الاثنين، 29 يناير، 2007

فضائحى

ورطنى كبير المتشردين ودينا فهمى فى المشاركه فى لعبه دائرة وهى ان اتحدث عن خمس أشياء لا يعرفها احد عنى ثم ارشح خمس اشخاص للوقوع فريسه لنفس اللعبة وهكذا ، الحقيقة فوجئت بتقديرهم لى وأتمنى ان اكون عند حسن ظنهم ولا استطيع وصف شعورى جراء هذا الإهتمام واتوجه بالتحية إلى كبير المتشردين ودينا فهمى على شعورهم تجاهى واقدم لهم كل شكر لحالة السعاده التى اثاروها فى نفسى ، وإليهم واليكم أعترافاتى

الأول . . . التاج
استلمت تاج واهدى الى فلان تاج كلمة مررت بها فى كل المدونات تقريباً وانا لا اعرف معنى كلمة تاج ولا كيفية عملة او تسلمة ولا المقصود بالموضوع اصلاً وكلما دخلت الى مدونة يتكلم صاحبها عن اهدائه أحد الأشخاص تاج او تسلمه لتاج من أحدهم كنت اشعر بتزايد طول آذانى

الثانى . . . الضفادع
وانا صغير فى بداية المرحلة الأبتدائية كانت نشأتى ريفيه لظروف عمل والدى ولم تكن مجرد مركز صغير او نقطه بعيدة انما كانت قرية صغيره جداً فى قاع الريف ، كانت تنتشر بين الأطفال اكذوبه ان مفتاح الجنه مستقر فى باطن احد الضفادع ولم يكن هناك ابرع منى فى اصطيادها لصبرى على الثبات التام لفترات طويلة والحركه المفاجئة بمنتهى السرعه ولكنى لم اكن احب قتلهم فكنت انا الصياد وهم القتله وكلما فتحنا احشاء واحده نقول "يخساره مطلعش فيها ندور على غيرها" وكان طقس شبه يومى ضحيته عشرات الضفادع فلا يمكن تخيل العدد النهائى للضحايا

الثالث . . . النساء
انا بداخلى ميل ونزوع فطرى قوى للجنس اللطيف ولو تركت نفسى على سجيتها لكنت فاسداً هلاساً ولكنى عرفت هذا مبكرأ جداً كما عرفت انه من المحرمات وانى من الخاسرين دنيا واخره ان طاوعت نفسى ، وعليه فقد اقمت ستار حديدى لشعورى وقيدته فى الأصفاد الحديدية تقيداً حتى صرت لا يمكن ان اكون حتى عندى ميل طبيعى فلقد قهرت نفسى قهراً وادبتها حتى صار لا يأمن النساء قدر امنهم معى فلا يمكن ان تجد أى اثر لأى شائبه فى علاقتى معهم فهم مجرد انسان بالنسبة لى دون نوع ولله الحمد خلال أربعة وثلاثين عاماُ هى عمرى لم أخدع فتاه او لعبت معها لعبة الحب او اظهرت لاحداهن غير ما ابطن

الرابع . . . الشراسه والدعة
ينقسم الناس من حولى عاده لصنفين لا ثالث لهما الأول يتهمنى بالشراسه والعنف وقسوة القلب ، والثانى يتهمنى بالطيبة المفرطة والضعف المبالغ فيه وأعترافى لهم انى احمل قلباً تسعده ابسط الأشياء كعصفور يغازل وليفته على غصن او زخه مطر فى جدول ماء أو وليد عنزه يلهو مع امه او شقيقه اما وان غضبت فاليستعدوا للغرق فى الطوفان وان عاقبت فبلا هواده ولا ابالى بثمن قد اتكبده قط وان بطشت فلن يفلت من قبضتى احد ، محركى الأول مع هذا الصنف وهذا الصنف هو العقل المحجم بحدود الله ولا اثر لعاطفه فى فعل او رد فعل فقط اختار ما أراه مناسب من التصرفات لكل مقام

الخامس . . . حب الأهل
تظن اسرتى الكبيره (ابى وامى واخوتى) والصغيره (أبنائى) وأصدقائى القدامى المقربين جداً (صداقه 18 و 20 عام على أقل تقدير وقت تاريخ كتابة هذا البوست) وأسرتى فى العمل (لى معهم ست سنوات وقت تاريخ كتابة هذا البوست) انى لا اكترث لهم او مشاعرى ضعيفه ناحيتهم وانى اعاملهم بكل خشونه وغلظه غير مبرره ، اما الحقيقه فأنى احبهم حباً جماً فردأ فرداً ولكل منهم منزلة فى نفسى لم يبلغها احد ولن يستطيع ان يبلغها يوماً احد واكن لهم كل اعزاز وتقدير واشعر نحوهم بكل فخر وأحترام واخاف خوفاً شديداً من يوم فراقهم المحتوم ولعل الله جاعل يومى قبل يومهم

والأن جاء دورى فى توريط اخرين ونظراً لإن خمسه أشخاص لا تكفى فسأختار خمسه نساء وخمسه رجال وهم أستراحة المحارب ، حائر فى دنيا الله ، دور ع البعد الثالث ، ahmed-H ، على أبو طالب ، حكايات فريدة ، طيارة ورق ، طعمة ، فانسى ليدى ، مها ميمو

والحقيقة انى اود توريط أيضاً كلاً من احمد شقير ، دكتره ، الصراحه خنقه ، سكاى لايت ، كلبوزه لكن سمباتيك ، النديم ، قاسم أفندى ، الدبور وهذا على سبيل المثال لا الحصر فلكل من ساقته قدماه لمرور من هنا عاوز اعرف كل اعترافاتهم كلهم كلهم فهل لى فى ذلك؟ أتمنى
.

هناك 32 تعليقًا:

كبير المتشردين يقول...

انت يا عم انت احنا اتفقنا تورط خمسة بس مش امة لا اله الا الله انت عامل فرح ما دون برضه من الزنقة انك تختار خمسة بس من كل الي عايز تسألهم

Mohamed A. Ghaffar يقول...

يا سيدى خليك بحبوح

ahmEd_H يقول...

يا نهار فضايح

هو انا مقولتلكش أصل أنا مسافر بورتريكو بعد بكرة و حرجع منها على بورفؤاد و بعدين حطلع بور سعيد و بعديها حنزل على بورالسودان علشان فى ناس هناك عيشتهم بور و انا عايز اشترى برنامج بوربوينت

هو انت لسة ماتهوتش

اوكى البوست الجى حيكون فضيحة
منك لله يا محمد يا بن عبد الغفار
^_^

هيثم ابوعقرب يقول...

انا اتطورت يا محمد
طب الورطه مش ف اللي بتقولي
الورطه ان البلوج بتاعي حالف يمين م اكتب فيه غير
حاجات زي اللي بتقراها

ايه الحل بقي
؟؟؟؟؟؟؟؟؟؟
انا عايز اتكلم فعلا اعمله ميل والفه في ورق وابعته للناس
ولا ايه الظروف دبريني
يا صديقي اللي عرفته علي كبر
هههههههه

غير معرف يقول...

التاج: انا بأمرك انك تضعة فوق راسك و مشبقول كدة عشان احنا اصحاب بس بقول كدة عشان انت لحد وقتنا هذا انت احسن ثالث صديق اقبلة فى حياتى و احسن رجل و زوج و اب واخ وابن فعلا مشبجملك بس انت فعلا كدة.
الضفاضيع:
كائنات انا مش بحبها نهائى اصلها يا محمد مؤرفة جدا شكلها وحش و صوتها وحش و كل حاجة فيها وحش.
النساء ام الرجال مش عارفة اكتبلك اية بس النساء هى الرومانسية و الحنية و الضعف و القوى وقت اللزوم
الذكاءو الحب و العطاء و الطيبةو الأمومةو الجمال و الثقة من وجهة نظرى الشخصية.
الرجال :
كائنات تعشق الترويض فى ترويض زوجاتهن ويعشقوا الحب و العطاء الزائد دائماو الى حد كبير الأنانية و السيطرة و لهم القدرة كبيرة جدا على الصمت الدائم و يستلزوا فى حيرة الأخرين ولهم القدرة على العطاء و الحب و الغيرة وليس لهم القدرة على الرومانسية.
الشراسة :
واجبة عند الشعور بالقلق تجاة شخص اخر او عند الشعور بالأهانة او عدم الأحترام لى و تكمن بداخل جميع البشر بس تختلف من نسبة الى اخرى .
حب الأهل :
الأهل هم متاع الدنيا و الأخرى انى بعشق اهلى جميعهم و بالأخص ابى و زوجى.

te3mah يقول...

الله يسامحك يامحمد
ده أنا باكره التاج ده كره العمى
استنى عليا بقى سنتين تلاتة لما أدور على حاجة الناس ماتعرفهاش عني :)
أصلي صريحة حبتين :)

دينا فهمي يقول...

اجاباتك هايلة
بيعجبني جدا ردود الناس اللي واخدة الموضوع جد
مش محمد محرز يقوللي بحب يمنى وبحب السبانخ
متشكرة على تلبية التوريطة (:

smraa alnil يقول...

هههههههههههههه
ضافديع يعععععععععع

مع اني ربيهم قبل كدة وهربوا لمسكنهم الالي البلاعه
بس كل ما افتكر اني ربيتهم اقرف اوي
واقول يعععععععععع

عجبتني ردودك يا عم الحاج

الا صحيح ايه اخبار المقابلة
بخ كدة ولا ايه

alnadeem يقول...

الزعيم محمد عبد الغفار

إنسي يا عمرو

اللعبه بتقول تختار خمسه بس
والحمد لله انا مش منهم
أنا بصراحه في الحاجات دي فاشل جدا خصوصا ان صحابي والناس كلها عارفين عني كل حاجه تقريبا
ميرسي يا زعيم
وما اتحرمش من مفاجئاتك
سلام

علي فكره انت اخترت يعني أغنيه صعبه جدا لعمرو دياب
بس والمصحف لجيبهالك

Fancy يقول...

دة ايه ده انا مطلوب منى اكتب فضايحى

؟؟؟؟؟؟

يا نهار ابيض هو انا اغيب كام يوم اجى الاقى فضايح

عموما اول ما استجمع شجاعتى اوعدك هاكتبلك نشرة بكل الفضايح

قاسم أفندي يقول...

شوف يا عبد الغفار
انا من النوع اللي باتقمص كده زي شادية كده في فيلم عفريت مراتي
امبارح بقي كنت باتفرج علي يوسف وهبي في اشاعة حب ...

يالا الصاعقة
يالا طعنات القدر
أغرب عن وجهي يا محطم قلوب العذاري وزير النساء
يا فتك يا سفاح ضفادع بورسعيد
تاج ليا أنا؟؟ وفي مدونتي .. مدونتي أصبحت مزبلة

عموما أوعدك بمفاجأة

khaled يقول...

يا ابنى انتظر مصيرك زى صدام حسين
سوف تحاكم بتهمة ازهاق ارواح عشرات الضفادع فيما يسمى بقضية الانفار
تاخد معاك كام نفر و تروحو تموتوهم
استنى بقى عمك بوش ييجى ياخدلهم حقهم
هههههههههههههههه

shaimaa يقول...

محمد اعترف
انت متفق مع العيال التانية مش كده
اصل 4 يبعتوا لى نفس التاج كده عيب

ماشى ماشى

يا رايح .. استر الفاضيح يا كريم

:))
شكرا يا محمد على التاج كتير

farida يقول...

بخبث
من اول يوم كتبت فيه فضايحك
قريتها و معلقتش

عشان لقيت حضرتك مدبسني

و بعديني انا قايله اني مش حكتب عن نفسي


و بعدين فضايحي حتكون مصايب

يا محمد انا بكتب من يوم ماعرفت الكلام
فاكره نفسي فنانه
عشان مقولش عن نفسي مجنونه
بس انا مجنونه
و انسانه بلا مبالغه فيها تناقضات حاده

تفتكر واحده بالصفات دي تنشر فضايحها على الملأ؟

خلي الطابق مستور

متشوفوش من غير فكري
الفكر وحده كفايه

اما فريده الانسانه
الامرأه

فانا نفسي الى الان هناك اشياء لا اعرفها عنها

غير معرف يقول...

اجمل ورطة دي يا محمد لان كل شيء انكشفا وبان التاج"انا كمان معرفش معني كلمة تاج في المدونات جايز لاني حديثة المعرفة بيها ومعرفش غير تاج الجزيرة "السلطانية" ياريت حد يعرفني الضفادع"حرام عليك حد يصطاد ضفادع دي كائنات تبعث في نفسي القشعريرةعمري ما هسلم عليك هههههههه النساء"مش عارفة لية الرجالة بتحسسني اننا لعنة الله علي الرجال مع ان الست حنان وحب ورقة وعطف وامومة وضعف لذيذوفي نفس الوقت قوةيعني " ناعمة وقوية وكلها حنية" بس شيء جميل ان تجد المراءة شخص يعاملها كانسانة بدون النظر الي كونها انثي " طبعا مش في كل الاوقات" الشراسة" مع من يستحقها ودول كتير اوي اليومين دول حب الاهل"انا بعشق اسرتي الكبيرة جدا مصر"لو انتي مطلعة عيني بحبك موت" واعشق اسرتي الاصغر المندمج فيها" امي واخواتي وزوجي واولادي فهم كل حياتي وبعشق الحياة لانهم موجودين فيها"بعض الناسي يجعلون حياتك سعيدة فقط لتواجدهم فيها " هالة

أمينه يقول...

هىهىهىهى اومال فين فضيحه ووتر جيت؟؟؟؟

الأنونيموس اللى فوق
عامله ايييييييييييييييييييه واحشانى التنييييييييييييييييييييييين

Mohamed A. Ghaffar يقول...

ahmed-H
طب تروح وتيجى بالسلامه ، وعلى فكره النت موجود فى كل حته يا حدق

هيثم ابو عقرب
بسيطه ، اكتب اللى انت عاوزه واعترف وقر واهدى لناس تانيه كمان ثم أبعته على الميل بتاعى وانا انشرهولك هنا فى مدونتى بأسمك ، انت فاكر نفسك هتزوغ

مجهولة الهوية
طب اقول ايه ، انا وشى احمر من كلامك

طعمة
ولو هتعترفى يعنى هتعترفى

دينا فهمى
الله يخليكى أخجلتم تواضعنا

سمراء النيل
لو نعرف يافندم ان الضفادع بتخليكى توقلى يع كنت اتكلمت على شئ تانى ، اما الإجتماع فياسمين اجلته شويه عشان ظروف شخصيه

النديم
زعيم اونطه انا وحياتك ، وبعدين عمرو هينسى فعالاً انا قلت له ينسى بس انا مش هنسى
اللعبة تقول اللى هى عاوزه تقوله انا هنا فى مدونتى واقول اللى عاوز اقوله وانت اتدبست وبلاش تلاكيك واعترف عيب عليك
الأغنيه من شريط حبيبى هو قديم حبتين فعلاً بنتكلم فى بتاع 13 او 15 سنة

فانسى
اول موضوع يكون الأعتراف انت شجاعه كفايه

قاسم افندى
طب اعترف بقى بدل مخلى فكيهه بنت سلطح بابا تعملك الكريب زوزيت

خالد
اظن دى او زياره لك هنا ، ياريت تنورنا على طول بخفة دمك ديه

شيماء
يفندم العفو بس أسمها يا رايح كتر من الفاضيح ، وفى الأنتظار

فريدة
ليس مثلك من يقول هذا الكلام لمثلى ، دبلوماسيه الأعتذار وذكاء المبررات لا يعفى وانت تعلمى هذا

هالة
انت على طول تعليقاتك قويه كده متحرمناش منها والنبى

أمينة اختى حبيبتى
كنت منتظر منك تعليق اجمد من كده

sarah la tulipe rose يقول...

عجبتني اوي حكاية الضفادع ضحكتني
و عجبتني الصراحة انا باحترم الصراحة لانها شجاعة

eldoctor يقول...

كل حتة تدبيس .. حاستنى لما كل اللى عايز يدبسنى يخلص .. وبعدين أرد

نانسى يقول...

دة انت كنت مخبى كتير اوى بس الحاجة اللى اعرفها عنك لانك من نفس البرج
الجـــــــــــدى
انك من النوع اللى يتقال عليه اتقى شر الحليم اذا غضب فمهما طال الصبر على اخطاء الغير لابد من وضع نهاية حاسمة لهاو تخرج فى النهاية منتصر رغم ان البداية كانت عكس ذلك

امينه يقول...

هاتكلم اقول ايه بقى ربنا حليم ستار
:P
ماحنا دافنينه سوىانا كنت فاكراك هتذكر حكاية تعذيب بياعين الخضار وبياعين العسل واللى كنا بنعمله فيهم هىهىهىهىى

ياسمين يقول...

كدة برضه يا محمد

انت عارف انى صريحة اصلا ومش بأعرف أكدب ودة معناه انى أقول خمس حاجات ما حدش عارفهم بصراحة

وكدة هتبقى فضيحة

اذا كنت بأكتب عادى كدة والناس بتهزأنى .. أمال لو قلت اللى مخبياه هيعملوا فية ايه

هأفكر وهأرد عليك برضه بصراحة

بس عاوزة أفتكر أى خمس حاجات مش عار

Sharm يقول...

في مظاهرة هتتعمل قريب احتجاجا على توريطك كل الناس دي

farida يقول...

انا بقى جايه اعلق على فضايحك عشان انا معلقتش قبل كده عشان تعتقني و لا عتقتنيش
.....
الاول
حاجه مش فاهم معناها بتديها لغيرك ليه؟
...
الثاني
فطستني من الضحك انت وضفادعك
...
الثالث
خلتني احترمك
ومصدقاك على فكره
لأني اعرف شباب زي القمر بمعنى الكلمه و البنات حتتجنن عليهم
و هم عندهم ميل رهيب للنساء
وخايفين ربهم
ياريت كل الرجاله زيك و زيهم

بس حلوه حكاية فاسدا و هلاسا دي
المهم يعني
قدرت تعوض ده مع مراتك
ولا انت من اللي بيفكروا ان المذه غير الزوجه؟
...
الرابع
و الخامس

صدموني فيك
كنت متخيالك حنين داخليا وظاهريا
بص يا محمد
الناس ساعات بتحتاج الكلمه قبل الفعل
طبعك ده ممكن يتغير على فكره
لأن الحياه اقصر من اننا نعيش نفهم الناس اللي جوان و اللي متداري عنهم
افتح قلبك
وسيب نفسك على سجيتها

بس برضه مقولتش
ايه سبب الخشونه و الغلظه غير المبرره دي؟
عقده في الصغر مثلا؟
طبع و الديك كان كده و اثر فيك؟
ايه الاعترافات النص كم دي
يا تعترف بما يرضي الله
يا اما.....فلا
:)

هيثم ابوعقرب يقول...

لا مش ههرب
خلاص استني التاج قريب
بس اسيب فرصه للناس تفوق من التاج الاولاني

KaRiM يقول...

تقريبا دى أول زيارة لى لمدونتك .. وبجد إتشرفت إنى إتعرفت عليك..
والله يكون فى عون الضفادع..
:)

قاسم أفندي يقول...

أنت يا عم أنت
ورطتني وهربت؟؟
متيجي تشوف اللي عملته
روح آ شييييييخ

eldoctor يقول...

انا رديت على التاج ... او السلطانية ....

ملك يقول...

انا مش فاهمة ردك دة
مجهولة الهوية
طب اقول ايه ، انا وشى احمر من كلامك دك دة
و العموم شكرا

الدبور يقول...

التاج وصل وشكرا وجاري الرد في الايام القادمه
و بعدين ضفادع ياراجل تصدق دي اكتر حاجه كنت بقرف منها بس عادي كان في صحابي بيحبوها اوي واحنا صغيرين

ليلى الصباحى.. lolocat يقول...

السلام عليكم

اعترافات جميلة وليست فضائح :)

بحثك عن مفتاح الجنة
وحرصك على قهر شهواتك لوجه الله
حبك العظيم لاهلك واسرتك رغم ظاهرك الذى يتسم بالجمود
اسلوبك فى هذا الحوار مع النفس

كل هذا يدل على شخصية مصرية اصيلة تأثرت بريف مصر الذى يبنى الانسان على قيم من التقرب من الله والحياء والسعى لمرضاة الله

سعيدة انك اشرت لى لهذه التدوينة التى جعلتنى اتعرف اليك اكثر اخى الكريم

دمت بخير وتحياتى بحجم السماء

محمد عبد الغفار يقول...

أشكرك لتعليقك على بوست قديم جدا
انا لست بهذا الجمال الذى يستحق اطرائك
حاولت ان اكون صادق قدر المستطاع ربما يكون هذا سبب التعليقات الكثيره على البوست
واشكرك مره اخرى على تدوينتك التى ذكرتنى بهذه الفضائح القديمة جدا حتى البوست كتبته منذ أكثر من ست سنوات