السبت، 13 يناير 2007

اللقاء

بالأمس إلتقينا والحلم أصبح حقيقة ، إلتقينا بعد طول شد وجذب وأتفاق على الا نتفق كعاده كل المصريين ثم أخيراً خرجت الفكره للنور بحضور سته افراد من حديثى التدوين نسبياً (الصور لأربعة أفراد فقط لحرص سمراءالنيل والحصان الأسود على الغموض التدوينى) ولهم الحق أما الحضور فكانوا سكاى لايت ، سمراء النيل ، الحصان الأسود ، رجل ميت ، بكره أكيد احلى والعبد لله


لقاء اقل ما يوصف به انه ممتع للغايه ، رغم انه لم يتوفر له اى سبب تقليدى من سبل تحقيق المتعه وجودنا كان نشازاً كبير فى مكان اللقاء (تريانون سور نادى الزمالك) الكراسى غير مريحه ، كل رواد المكان يحدقون بنا شذراً تاره وعجباً اخرى ، الأفراد السته مختلفين تمام الأختلاف كلأ منهم عالم مستقل بذاته فضلاً على اننا لم يكن أحدنا يعرف الأخر الا من خلال التدوين وهناك البعض الغير معروف لكل الحضور على الأطلاق ، ولكن رغم كل عوامل الفشل نجح اللقاء وكان ممتعاً

المجموعة أفراد مختلفة بالكلية أشتركنا فى أشياء ثلاثة هى النجاح المهنى والعملى لكل الحضور كلاً منا فى مجاله ، قدر لا بأس به من الآلام والعذابات والمحن مستقرة فى وجدان ودنيا كل فرد منا ، سعاده لاتوصف بنجاح اللقاء

أمتع ما فى اللقاء هذا الكم الهائل من البساطة المفرطة والصدق والصراحة والمكاشفة والأنطلاق الذى تمتع به الجميع دون استثناء وكأن التدوين بكل حريته انتقل من العالم الأفتراضى الى عالمنا الحقيقى دون رتوش تجميل او انتقاص مداراه

أعزائى المدونين من حضور الأجتماع اشكركم على هذا الوقت الممتع الذى منحتونى اياه على مدار اربعة ساعات ونصف كنت اريدها الا تنتهى ، وأعزائى المدونين غير الحضور أرجوكم الحضور فى المرة القادمة فقد قررنا ان يكون اللقاء شهرياً وسيكون التالى بإذن الله الجمعه الموافق الثانى من فبراير على أن يتم تحديد المكان لاحقاً

هناك 15 تعليقًا:

Ahmed Shokeir يقول...

جميل لقاء بهذا الشكل ، ميزته انه تم بهدوء ومن غير دوشة

أعجبتني تعبيرين استخدمتهم الاول وهو تعريفكم بحديثي التدوين نسبيا لأن جمال التدوين هو التجديد الدائم بظهور وجوه جديدة
ثانيهما تعريفك بان كل منهما عالم مستقل بذاته فأنا أعشق الإستقلالية ولعل نقدي لما يسمى بمجموعة المهللين مايؤكد كلامي

آخر كلامي
احيانا تكون اسباب الفشل المتوقع من عوامل النجاح مثلما نجح لقاؤكم على حد تقييمك

تحياتي لكم جميعا

nooooooooooo يقول...

مش عاوزة اكرر نفس الكلام اللى قولتة عند ياسمين و سمراء النيل

لكن اتمنى ان تدوم اللقائات الطيبة

و الصور دى اعتقد دى ياسمين

امال فين سمراء؟؟؟؟؟

خلف الكاميرا اكيد

كل لقاء و انتم بخير

smraa alnil يقول...

هييييييييييييييييه الصور طلعت
والله انا كنت فرحانة اوي
وعلي فكرة بقي الصورة الاولي والاخيرة انا اللي مصوراها
عبقرية مني طبعا
بجد انت لخصت مقابلتنا دي في سطورك الرقيقة
بس يا فانسي انا مش رضيت اطلع في الصورة عشان انتي عارفة المعجبين بقي ومش ناقصة
ههههههههههه
بس بجد كان يوم رائع يتحسب من عمري
شكرا ليكم علي هذه اللحظات السعيدة الي قضيتها وعلي كلامك الرقيق عننا

غير معرف يقول...

جميل ان يلتقي مجموعة من الناس لاول مرة ولكلا شخصية تختلف عن الاخر وفي نهاية اللقاء يكتشفوة تجانسهم البعض مع الاخر بصراحة حسدكو وتمنيت ان اكون معاكم وربنا يذود اللقاءات الشهرية فكرتوني باغنية ام كلثوم اللي كنا بنستناها كل شهر (طبعا قالولي لاني وقتها كنت في عالم الغيب) ولقاءات جديدة سعيدة وبناءة

أحمد سلامــة يقول...

قلما صادفت من يدعى باسم محمد عبد الغفار ولم يكن مختلفا
مش عاف اقولك ايه يا محمد
مع ان الفكرة كانت من ياسمين بس مش عارف ليه انا حسيت ان حضورك بالذات كان مهم وضروري جدا
يمكن علشان تعليقاتك المشجعه دايما في البوست بتاع المقابله دي في مدونة ياسمين
كان نفسي بجد اكون معاكم على غرار يا ريتني كنت معاهم في فيلم الطريق الي إلات
بس بجد كان حظي في جدول الأمتحانات سيء جدا
يارب أتشرف وأكون معاكم في المرة اللي جايه لأن مافيش حاجه أمتع من لقاء أصدقاء الأفكار والكتابه

Diyaa' يقول...

أهم حاجة أنكم اتبسطتم..
وفي لقاء المفروض يتعمل في المعرض
كانت قالتلي عليه صاحبة مدونة أم أحمد وقريبتها دعاء غريب..
ابقوا رتبوها وبلغوني لأن الواحد بقالوا كتير نفسوا يعرف حد بيفهم
سلام عليكم

Ahmad Hegab يقول...

ياااه حاجة جميلة جدا
اقرب اصحاب ليا عرفتهممن النت و منهم الواد مومو و ايرا و ايرك و انتم طبعا و المرة الجايه انا معاكم

حائر في دنيا الله يقول...

جميل جداً أن نتلامس واقعيا كما نتلامش على صفحات خياليا
أراكم قريبا إن شاء الله
إن كان في العمر فرصة

أسوور يقول...

محمد
شخصية متزنة جدا وعاقلة جدا
كان مركز جدا .. ومتحمس جدا
احلى حاجة فيك الحماس
طول عمرى بأحس ان الحماس هو سر كل شىء
وانت كلك حماس
البوست جمب والصور جميلة والقاء كان جميل جدا جدا

Amira يقول...

حاجه جميله جدا

النت بيقرب ناس
و كتابتنا حاجه تدعو للفخر
فعلا

نحن جيل يفكر و يكتب و يعبر عن ذاته
ورغم إختلافتنا نبحث عن نقطة إلتقاء

كويس إنك عرفتني على هؤلاء المدونون
سأقرأ لهم الآن

محمد عبد الغفار يقول...

أحمد شقير
والله انت اللى جميل ، بحماسك وتشجيعك للأخرين ورفضك لفكره الحرس التدوينى القديم والجديد
شكراً لأعجابك بالفكره والمقال وتحفيزك لنا ويارب زيارتك وتعليقك لا ينقطعوا عنا ، وهل ممكن نحلم انك تكون معانا فى مره على الأقل

Fancy
أعتقاداتك واستنتاجاتك كلها صحيحه ، شكراً لأطرائك ومداومتك على الزيارة والتعليق ، اكتر واحده كان نفسى تكون موجوده هى انت بس عارف بقى ظروف الإقامة الجبرية

سمراء النيل
عبقريه منك ده ايه!!!! انت كل اللى عملتيه دوستى على الزرار وبس ، انما العبقريه اللى فى الصور كل الناس عارفه هى بتشع منين
متشكر على إعجابك بالمقال ، وان كان جميلاً فهو نابع من جمال اللقاء والحدث

مجهول الهويه
جميل مشاركتك وتعليقك وتشجيعك ،شرفت المدونة بزيارتك ودائماً

أحمد سلامة
أخجلت تواضعى لدرجه انى مش عارف اقلك ايه ، بجد متشكر على روحك الحلوه وفى انتظار تشريفك فى اللقاء القادم بإذن الله

ضياء
حد بيفهم !!!! ياريس انت مخدوع فينا اوى مش شايف ودانى فى الصوره طول ايه ، ربنا يسترك بلاش فضايح
متشكر لك اوى وربنا يخليك

أحمد
متشكر على زيارتك وحرصك على ترك تعليق فى اى موضوع حتى لو قديم ، وفى انتظارك المره القادمة وهنعتبر ده وعد

حائر فى دنيا الله
ربنا يطول فى عمرك ونشوفك يا حائر

ومصادفه ظريفه ان الأثنين اللى انسرقوا (أحمد وحائر) معلقين عندى ورا بعض

ياسمين
اه المديح ده كله ، انا عجزت عن الرد

فاريدا
والله كنت مستنى تعليقك ، متشكر اوى على الأهتمام ومدوامة المتابعة ، اهم شئ فى اللى بنعمله ان كل واحد بيحاول يعبر عن نفسه وفكره على قد مبيقدر ، وهقلك نفس اللى قلته لأحمد شقير هل ممكن حلم بوجودك

الزعيـمة يقول...

حاجة جميلة بجد
نحاول مرة من المرات نكون معاكم

لكم اروع تحيه

أميرة يقول...

اكيد كان لقاء رائع كان نفسى اشوفك ياسمراء بس مادام عاملة حساب المعجبين يبقى خلاص هسامحك

اجمل حاجة انك تتعامل مع ناس باحساسك وتحس بيهم وتحبهم رغم اختلافهم
معاك والاروع انك تقابلهم

تحياتى للجميع

محمد عبد الغفار يقول...

الزعيمة
شكراً لزيارة المدونة وفى انتظار مزيد من الزيارات، وياريت تبقى معانا المره القادمه بإذن الله الجمعه 2 فبراير

اللسدى ديانا
ياريت نقابلك المره القادمه ويكون هذا هو الأروع
متشكر على مجاملتك الرقيقة وياريت زيارة تتكرر

MAKSOFA يقول...

بالفعل رائع هذا التواصل الأنساني وأجمل مافيه أني شفت صورة سمراء النيل
وبالفعل أقتربت أكثر من قلبي
وكذلك أعرفك من صورتك

أما الباقون فلم أستطع التخمين