السبت، 19 أبريل 2008

إبراهيم ومحمد وفولا فولا

إبراهيم : اغنية سيد درويش جميلة ..


محمد : بالنسبة لى جايه على الجرح وبتنقل فكرى فى الأزمة بالضبط


إبراهيم : مش مجاملة هى بجد جميلة ، كنت حكتب عليها واقول إن سيد درويش دا اسكندراني .. شايفين الاسكندرانية وجمالهم ناس فاهمة وواعية


محمد : فاهمه ماشى ، انما واعيه دى لا ، ده حشاش وكوكاينجى واعية ازاى بقى


إبراهيم : هههههههههههههههههههههههههه الله يسامحك .


محمد : دى حقيقه تاريخيه ، اللى موت سيد درويش المخدرات ، مش مصدقنى؟


إبراهيم : لا مصدقك . . . سيد درويش !! كل الحاجات حلوة بتبوظ من حواليا


محمد : ايه حكايه الحاجات الحلوه اللى باظت دى؟


إبراهيم : من كام يوم برضه واحد بعت لي اغنية فولا فولا ، اغنية من ايام الطفولة الحلوة .. الواحد لما يشوفها يفتكر الايام الجميلة دي ، بس بعت لي البنت لما كبرت .. وبتغني الأغنية ، فدلوقتي لما حشوف الاغنية مش حفتكر ايام زمان وبراءة البنت


محمد : يا خبر ده زمانها فى الأربعينات دلوقتى


إبراهيم : لا عندها 28 سنة بس ، ومغنية ورقاصة وعريانة وحاجة اخر مسخرة ، وبتغني فولا فولا بشكل مآسوي ، مش حقدر لما اشوف البنت الصغيرة غير اني افتكرها بصورتها دلوقتي


محمد : ده تطور طبيعى ، مهى لو شافت صورتك دلوقتى بلحيتك وهيئتك وكانت شايفه صورتك وانت صغير هتقول يا عينى النونو الكميل بقى ارهابى


إبراهيم : هههههههههههههههه ، ايوا صح .. بس انا وانا صغير مش كنت بمثل لها اي حاجة ، لكن هي كانت بتمثل لى حاجات.. سينما الأطفال يوم الجمعة ، وماما عفاف الهلاوي ، والفطار كلنا مع بعض فول وفلافل سخنة الصبح .. والعراك على الجرايد


محمد : كل مرحله لها ظروفها ومقتضياتها والمستقبل لا يتشكل وفقاً لرغباتنا ولكن وفقاً للواقع ، والى ميفهمش الواقع يفضل تعبان ، مكنش منتظر مثلاُ انك هتلاقيها بتغنى فولا فولا بعد مكبرت وهى لابسه حجاب وبعد متخلصها تروح مدياها نشيد اسلامى


إبراهيم : لا مش كده .. لا تغنيها عريانة ولا تغنيها بحجاب ، تسيبها زي ما هي


محمد : مش بكيفك

انت لو بتغنى اغنيه وانت صغير هتحب تغينها تانى وانت كبير ، بعد مبقيت ارهابى ومش هيجى فى بالك انك بقيت ارهابى وبتبوظ الصوره القديمة للناس اللى شاتف برائتك أنما هيجى فى دماغك ان ده التطور الطبيعى ليك وعاوز توريه للناس وتقول لهم انى كبرت واتطورت اهه ، فاهمنى


إبراهيم : مش قوي


محمد : يعنى انت بتقلى لا كانت تغينه زى زمان ولا تغنيها زى دلوقتى بعد مكبرت تغنيها محتشمه شويه عشان متشرخش الصوره ، صح ؟


إبراهيم : لا متغنيهاش خالص دلوقتي


محمد : ليه متغنيهاش دلوقتى؟


إبراهيم : عشان ما تبوظش الاغنية القديمة


محمد : تبوظها من وجه نظر مين؟


إبراهيم : انا واللي زيي


محمد : طظ فيك انت واللى زييك ، هى لا مرجعيتها زيك ولا ثقافتها زيك ولا مجتمعها زيك ، ولو عملت اى حاجه غير اللى عملته كانت تبقى شاذه ويقولوا عليها الولية اتجننت ، شوف البنت المسكينة اللى كانت زى الوردة المفتحة بقت إزاى ، لأن ببساطة ده واقعهم


إبراهيم : ههههههههههههههه ، فهمت قصدك .. انا يظهر اللى قديم قوي


محمد : ولا قديم ولا حاجه ، متفكرش ان اللى بقوله ده تفتح الحداثة عشان تقول لى انك قديم فى المقابل

يعنى اختى مثلاً رسامه ديزاينر ، وهى صغيره كانت ترسم موديلات فى منتهى البرائة ، ودلوقتى كبرت لو لقتها بترسم موديلات عاريه هنتقدها واقول البنت اتهبلت وباظت ، انما لازم تكون بترسم حاجات تتوافق مع مرجعيتها وثقافتها ومجتمعها وده التطور الطبيعى ليها ، وفى الحالة دى لو كانت البنت فولا فولا دى جت قالت على اختى انها بقت ارهابيه بعد مكانت بترسم ببرائة ، تبقى فولا فولا هى اللى مش فاهمه ، لأنها عاوزه تتطبق مقياسها على ناس غير خاضعه لمقايسها


إبراهيم : الله يسامحها


محمد : اللى بقوله ده مش انحلال أو تأييد له ده تفهم للأخر ومعرفه لأرضيته بغض النظر عن رضايا عنها


إبراهيم : امممم .. كان نفسي هي كمان تتفهم موقف الآخر


محمد : هاهاها ، وانت متفهمتش الأخر ليه وحلقت دقنك


إبراهيم : عشان الموضوع دخل في طريق تاني لا اقتناعي ولا اقتناع الآخر له قيمة فيه


محمد : الله ينور عليك ، لو سالتها بتلبسى عريان ليه هترد عليك نفس الرد ، وعندها الف حق


إبراهيم : ما هي تلبس عريان .. هي حرة .. انشالله تولع .. ما هي مش لوحدها ، بس بوظت لي الاغنية بتاعتي


محمد : لا ، انت اللى بوظتها مش هى


إبراهيم : ههههههههههه ، ازاي؟


محمد : فاكر كوكو واوا ؟ البنت اللى كانت بتغنيها مثلاً ، بريئه ولطيفه والذى منه ، عشان ده واقع الطفوله ، اما تكبر بقى

لو انت مكنتش فاهم ان واقعها بيقول انها ممكن تكون ممثله افلام بورنو هارد ، يبقى انت اللى مش فاهم مش هى اللى بوظت ، لأن واقعها بيقول مفيش مشكله ان البنت دى اما تكبر تعمل كده والمجتمع بتاعها هيقبلها عادى خالص كده ، لو فكرت بقى ان بالشكل ده الأغنيه باظت يبقى انت الى غلطان لأن انت مش فاهم واقعها


إبراهيم : الواحد بعد كده يعزل ولاده عشان ما يفرحوش بحاجة ممكن تكون وحشة لما يكبروا ، او يفهمهم إن اي حاجة حلوة حتكون وحشة لما يكبروا ، فيبوظها لهم بدري بدري


محمد : هاهاها لا خالص تسيبهم بتفرجوا ويعيشوا طفولتهم وبعد كده تفهمهم لما يجى وقت الفهم ، أخويا واختى وأنا مثلاً متعزلناش ومع ذلك لا "فولافولا" ولا " كوكو واوا" ولا الأغنيه بتاعه الحيوانت باظت عندنا ولا هتبوظ حتى لو سافرنا بره لقينا واحده من البنات ديه واقفه فى فاتريه عريانة وتحتها سعر الساعه ، صح ولا مش صح


إبراهيم : صح

هناك 31 تعليقًا:

لحظة يقول...

المثل بتاعنا بيقول
لو طلع العيب من اهل العيب ما يبقاش عيب
وطبعا العيب مختلف باختلاف الزمان والمكان والمرجعية
يعني اللي عندي عيب
ممكن جدا جدا يكون عند غيري مش عيب

وزي ما حضرتك قلت
لو فهمت ارضية ومرجعية غيري هيكون سهل عليا اتعامل
انا باقبل اللي يناسبني
وارفض اللي ما يناسبنيش
الاغية هتفضل حلوة زي ما هيا
بصرف النظر عدى عليها كام سنه
او اللي بتغنيها بقى شكلها ايه
جمال الغنية وذكرياتها الحلوة معايا مش ممكن حاجة هتشوهه او هتمحيه

شكرا لك

خمسة فضفضة يقول...

السلام عليكم ورحمة الله وبركاته

الله ينور يا محمد طبعا لازم ان احنا نتقبل الآخر زي ما عاوزينه يتقبلنا

بس برضو هي غلطت لانها شوهت حاجه جميله جدا بالمنظر المذري ده ليه بقي هاقوله
لان الاغنيه اصلا اغنية اطفال وماينفعش تغنيها بالمنظر اللي غنته بيه ده لانها ما كانتش بتوجهها للاطفال ولا باسلوب اطفال حتي القرن ال35 مش ال 21
دي كانت بتغنيها لشوية مساطيل اقل ما يقال عنهم انهم قاعدين يحششوا في غرزه
وبكده هي شوهت حاجه جميله كانت ليها ذكريات جميله عند جيلنا كله


ماشي هي عاوزه تبقي كده هي حره واحنا متقبلين التغير الطبيعي ليها واللي كان متوقع في مجتمع زي اللي هي عايشه فيه

بس اللي عملته ده مش تطور طبيعي ده يدخل تحت اسم الاستغلال ،والاستغلال مرفوض في كل المجتمعات
هي استغلت نجاح الاغنيه القديمه عشان تفرقع وتشتهر وهي كبيره وتبقي مجرد باب ليها عشان تدخل عالم البورنو اقصد الفيديو كليب
وللاسف هي لا كانت الباب الملكي ليها لدخول العالم ده ولا اشتهرت ولا سمعنا عنها تاني خالص ، وما نابناش الا انها شوهت الاغنيه وخلاص


سلام

Ahmed Shokeir يقول...

من حق الإنسان ان يعيد تقديم عمله أو عمل غيره طالما تم السماح له بذلك برؤية جديدة .. وفي النهاية المتلقي له الحكم والرأي .. فالعمل تم تقديمه للمتلقي وليس لنفسه لذلك لايمكن تجاهل رأي الآخر أو المتلقي وإن كان هذا لايمنع حرية من يقدم العمل في تقديم مايريد

ولإبراهيم أقول : إذا كنت تحب نادينا زمان تستطيع ألا تشاهد غيره وتحاول أن تلغي مارأيته بالعمل الجديد
فولا فولا بتاعت زمان
.. ولمن وجد العمل الجديد افضل فليشاهده
فولا فولا الجديدة على دخان الشيشة

مـحـمـد مـفـيـد يقول...

والله يا محمد للأيف تحس ان في الفتره الاخيره تلاقي في انحلال ومقاييس مختلفه تماما عما كانت
انك تفهم اللي قدامك وتعرف تتعامل معاه دي مش سهله ولو قدرت تعرف تعمل كده أكيد هتقدر تكسب الانسان بغض النظر عما هو مؤمن به

lonely يقول...

ع الاقل هما دا طبعهم ودى ثقافتهم
الدور والباقى علينا
اللى بنقلد وبس وفى الخيبه

صبرني يارب يقول...

سلام عليكم اخونا الفاضل

اول مره اجي المدونه ومش عارفه جيت ازاي تقريبا اتكعبلت فيها عند دكتور حر

وقريت البوست وعجبنى اوي

وانا مع محمد فى اغلب كلامه ان ما كانش كله
رغم انى زعلانه اوي على الاغنيه عشان اظاهر ان الاخ ابراهيم ده قريبنا وكان بياكل معانا قول يوم الجمعه الصبح قدام ماما عفاف برضه وسينما الاطفال ومغامرات الكلبه لاسي وكل تمام يعنى .
لكن تعليق بقى مهم تاني اقوله للاخ ابراهيم انت بتعتب على البنت بتاعة فولا فولا الى هي ايطاليه باين على ما اذكر . الى هى على راي محمد بيئتها ونشأتها ومرجعيتها مختلفه عننا .
طب حضرتك ما شوفتش المغنيات بتوعنا ؟؟؟ الى يمكن منهم ناشئين فى حواري المحروثه ؟؟
بيعملوا امر منها وازفت منها بكتير

وشكرا لكم

صبرني يارب يقول...

اه نسيت اقولك انى متغاظه اوي من الاغنيه الى انت حاطتها والفراشه الى بتجري دي ومش عارفه اعمل زيهم حلويييييين اوي

بنت مصريه يقول...

معلش يا محمد بصراحه انا مع ابراهيم ومش بحب حكايه التطور الطبيعى للحاجه الساقعه دى لان ده مش تطور طبيعى دى بجاحه وتشويه الصوره الجميله بالضبط زى بريتنى سبيرس كانت بريئه قوى اول ما طلعت بس دلوقتى اوعى وشك
انت فين بقى يا استاز محمد انا انجى فاكرنى اتمنى تنورنى

أحمد الشمسي يقول...

مقتنع تماما بالكلام، لكن برضه ما اقدرش أنكر إني زعلت قوي لما شفت "فولا فولا" الجديدة، وإنك زعلتني قوي لما قلت ان "سيد درويش" مات من المخدرات... يمكن أنا كمان قديم قوي؟

الطائر الحزين يقول...

علشان نشعر ببراءة الطفولة

لازم نرجع احنا الاول علشان نرى بعين الطفل


جميل يا استاذ

goodman يقول...

كم من ذكريات جميلة ضاعت واندثرت
رغم انى غير معترض على حرية نادينا فيما تفعلة
هذاهو اسمها
دلكنى كنت افضل ان تبقى ذكراها دائما بريئة
تحياتى

AZ يقول...

بجملة التبويظ
الراجل اللي عامل زغنية كوكو واوا اتمسك في اكتر من قضية شذوذ مع الاطفال وبيقال ان البنت بتاع كوكو واوا كانت من ضحاياه

كلبوزة لكن سمباتيك يقول...

بصراحة حوار ممل
بس قراته و مختلفه مع شخصية محمد و مش متفقة مع ابراهيم

تحياتي

Tamer Nabil Moussa يقول...

هو دة تتطور اليويمن دول

تحياتى

حائر في دنيا الله يقول...

شفت فولا صغيرة وعجبتني
وشفتها كبيرة قرفتني بجد

يللا جتهم القرف ضيعوا براءة البلد

قوس قزح يقول...

انا كنت بحب اوى الاغنية بردو و هى صغيرة كانت البنت البريئة الرقيقة و اللى بتغنى وسط اطفال كلهم اجانب بس بالعربى و كنت بفتخر بده اوى

انا مش بنكر انها دلوقتى ست جميلة بردو
بس تفتكر هفتخر انها بتغنى عربى وسط البار ؟؟

و لو هنبص لها من الناحية الفتية الاغنية غير مناسبة لها ابدا انها تغنيها
فكر كده لو هانى شاكر مثلا طلع عمل كليب دلوقتى عن اغنية للاطفال كان عاملها زمان فى برامج الاطفال .. هتتقبلها ؟؟


تحياتى

MAKSOFA يقول...

العصفورة بقت حدايه

ammola يقول...

السلام عليكم
كيف حال حضرتك..لعلك بخير
يا ريت لو حضرتك تزور مدونة"قولا سديدا" قد تجد بها ما يهمك
اللينك عندى فى آخر بوست
جزاك الله خيرا

Ahmed Mubarak يقول...

مساء الخير

انا بصراحة شفت اول حته من الاغنيه ومرضتش اكملها .. لأن الاغنيه ديه ليها معزه خاصه لأنها صدرت في يوم ولادتي بالظبط .. يعني بتكبر الاغنيه ديه معايا يوم بيوم وسنه بسنه ..

وانا بحبها وللأسف هيا بوظتها ..

ده كمان ان الاغنيه اغنيه اطفال ..
كانت تغني حاجة تانيه ..
مينفعش مثلا اقول لأختي تعالي شوفي الاغنيه ديه بعد التعديل .. طبعا لأ .. ديه كلها رقص وعري .. مش اغنيه اطفال خالص .. وهيا كده خلطت ما بين الغرض من الاغنيه والشهره وخلاص .. وده منطقيا غلط ..
لكن ممكن الاغنيه القديمة وهيا صغيره ..

كلامك منطقي جدا على فكره ..وده مجتمعهم .... ولكن مينفيش انها بوظت الاغنيه القديمة في اذهانا ..
ومهما اختلفت الثقافات .. اي شخص عادي ممكن يقول ديه اغنيه اطفال مينفعش فيها العري ده ..
غني حاجة تانيه .. مع اني ضد ده برضو ..
تحياتي

Marwa Friday يقول...

يااااه يا عم محمد يا شرقاوي.. زمن ما دخلتش مدونتك!(مبروك عليك محافظة 6 أكتوبر يا رب ما تنسيش حضرتك محافظة الشرقية:))).. حلو جداً الحوار ده
أعتقد إننا لازم نتقبل الإختلاف كما هو.. يعني فعلاً سيد درويش كان موسيقار عبقري.. معنى اني أعرف انه كان بتاع مخدرات انه بقى موسيقار نص لبة؟.. أبداً.. ربنا يسامحه على رأي إبراهيم

ممكن برضه نجيب الأغنية القديمة ونتفرج عليها وكأن مافيش غنوة جديدة!ا هههههههه

فولا.. فولا..
تولانا الله برحمته

allfollowsome يقول...

عجبتنىى طريقة الحوار بينكم جدا

وان كان نعتك له بالارهابى كان كتيرشوية حتى و كان من وجهة نظر الناس
(:

وفعلا الحياة بتختلف جدا من وقت للتانى وطبعا زى ما حضرتك ثقافتها وبيئتها وطريقة تفكيرها غيرى وغيره وغيرك مختلفة يعنى

!!!

باشا طلب بقى منك

اغنية شد الحزام بتاعة سيد درويش عازوها ضرورى جدا

allfollowsome يقول...

اضافة على موضوع فولا فولا

يعنى طبعا الواحد شافها وهى صغيرة وكان وهو صغير وشافها وهو كبير وكان هو كبر اكيد فرق السن والتفكير بيفرقوا برضوا

:p

ما تنسانيش فى اغنية شد الحزام

:)

غير معرف يقول...

بس بجد يا جماعة فى زكريات من الطفولة الواحد بيفتكرها بشوق جامد ويتمنى انها متتغريش زى ما انا بفتكر اغنية فولا فولا واتمنى انها تفضل فى ذاكرتى بنفس الشكل متتغيرش
هو فعلا كل واحد وثقافته وارضيته بس برده الواحد بيزعل

دنـيـا محيراني(ايناس لطفي يقول...

الغنوه بتحمل ذكريات عندي مش عايز تتشوه الذكريات ديه البنت كانت برئيه وهاتفضل كده في خيالي غير كده مش هاتفرج
ايه يا محمد فين الجديد البوست ده قدم
تحياتي

mostafa rayan يقول...

انت بتقول كلام جميل يستحق التفكير
والبوست فيه معاني كتير لازم نقف قدامها
تحياتي لك

البنت الشلبية يقول...

مفيش حد بيفضل على حاله
ممكن يتحول للافضل او الاسوء
طبيعة كونية
......
وثقافة الاختلاف دى حاجة بنتعلمها مع الوقت وبتختلف تبعا لاختلاف المستوى التعليمى والاجتماعى والثقافى
=======
سيبك انت...الاغانة بتاعت زمان كانت جامدة بجد

Jana يقول...

قول لابراهيم

"قول للزمان ..ارجع يا زمان"

Rania Lelah يقول...

كل حاجاة جميله بتضيع و كل حاجة كانت جميله بقوا قصدين يضيعوها

تحياتى

tota يقول...

رجعتني 18 سنة لورا لاجمل فترة في عمري ايام ماكنت عايشه في مصر ياااه قد ايه كانت ايام جميلة وقد ايه الاغنية دي كانت حلوة وصاحبتها شوهتهااما غنتها من تاني
فرق شاسع بين البنت البريئه والصوره اللي بقت عليها
ليه البراءه بتضيع مننا اما نكبر؟
بوست جميل مليان ذكريات ومعاني كتير بس انا مش مع صاحبك في رأيه ياريت كل حاجة تفضل علي حالها كانت الدنيا بقت اجمل
سلامي ليك وكل الود

بنت الصالحين يقول...

ايه ده البت بتاعه فولا فولا بقت كده
لاااااااااا ياريتك ماقولتلي انا كنت بحب الاغنيه دي



خلاص بقي


بس حلو الحوار مع اسلام اونلاين

ربنا يباركلك في عبد الرحمن يارب


وفعلا التعليق اللي عندي اللي كتبته عندك حق فيه بجد لازم فعلا تشجيع للمنتجات اللي هتتعمل دي


ربنا يكرمك ويوفقك يارب ويوسع عليك في مشروعك باذن الله

شيماء الجيزى يقول...

اولا
انا بحب اغنية فولا فولا دى جدااااااا
المشكلة انى لما شوفت البنت كبرت مفتكرتش الا الاغنية وهى صغيره

انا كنت اللى جاية اقوله
انه فعلا صح

والله ينور عليك

تحياتى