاوزك تعزرينى انت وكل زوارى الأعزاء عشان انا دلوقتى فى عز موسم العمل ومش فاضى اهرش انا فاتح المدونة بقدره ربنا

ميمو
أنا دخلت عندك بدايه جديده فى منتهى القوة ، شرفت بزيارتك وياريت تتكرر وربنا يستر علينا كلنا

مجهول الهوية
عندك حق من اول لحظه ومقتنع بكل كلامط الاسبق والحالى متشكر على المتابعة

أحمد
عندك حق ، فالخطأ لا يبرر الخطا بأى حال ، والغريب ان كل الناس بيظنوا فى الحكومة نفس ظنك ومقتنعين بالسيناريو اللى انت أفترضته

مجهول الهوية
ومين قالك انه مش صحيح ، لا حد يعرف ولا هتقدر يعرف وده اللى قصده من المقال كله

فريدة
معجبه بمقالى وطريقة تحليلى، دا انا عديت بقى على كده متشكر اوى على المجاملة
وعلى فكره مبيعات صحف الحكومه فى النازل بإستمرار مش انت بس اللى مقطعاها

كلبوزة لكن سمباتيك يقول...

اعزائي القراء لا تفزعوا فقريبا جدا سيتم القبض على احد المعتوهين و يتهم بالقضية و نقف نصفق لشطارة البوليس المصري العبقري الذي يستطيع القبض على كل معاتيه مصر و تلفيق قضايا مصيرية لهم


الحل هو تركيب غطا حلة لك بنت رايحة المدرسة لحد ما ربنا يفرجها


شر البلية ما يضحك

كلبوزة لكن سمباتيك يقول...

ان شاء الله قريبا سيتم القبض على احد المعاتيه و تلفيق القضية له
و الحل ان نصنع مرايل مدرسة للبنات متركب فيها غطاء حلة
لحد ما يفرجها ربنا
---
و عاشت شرطة مصر
و احنا مش مهم