السبت، 25 نوفمبر، 2006

مشاهدات تلفزيونية

أمس كان الجمعه 24/11 أجازه بقى قلت اقلب فى التلفزيون ، غلطت انا مالى ومال التلفزيون واللى فيه منا كافى خيرى شرى وعمال ألعب مع عبد الرحمن وخلاص لازم يعنى اتهف فى نافخوى وافتحه


بالصدفه وقفت على روتانا سينما ، بيتكلموا عن فلم يلى بينا نرقص لأيناس الدغيدى وكانت تحكى عن قصه الفلم للمزيعة وأن هو ببساطه عن واحده فى خريف العمر (يسرا) ذات مركز مرموق وزوج (عزت ابو عوف) وأبناء واسرة ، وجدت انها فى هذه المرحلة العمرية لو اعدت كده هتبقى عايشه عشان تاكل وخلاص فقررت ان تتلقى دروساً فى الرقص بمدرسة الرقص الموجوده فى نفس العمارة اللتى بها مكتبها للمحماة ، ويقوم بتدريبها شاب طول بعرض كده ( تامر هجرس) كل ده ملناش دعوه بيه ، انما إن ايناس الدغيدى تختم حديثها ده بقولها طبعاً المدرسه دى فيها كل شرائح المجتمع وبتناول مجتمعنا من خلالها ، لحد كده وكفاية مدرسه رقص ايه دى اللى طبعاً بتضم كل شرائح المجتمع !!! هى جامعه ولا خلاص البلد كلها هتنام فى الشارع على راى عادل امام ، هى الناس دى بتقول ايه



بعد الجنان ده قلبت على التلفزيون العادى ، قناه النيل للرياضة لقيت 3 بنات فوق منصه تتويج وخلفهم يافطه بتقول بطولة مصر الدوليه للجودو ، المزيع بيهنى الف مبروك الميداليه الذهبيه لمصر الف مبروك الميداليه الذهبيه لسيادة الريس فعلاً هو الحافز الوحيد لكل الميداليات الذهبية !!!!!! مسمعتش حاجه بعد كده ومش عارف اقول ايه ولا ايه ، يعنى ايه اللى السيد المزيع بيقوله ده ؟؟ يعنى فى ماتش الأهلى والصفاقصى الأخير الأنجولى فلافيو لما مرر الكورة براسه لأبو تريكه عشان يجيب الجون كان الريس حافزه ؟ وابو تريكه نفسه اما جاب الجون كان حافزه وملهمه سيادة الريس ؟!! يعنى اللى كسبوا ميداليات ذهبية فى عهد الريس فى اى محفل دولى ولا محلى وبالمناسبة هما قليلين اوى اوى اوى هما دول الحلوين الوطنين اللى حافزهم سيادته ، امال اللى خيبتهم قوية ودول بقى بالزوفة فى كل المحافل الدوليه بيخسروا فى الرياضات الفرديه والجماعيه يطلعوا ايه ؟ وحافزهم مين ؟ يمكن يكونوا اخوان مسلمين ولا معارضة فبيخسروا عشان الحافز بتاعهم مش الريس !! ولا ايه بالضبط ، هى الناس دى بتقول ايه

للدرجه دى الناس دى بتستحمرنا ومعتقده اننا بالغباء المتناهى ده ، والله انا اعد عمال اتشال واتهبد من اللى سمعته وهفرقع

هناك 3 تعليقات:

star يقول...

مش عارفة يا محمد انت مزعل نفسك ليه - ايه يعنى لما تطلع واحدة فى مركز مرموق وبيت واسرة واولاد ما شاء الله مش صغيرين وتروح تتعلم الرقص فى مدرسة للرقص - يا راجل ما دول القدوة اللى عاوزين يربو الاجيال الجاية عليها - مش مهم بقى مركزها ولا اولادها طظظظظظظظظظظظ فى كل ده - تروح تعيش حياتها وترقص وتتنطط وتجدد شبابها - على ايه تضيع عمرها -

معلش اصل ايناس الدغيدى بتتعامل مع طبقة معينة من البشر وبتعتبر انها كل المجتمع

يا راجل خليك اسبور

بلاش عقد
وحسبى الله ونعم الوكيل فيها وفى امثالها - الناس فى الدول التانية هيفتكرونا كل المصريين كده لانهم ببساطة بيصدقوا الصور المنقولة عن افلامنا وبيعتبروها جزء مؤثر فى حياتنا واللى منكم سافر دولة عربية اكيد سمع الكلام ده واتاكد منه كويس قوى

اما اى نصر فدايما ما ينسب للريس فدى بقى اسمه نفاق وانتم عارفين ده شئ متوافر جدا فى بلدنا

وربنا يصبرنا

Me2 يقول...

طول ما إحنا بنقتبس أفلام برة بالنص أكيد هنتقدم
ماهو الرقص دلوقتي بقى من سمات التقدم
زي أيام والدة فاروق باشا حسني

كتير بيتكلموا عن جمال القنوات الفضائية
وأنا رأيي القنوات الفضائية العربية و إن كانت أكثر إبهارا من التليفزيون المصري بقنواته الفقيرة إلا إنه لم يختلف عنه في نقطة إستفزاز المشاهد بأي شكل

أنا شفت الحلقة دي و شفت كمان إعادتها
و بالطبع مثلث برمودا:
إيناس الدغيدي و يسرا و هالة سرحان
لما يجتمعوا يبقى أكيد فيه مصيبة
وربنا يرحمنا منهم

جسر الى الحياة يقول...

محمد انت عارف كويس اننا بنطبل ونزمر لطويل العمر ومفيش اى مناسبة الا ونركز على ده
وبالنسبة للست ايناس الدغيدى عندها حق هى شايفة ان المجتمع بكل شرائحه وطبقاته هما اللى بتحكى عنهم فى فيلمها ناس مبسوطين ومتغنغين لدرجة الفراغ النفسى ومحاولة ملؤه بتعلم الرقص ربنا ياخدها الشعب بيتعلم يرقص اه بس على صفيح ساخن من الاحباطات والكبت والحرمان من ابسط الحقوق فى الحياة
حسبى الله ونعم الوكيل فيهم