السبت، 3 نوفمبر 2007

أتجاه معاكس

فى طريقى للعمل يوجد كوبرى علوى يسمى كوبرى عرابى يضطر سائق السيارة المخصصه لنقلى انا وزملائى للسير فى عكس الأتجاه بجوار الكوبرى حتى نستقبل مطلعه ، فلو سلك الطريق الصحيحة لكلفنا ذلك خمسة عشر دقيقة اضافيه نحن فى غنى عنها تماماً ويتكرر هذا يومياً بشكل تلقائى حتى انى لوقدت سيارة وذهبت بها للعمل يوماً فإنى سأسلك نفس الطريق المعاكس بدماء باردة

يومياً ولم يفكر السائق مطلقاً فى تصحيح مساره ، يومياً ولم اعترض انا او احد من الزملاء على هذا السلوك الخاطئ ، يومياً ولم نرى حتى نظرة استنكار واحده فى عين اياً من قائدى السيارات المقابلة لنا بل على العكس منهم من يفسح الطريق لنا من باب الجدعنه والتعاون والتفهم للظرف ، يومياً ولم يصادفنا اياً من رجال المرور ليمنعنا وينزل بالسائق اى نوع من انواع العقاب ، ولو فكر السائق ان يصحح مساره يوماً لرفضنا وهاجمناه .

أذكر وانا طالب فى المرحلة الإعدادية ( أكتوبر 84 الى يوليو 87) زاع سيط فقره تلفزيونيه إرشاديه كانت بعنوان لحظه من فضلك توضح بعض سلبيات المجتمع وتحثنا على تلافيها وكانت منهم فقره تهاجم كلمة ومنطق معلهش (أصل الكلمة ما عليه شئ) شعارها –لازم نحطم معلهش- وقد نجحت الحملة وتحطمت الكلمة تماماً ولكن فى الأتجاه المعاكس ايضاً ، تحطمت فى سبيل البجاحة فى سبيل أعتياد الخطأ حتى صار طبيعى بديهى -وعلى عينك يا تاجر- لا تلام عليه من اساسه حتى تضطر للتبرير والهروب من المسائلة او استجداء العطف بقولك معلهش ، فالمجتمع كله يسير فى الطريق المعاكس أزواج وزوجات ، اباء وامهات ، ابناء وبنات ، فى دور العلم والعمل ، فى الشارع والحكومه والدولة ، فى ارفع المستويات وادناها على حد سواء ، حتى بين كل فرد ونفسه نسير فى الإتجاه المعاكس حتى صار السائر فى الأتجاه الصحيح هو المعاكس

هناك 20 تعليقًا:

Unknown يقول...

مقال جامد جدا فى العمق صحيح

تفتكر يا استاذ محمد احنا حقيقى مش عاوزين نمشى فى الاتجاه الصحيح ؟؟
ام فقدنا القدره على معرفة الاتجاه الصحيح؟؟
وكم يلزمنا من الوقت للعوده اليه ؟؟

عصفور المدينة يقول...

موقفين لي متعلقين بالموضوع

شارع العمل عندنا اتجاه واحد بس شغال اتجاهين راكب العربية والطريق واقف وماشي صح سواق التاكسي المعاكس هاجم علي كأنه صاحب الطريق باقوله ماشي غلط وكمان مش موسع لي قال لي ده اتجاهي قلت يا أخي والله ده اتجاهي قال لي يعني كل الناس دول غلط قلت له تحب أقل عقلي انا وانت ونروح نشوف ممنوع الدخول فين ولم يعترف بخطئه وقال يمكن

ثاني موقف نفس الطريقة اللي بتحكي عنها في طريقي للمنزل ولكني أسلك الطريق الأطول وأولادي يسألون علمتهم الصح فركبوا تاكسي فالسواق مشي غلط ففضلوا قاعدين يقولوا لأ لأ لأ زعق وقالهم فيه إيه
ردوا قالوا له بابا مش بيعمل كدة
:)
وكان محرج جدا

المقصود توكيد أنه فعلا كما أشرت أنت يصبح الخطأ هو القاعدة

غير معرف يقول...

فاكر زباله يا جاهل؟؟؟؟؟؟ هىهىهىهىهى

الحمقاء المضلله innominate x يقول...

على فكرة أنا عشان أروح شغلي لازم أعدي في الحته دي و أنا من الناس الي بتمشي في الإتجاه المعاكس في الأول كان دمي محروق أما بلف اللفة الرخمةو اصلا المشوار بعيدددددددد عن بيتي و الواحد مش ناقص دي الزياده و بعدين اتعلمت باة من الميكروباصات على فكرة الفوضى و الهمجيه و كسر القوانين بقت من سمات الشارع المصري وعلى رأي بابا no one cares
و الموضوع مالوش حل لأن مدحدش بفكر في حل عملي لمشكلة المرور فالحين بس بقفلوا التقاطع و روح ال اليو ترن و بردو الطريق مش ماشي حاجه تقرف

ma 3lina يقول...

إحم إحم .. الكلام دا كبير

الموضوع كان ماشي كويس في الأول نقد لظاهرة موجودة وبنشوفها يوميا .. بس في الآخر قلبت الترابيزة علينا ووقعت الطبيخ على هدومنا ..ليه كده بس

مصر إني اقول كلمتين بس ..

مش كله

^ H@fSS@^ يقول...

يا عم محمد نفس الموضوع ده عند بيتنا
في لفة مش المفروض ان حد يمشي فيها لانه حيكون بيعاكس كل اتجاه السير اللي جاي من جسر السوية بجلالة قدره كشارع كبير و مليان عربيات و مع ذلك بنيجي او اي حد عاوز يدخل شارعنا بيجيي بالعكس لانه للاسف مافيش بديل تاني او البديل التاني ان احنا نلف من ورا البيت و ندخل في شوارع صغيرة و احتمال تكون مقفولة لان الناس راكنه فيها عالجنبيبن يعني مبقاش في شارع
طيب قلي الحل ايه؟؟
المشكلة مش مشكلة شارع واحد المشكلة في تنظيم الشوارع و اتساعهاو حاجات كتير
ربنا يرحمنا بقى


بقلك صحيح اوعى تكون زعلان انك اخر مرة جيت تعلق انا تخضيت من سرعة تعليقك على موضوع كنت لسه ناشراه في التو و اللحظة؟؟
اوعى تكون زعلان بجد لحسن ازعل انا منك عيب انت صاحب بلوج

تحياتي

غير معرف يقول...

أخى الكريم : أ/محمد عبد الغفار
السلام عليكم ورحمة الله وبركاته
أعتقد أن هذا السلوك نوع من التمرد على أوضاع كلها خاطئة
أو قل نوع من الثورة على أوضاع فى الاتجاه المعاكس

تقديرى واحترامى
أخوك
محمد

MAKSOFA يقول...

بصراحه البوست ده في الصميم
شوارع مصر أو القاهره بشكل خاص مليئه بالأخطاء اللي تودي في داهيه ، ياريت يبقي قي برامج توعي الناس
والله انا بيجي لي عصبي من طريقه الأستهبال في السواقه في القاهره ، من الآخر أرواح الناس واموالهم موش مهمه
لما بنتي بدأت تسوق السياره لتذهب بها الي الجامعه أصابتني حاله من الهلع عليها من العربيات اللي ماشيه عكس الطريق ، والناس اللي بتعدي في اي وقت يعجبها ربنا يسترها عليها وعلي كل الناس اللي بتسوق بجد وبالتزام بقواعد المرور

غير معرف يقول...

مين فينايا محمد ماشي في الاتجاة الصحيح بنبقي عارفين الصح ونمشي عكسه وبنحاول نقنع نفسنا اننا صح "صحيح في قله عارفه الصح وبتعمله بس الاغلبيه عارف الصح وبيمشوةغلط زمان اللي قبلينا قالوة "امشي عدل يحتار عدوك فيك" لكن دلوقتي غيروها"اوعي تمشي عدل يحتار عدوك فيك" دنيا غريبه وناس اغرب واغرب ربنا يرحمنا وعلي راي امال ماهر" اللي مبحبهاش" العيب علينا وفينا ولا دي غلطه مين"

اسامة يس يقول...

في مصر الفوضى هي الاساس ... لا شيء مستحيل ... الكل الا ما رحم ربي يستسهل الامر ويبسطه فإذا ما حدث حادث لا قدر الله ولوا جميعاً ، واقبل بعضهم على بعض يتلاومون...
دمت بكل ود..
خالص تحياتي

... يقول...

فاكرة حكاية لازم نحطم معلش دي.. احيانا بنستمرئ ونستسهل الوقوع في خطأ مدفوعين بوعورة الطريق السليم

خمسة فضفضة يقول...

السلام عليكم ورحمة الله وبركاته

الاستسهال بقي سمة للحياه كلها مش في المرور وبس
كل الناس مابقاش همها ايه الصح ، المهم ايه الاسهل

الـفجـريـــة يقول...

يا أ.محمد احنا محتاجين مبادر

ده فى كل الحاجات
مش المرور بس

يعنى فى الموقف اللى حضرتك ذكرته
كان محتاج حد يقول لأ
بس مش يقول بس
لكن يحتمل هجوم الناس اللى كل همهم يوصلوا
ويحاول معاهم
ويكون مستعد انه يخسر مرة واتنين

لكن طول مكل حد ياما مش شايف اصلا ياما شايف وساكت
مفيش حاجت هتحصل

الكلام ده بقوله لنفسى الاول
لان الموقف ده باشكال كتير بيتكرر واحيانا كتير بنسكت

ammola يقول...

احنا شعب عايز يتعمله دراسات وابحاث وعلاجات نفسية
ده كلام جد مش هزار

رفقة عمر يقول...

السلام عليكم استاذ محمد
مررت لاسلم على حضرتك

Esmeralda يقول...

تفتكر انا حاربي ولادي , ان شاء الله , ازاى؟؟؟؟؟

LOJAIN يقول...

سمعت الكلمة دى قريب ومكنتش مصدقة
لكن لقيتها تفسير لكل انواعالصدام اللى بقلافيها فى حياتى

اللى لوحده شاذ و لو كان صح

Regards:
Lojain :)

حبة حاجات (ايمان) يقول...

اول مره ازور المدونه
بجد جميله وراقيه
تحياتى ليك

mohamed hassan يقول...

لاتبكي يا عفشة انه عصر الانفتاح

http://kenooz.blogspot.com/2007/11/blog-post_07.html

koukawy يقول...

ما هو اذا اردت ان تطاع فأطلب المستطاع