الأربعاء، 21 أبريل 2010

كلمتين فى السريع



لم استطع الفصل بين فشل الحكومه فى ترويج مصل انفلوانزا الخنازير واختفاء الهوجه بتاعتها تماماً بعد ذلك مباشرة وكانها لم تكن ، كانت مجرد سبوبة للحكومة والإعلام واطراف اخرى


البرادعى والمتبردعون سبوبة اليومين دول


اسلوبه صحيح فى اختلاف عليه انما : أبو الليف بيعبر عنى ، ابو الليف لمس حاجات جوايه ، ابو الليف بيخلينى اضحك من القلب وفى نهاية كل كوبليه اقول والله عنده حق ، ابو الليف عنده منطق بيدافع عنه بصدق ، ابو الليف تجربه تحترم ، ابو الليف انا معجب بيه والمتحزلقون يركنوا على جنب


اعمل مع الأتراك بشكل متصل ومباشر منذ اكثر من ثلاث سنوات ، زرت تركيا منذ اكثر من سنتين ، أتابع تحركاتهم ومواقفهم الخارجية بشكل لصيق منذ وصول جول واردوغان للسطله ، تركيا فى سنوات قليلة تطورت فى الداخل بإقتدار وصنعت لنفسها مكانه ودور فى الخارج بحرفية ، واحنا اخدنا بطوله افريقيا 3 مرات


اليوم هو الأول فى الشهر الثالث من السنه الثانيه على تنصيب ملك التغيير فى العالم باراك اوباما ، ولقد هبت رياح التغيير على العالم وصارت الدنيا اكثر أشراقاً وعم العدل والسلام كافه أرجاء المعموره ، تغيير تغيير بصحيح مش تنصيب من النصب ولا حاجه ابداً


ياسادات بيه يا سادات بيه كيلو اللحمه بقى بجنيه . . . هتاف شعبى مظاهراتى مأثور منذ اكثر من 30 عاماً 
.

هناك 7 تعليقات:

AHMED SAMIR يقول...

اولا: العود احمد
وحشتنا ووحشتنا تدويناتك
ثانيا:
لا يجوز المقارنة بين مصر و تركيا او بين مصر و اي دولة محترمة لأن المقارنة لن تكون في صالحنا الا لو قارنا بينهم و بيننا في الكورة...و دي كمان محل شك
بالنسبة لأبو الليف فهي موضة هتاخد وقتها وهيحصل اخواته اللي سبقوه سعد الصغير و شعبولا

يا مراكبي يقول...

أيوة صحيح .. أنا موضوع أنفلوانزا الخنازير ده محيرني جدا برضه .. دبحوا الخنازير وعطلوا المدارس ورعبوا الناس .. وبعدين؟ ايه اللي حصل فجأة خلى الموضوع ينام كده وكأنه لم يكن؟

Gid-Do - جدو يقول...

عبد الغفار

اولا - ارجو ان تكون بخير
ثانيا - المصريين - اللى احنا منهم - كلنا اليومين دول بنطالب بالتغيير ونظرة عامة سوف تجد ان كل شئ فى حياتنا محتاج تغيير لكن التغيير بدون متابعة كارثة - نحن نفتح موضوع ما بكل حماس وبعد مدة قصيرة جدا يبدء هذا الحماس فى التراجع الى ان يبقى بالسالب ويتنسى كل شئ

فين ملف زراعة القمح وقدرتنا على الاكتفاء الذاتى

فين ملف المطالبة بمحاكمة السياسين فى اسرائيل الذين اعدموا الاسرى المصريين فى حرب 1967 بعد ان اعترف واحد منهم فى كتاب بجريمتهم

والامثلة كثير - فى السباق الحضارى بين الدول يصل الى المقدمة من يضع شئ نصب عينيه ويظل يواليه بالمتابعة حتى يصل الى الهدف المنشود فى المدة التى حددها

العيب فينا شعبا وحكومة وقيادة لان الطناش اسلوب حياتنا ولذلك سنظل نطالب ونطالب ولن نتقدم خطوة واحدة والحجج كتيرة مرة مفيش فلوس - رغم ان لاعب كرة قدم مقطوع نفسه بياخد ملايين واصحاب العقول النابغة بتخد ملاليم - المليم عملة مصرية مندثرة فقد كان الجنية المصرى مقسم الى مائة قرش والقرش مقسم الى عشرة مليمات - تحياتى

مـحـمـد مـفـيـد يقول...

عوداً حميدا
دائما ما تبهرني بأسلوبك المميز البسيط العميق

انت كنت فين ياعم ؟

عصفور المدينة يقول...

حمدا لله على سلامتك يا حبيب

تصحيح بس الهتافات كانت بتقول سيد بيه يا سيد بيه
اذكر كان سيد مرعي
عشان السادات ما كانش بيه السادات كان داخل على ترقية امبراطور

قلم جاف يقول...

1-"أبو الليف" صوته حلو ، لكن إمكانيات "أيمن بهجت قمر" أضعف من كتابة المونولوج.. وآخره يتحرك في المنطقة اللي رسمها لنفسه والكلمتين المحدودين اللي شغال بيهم..

2-لم تختف الهوجة ولكن الحر هو اللي كبس.. وأنا مستغرب من دكاترة محترمين بيقولوا إن الفيروس دة ضعيف رغم إن عدد الوفيات منه في تزايد مستمر.. أمال لو كان قوي كان عمل إيه؟

ولا البني آدم هنا بقى بلا قيمة..

3-سيظل "أوباما" أكبر اشتغالة اشتغلنا بها أنفسنا وصدقناها..

غير معرف يقول...

ياسادات بيه يا سادات بيه كيلو اللحمه بقى بجنيه . . . هتاف شعبى مظاهراتى مأثور منذ اكثر من 30 عاماً

شدتني اوي الجمله دي في المقال .. يمكن عشان ليها ابعاد كتييييره اوي جوايا ..


اممم
هتقارن بين مصر وتركيا !!
احنا كفايه علينا الكاس .. احنا ناس قنوعه بترضي بقليله !!!
:)))))))))))


ابو الليف عاجبني انا كمان علي فكره ..
رغم انه مش عاجب ناس كتير بس انا مش وجهة نظري شايفه ان الالبوم كله بيناقش قضايا اجتماعيه وحاجات في حياتنا بس بإ|سلوب ساخر حبتين ..
اصل واحد زي ايمن بهجت قمر مش هيلعب بقلمه مع اي حد :)


علي فكره
دي اول مره اجي فيها هنا .. عجبني البوست وعجبتني حكم الشهور اللي فاتت ..
شكلها كده مش هتكون اخر مره :)

تحياتي