الاثنين، 4 يونيو 2007

قول على قول

فى الموضوع الأخير لأبن عبد العزيز روى حادثه تحرش شاهدها فى وضح النهار بعينى رأسه منذ ايام قلائل وفى الموضوع قضيتان من وجه نظرى

لا ينبغى ان نلوم ذباباً تكالب على طعام مكشوف
ولا ينبغى ان نتوقف عن مكافحه الذباب لحظة
.

هناك 49 تعليقًا:

مـحـمـد مـفـيـد يقول...

ماذا اقول بعد السطرين الذي بمثابه مجلدات
ممتاز يا محمد

كراكيب عادل يقول...

معبرين جدااااا الجملتين دول

ونفسي اعرف فلسفة الطعام المكشوف لية

ونفسي اعرف الذباب برضو بقي كتير لية

ibn_abdel_aziz يقول...

اسمحلي يا محمد اتناقش معاك في الجملتين

بص يا سيدي
انا شخصيا كنت من دعاة الحجاب بطبيعة وجودي في جماعة الاخوان لاكثر من 17 سنة

ولا زلت أؤمن بفرضيته ووجوبه علي المرأة المسلمة

وجوبه من الله
علي المرأة

مش من حد تاني علي المرأة
زي الصلاة كدة
فرض عليك وعلي
بس من غير ما حد يجبرنا احنا اللي اتنين نصلي


العبارة الاولي
لا ينبغى ان نلوم ذباباً تكالب على طعام مكشوف

المشكلة ان الطعام غير مكشوف اصلا يا محمد

انا حبقي احط صور ثانية كثيرة ان شاء الله عشان اثبت اللي بقوله

انا لسة شايف منظر النهاردة وانا ف طريقي للشغل
مصدقتهوش
بنت بخمار
بتتعاكس
وقالت للواد يمشي وهو غلس وحيوان
وانا كنت ماشي ناحيته
وف عيني نظرات غضب
فمشي
وهي اتكسفت ومشيت

اولا
البنت قد تخطأ
فتتمايل
او تسير وينكشف منها ما يجب ستره
لكن
اللي بيحصل الان اصبح متعديا لكل الحدود

مجرد قولك انه لا ينبغي الا نلوم الذباب
فانت بالفعل تقول مثلما يقول عشرات الالاف من الرجال
والرجال يستسهلون
ويبررون
حتي وانت تكمل العبارة بالنصف الاخر الذي يضفي علي العبارة الكلية نوعا من الاتزان
بقولك
"
ولا ينبغى ان نتوقف عن مكافحه الذباب لحظة"

الخطاب الديني ركز علي المرأة عقود
انها فتنة
وانها يجب ان تتغظي
وانها عورة
وانها يجب ان تشارك في حماية الشباب من السقوط في الفتنة بستر محاسنها
تحجبت اكثر نساء مصر

ولم يقل احد للرجل
غض بصرك
وكن شهما
واحفظ فرجك

وكان ان تحول اللوم كله علي النساء
واصبحت هي اللي تستاهل
واصبح الضحايا بنات مثل اختي

معلش
انا اري ان الجزء الاول من العبارة يتيح للرجل المزيد من العبث بالاعراض
وبالفعل حملنا اللوم علي النساء بما فيه الكفاية

اما الجزء الثاني
فهي ليست حربا
لا اري ان عبارة كفاح الذباب
عبارة مناسبة
ولكنها وجهة نظرك واحترمها

انا اري ان مواجهة الظاهرة يجب ان يكون بالنظر في كل ما فيها من اسباب

انا ضد العري والتميع بالتأكيد
ولا احب ما اراه علي الفضائيات من اسفاف
لكن نحن في عالم مفتوج
وانتهي الامر
دعنا نركز علي ما نستطيع فعله

حفظ الاعراض فريضة مجتمعية
عندما تسير المرأة في الشارع لا تأمن علي عرضها
فلا خير في هذا المجتمع

وأنا شخصيا لا ارضي ان اضع اللوم علي المرأة
فقد وضعناه بما فيه الكفاية
ولعقود
ولم يتغير عقل الرجل
خاصة الشرقي
المنافق في العادة
الذي ينتهك اعراض نساء غير نساء اهل بيته
ولا يرضاه لنساء اهل بيته

عقل الرجل اولا
ثم عقل الرجل
ثم عقل الرجل

اما النساء
فقد حملناهم بما فيه الكفاية

وهذا رايي والله اعلم
وجزاكم الله خيرا

Amira يقول...

ظريف تشبيهك

بس ساعات اللحم مش بيكون مكشوف
و الذباب بيتجمع برضه
ليه لازم لوم على الست
ليه متقولش ان في اي مكان في العالم صعب تلاقي التحرش اللي موجود في مصر
مره واحده صاحبتي عايشه بره كانت معايا في الشارع و احنا ماشيين محترمين جدا و لبسنا محترم جدا جدا

و اتعاكسنا طبعا
قالت لي
ياااه انا نسيت الحكايه بتاعة المعاكسه دي خالص
بره لو لابسه حمالات
محدش بيبص لك
انتي عارفه احنا مفتقدين ايه في مصر
مفتقدين مكارم الأخلاق

غير معرف يقول...

هو بصراحة انا بتفق معاك يا محمد بس عندي سؤال بسيط جدا عن موضوع مشابه هو لو واحد سرق علشان مش لاقي ياكل يبقا ايه الوضع ..... أعتقد انه يحاسب بقعوبة اخف في الوضع القانوني العادل ويعذر في الشرع ويحاسب عنه الحاكم فما بالكم بشهوة أشد ضراوة علي الرجال والنساء لا يملكون قوت يومهم لكي ينفقوا علي الزواج ما بالكم برجل تطل عليه مناظر الخلاعة في التلفزيون والشارع وكل حته طبيعي ان شهوة تحوله لحيوان قاتل في بعض الاحيان لا اعفيه من العقوبة ولكن لنحاسب انفسنا اولا
تحياتي علي تعبيرك الجميل وبساطة وبرضه ابن عبد العزيز عنده حق في كلامه لان في فعلا مخمرات ومنقابات بيتعرضوا للتحرش بأشكاله والوانه مش بيكون العيب منهم لان الذباب زي ما بيتلم علي الاكل المكشوف بيلف حولين العسل ده الطبيعي في مجتمع ضرب الفساد كل اركانه

Bella يقول...

لن أزيد عما قاله الاخوة والاخوات قبلي

المشكلة بالفعل ان الذباب لم يعد يتجمع حول الطعام المكشوف فقط بل اصبح يتجمع حول الطعام المغلف والمحفوظ

المجتمع يعاني من خلل اخلاقي رهيب وقد انفلت عقال رجاله او ماكن يُسمى برجاله واصبح سرب الذباب اسراباً

فهل نقتل الذباب كله؟؟

أم قل لي كيف نكافحه؟؟

بالفعل المشكلة اصبحت معقدة جدا ولاسبيل لحلها بإلقاء اللوم على الشماعة الجاهزة المرأة ولبس المرأة وكلام المرأة وكل ذلك

الخلل بالفعل في عقول الرجال الذين يربيهم المجتمع على أن كل شيئ مباح والرجل لايعيبه شيئ وكل تجربة جديدة له بمثابة فتح في عالم الرجال يسطر فيه اسمه بحروف من ذهب.

ثقافة المجتمع يجب ان تتغير وتهتم بتربية الولد كما تربي البنت ولن اقول اكثر مما تربي البنت.

الموضوع كبير ويحتاج لكلام كثير

عصفور المدينة يقول...

لي فترة طويلة أفكر في هذا الموضوع وسألت استاذ شريف وهو الراجل حاطط هدف إنه يدرس آليات معالجة الموضوع وإن شاء الله نتعاون معه كلنا

أعتقد فيه نقطة لازم ما نغفلهاش
وهي برضه وجود غير المحجبات حتى لو ماشيين عدل ووجود الفضائيات والفيديو كليب ووجود حالة من السعار لدى الشباب وكبت وتأخر زواج يجعلهم يتحرشون بأي واحدة حتى لو كانت محجبة
فيه نقطة هامة أخرى وهي السياق الموجودة فيه الفتاة سواء المكان وهيئتها العامة

فيه نقاط أيضا قد لا نلاحظها ويعرفها أصحاب الخبرة من المتحرشين هم يميزون جيدا بين البنت الرافضة للتحرش والداعية له وقد لاحظت ذلك عليهم

يا مراكبي يقول...

الموضوع ملفت للنظر فعلا لكن أبعاده كتيرة جدا جدا ولايتسع المقام لحصرها .. فالظروف والأسباب كثيرة ومتعددة

لكن هذا الحادث تحديدا مثير جدا للإشمئزاز

AHMED SAMIR يقول...

ياريت دعاة تحرير المرأة يقروا ويتعلموا

غير معرف يقول...

تشبيه رائع يا محمد
رائع جدا
عندك حق وابن عبد العزيز برضه عنده حق في مجمل كلامه
بس لو افترضت بنتين واحدة محجبة ومحترمه في لبسها ومشيها وواحدة عكس ذلك مين اللي حتتعاكس الاول علي فرض تسلميا ان الاتنين حيتعاكسوا
؟؟؟؟؟
اكيد اللي مش محترمه لبسها ومشيها
احترام الذي اقصده ليس في الملبس فقط بل لابد ان يسبقه احترام في التعامل والطريقة نفسها
.....
معاك برضه انه فيه ذباب كتير اوي موجود مش بيفرق بين الجيد والسيء
بس صدقني مش بنفس النسبه هناك فرق شاسع .ظلم جائر لو عممنا التحرش واعتبرناه سلوك عام
المشكلة ليست واقعه علي الاكل اللي بيلم الذباب بل علي من وجد الذباب اصلا
الشباب ده ولا لاقي شغل ولا لاقي رادع يردعه معظمهم مدمنين عاطلين انصاف متعلمين
.....
لو جيت نتكلم عن موضوع التحرش حندخل في حكايات طويله ومتشعبة لازم تنحل
خطاب ديني
وهنا لابد ان اسجل اعتراضي علي ابن عبد العزيز
يا استاذ
اللي بيعاكس مش في دماغه اصلا ان المرأة فتنه ولا سهم من اسهم الشيطان
ليه حندخل الدين في سلوك من لا يتبعون مكارم اخلاق الاسلام اساسا
؟؟؟
الناس دي ولا اتأثروا بخطاب ديني ولا بيرجعوله حتي
اقول حاجة بس متضحكش
ياريتهم يتبعوا الفكر الجائر ده اللي بيهين المرأة يا سيدي اهو يبقوا برضه اصحاب فكر
هههههههههههههههه
شفت بقا ان الناس دي يا محمد ولا ليها فحاجة
........
احنا مش لازم نقتلهم ولا نكافحهم ليه مانحتويهم
دينيا وخلقيا
والناحية التانيه
نصلح برضه الأكل المكشوف ونغطية
مش قصدي نغطيه بحجاب ولا نقاب
نغطيه بإحترام وأدب وحياء
.....
انا مش ضد وجهة نظر ابن عبد العزيز وبحترمه جدا جدا بس لازم الشغل يبقا علي ناحيتين
ومقتنع ان المحترمات برضه بيتعرضوا للمواقف دي وعندي برضه حكاوي كتير وغيرها علي المواقف دي
بس برضه مصر انه بنسبه مش بنسبه الغير محترمات في اللبس والتعامل
.........
ارجو الا اكون اطلت عليك
وانا قريت علي فكرة تعليقك علي السعدني وكتابه عند كوكو الكميل
ياريت توضح شويه يا محمد الرأي ده افادك الله ومتخافش ياعم مش حتتحاكم
هههههههههههههههه
تحياتي يا استاذ محمد
ولابن عبد العزيز وللجميع
علي ارائهم القيمه
البوست اللي فات عجبني جدا وحاليا احاول كتابة موضوع كنوع من المراجعة والتصفية والاستنتاجات لما فكرنا فيه



.....
mn-majhool

Bella يقول...

تعليق احببت ان اضيفه بمناسبة كلام الاخ سمير عن دعاة تحرير المرأة

هناك خلط كبير في هذا الامر

وعندما يحدث اي مضايقة أو انتقاص لحق من حقوق المرأة يتحدث الجميع عن دعاة تحرير المرأة أو تحررها وماإلي ذلك

الحقيقة ان من نادى بتعليم المرأة لم يطلب منها ان تخلع ملابسها وتمشي عارية في الشارع حتى تتجاذبها الايدي الجائعة

كل مافي الأمر انها طلب ان تتعلم لتعرف ماعليها ولها.

كون البعض استغل الامر وانتزع مساحة أكبر وتحلل من إلتزاماته التي حددها له الدين فهذا لايعني ان طلب المرأة لحقها اصبح ممنوعا وعليها الا تطالب به بعد الآن.

كما أن الحديث في النهاية يأخذ منحى آخر عندما يتم الحديث عن أن الإسلام كفل للمرأة حريتها وباقي الكلام الذي نعرفه جميعا.

الإسلام بالفعل كفل للمرأة حريتها وكم غير عادي من الحقوق التي لاتتمتع به النساء الأخريات في المجتمعا الأخرى.

ولكن المجتمعات الشرقية انتقصت من حقوق المرأة وقمعتها وقهرتها بكمية غير عادية من الافكار والوساوس والهواجس التي ماأنزل لها بها من سلطان.

فكلما شكت المرأة يشهر في وجهها سلاح دعاة التحرر والتحلل وغيرهم من الدعاة ولايتذكر المجتمع الدين الا ليمارس مزيداً من القهر والقمع على المرأة عندما تطالب بتطبيق هذه الحقوق الواردة في الدين الذي تذكره المجتمع منذ لحظات ونفس المجتمع ينسى ذلك الدين طوال الوقت في تعامله مع المرأة وفي إستلابه لحقوقها التي كفلها لها الإسلام

نقطة أخرى أود قولها وهي أن المتحررة والمتحللة من التقاليد والعادات ليست بحاجة لدعاة تحرر او حرية لتمشي خلفهم فهي تقوم مباشرة بممارسة تحللها وحريتها ودون انتظار إذن من المجتمع اصلا.

المشكلة في باقي المجتمع الذي لم يتحلل ولم ينحل ومع ذلك يمارس المجتمع ضده عقاب جماعي بجريرة البعض منه

ربنا يهدي الجميع

ومعذرة للإطالة

رفقة عمر يقول...

دائما كلامك ماقل ودل
كلمتك لا تحتاج لشرح بس ياريت المقصودين بكلمتك هذه يفهموا معنى هذه الكلمه

كلام لوجيك يقول...

السلام عليكم
موضوعك من الموضوعات الهامة جدا والتى لن نجد لها حلا بسهولة
يجب ان تتضافر جميع الجهود معا من اجل محاولة وضع حدا لهذه المسألة الأخلاقية التى تمسنا جميعا
ان اهم ما يريد المواطن ان يشعر به هو الامن والامان
واذا انعدم الامن والامن فبالتالى انعدم الاستقرار فى المجتمع وقد يؤدي هذا الى عواقب وخيمة للغاية

وطبعا ان متفق جدا جدا جدا مع كلام الأخ ابن عبدالعزيز
يجب ان نرفع الظلم عن بناتنا وان نكف عن تحميلهم جميع أخطاء المجتمع

دمتم جميعا بخير

تليفزيون ملون يقول...

معبرين جدا ... :)

اعجبتني الكلمات ..

تحياتي

عمرو غريب يقول...

لا والله كلام قليل بس معانية كثيرة

هيما يقول...

ليس هناك تعليق غير هاتين السطرين
بجد تشبيه رائع وربنا يستر

Rania Lelah يقول...

معتقدش ان فى دلوقت طعام مكشوف
اعتقد ان الموضوع بقى فراغة عين و بس
الذباب كتر قوى و محتاجين فليت ضرورى
بدل ما الموضوع يستفحل و يكتروا و يدخلوا على بيوتنا بعد كدة
تحياتى

اسلام رفاعى يقول...

على فكرة انا سعيد جدا بزيارة مدونة سيادتك وعلى فكرة الكلام معبر جدا

دينا فهمي يقول...

أنا غيرت لينك مدونتي

Unknown يقول...

والله عندك حق ياحمد

Xee يقول...

البلد فعلا محتاجه ناموسيه

:)
==========================
شفتني و انا بعلق زيك بما قل و دل، بس انا تعليقي مدلش تقريبا

:)

تحياتي

Xee يقول...

عشان تبقو تصدقوني لما أقول إن البلد دي محتاجه ناموسيه بجد

تحياتي يا محمد باشا

Xee يقول...

بعتذر إني أعدت التعليق على البوست، إفتكرت إن تعليقي الأول موصلش

ماأخدتش بالي إن تعليقي الأول اتبعت

برجاء تقبل أسفي

تحياتي

yasmina يقول...

هذه المرة اختلف معك
فمن يريد ان يتحرش يبحث عن اي انثى ولا ينتظر ان تكون مكشوفة او لا

ثم ان التشبيه فيه الكثير من التقليل بقيمة المراة كمراة
ان اللباس المحترم لا يعني بالضرورة الحجاب لذلك فالاخلاق اولا وللاسف انعدمت الاخلاق واصبح الشباب فاسدا فوصلنا الى مرحلة من الالا وعي والى نتيجة انه مسموح لنا كل شيء اذا ما راينا منظر مغري او يجذب

غير معرف يقول...

لسه مايعرفوش الحجاب .. من غير ما نبرأ الشباب المسعور.

فيه بنات كتير فاكره انها محجبة .. و تفاجأ بأنها مخالفة للحجاب !!

** تصدق . كنت فاكر انهم لغوا تعليقك فيي موضوع جيفارا عشان قلت حاجه غلط . مع اننا مش متعودين منك على حاجه زي كده . بارك الله فيك. :) .. حصل خير.

** انتا مش قلت هاتشيل مزيكه حسب الله اللي مع المدونة دي .. عايزين نقرا مدونتك و نفهم يا أخييييي .

سلام عليك أخي الحبيب

منة الله يقول...

استاذ محمد

ادعوك للمشاركة في استفتاء اكثر 10 مدونات تاثيرا في قرائها

عل مدونتك تكون واحدة منهم

اليك الرابط

http://www.6ef.blogspot.com/

عدى النهار يقول...

عفواً يا محمد أختلف معك فى القضية الأولى.

فأنا لا أعتقد أن الأمور وصلت بمجتمعنا للدرجة التى تجعلنا نصف سلوكيات بعض النساء بالحم المكشوف. أنا أرى أنه يجب أن نلوم ونعاقب المتحرش حتى لو كانت من تحرش بها غير محتشمة. القضية هنا قضية جرأة شخص على شىء ليس له حق فيه وعدم وجود رادع خُلُقى أو عقابى. وفى رأي أن كل المشاكل الموجودة بالمجتمع ويرى البعض فيها سبب أو دافع لتحرش البعض بالنساء ، يجب أن تكون سبب أو دافع لدعوة أكبر وتركيز أشد على غض البصر لأنه من المنطقى أن المتحرش مارس عدم غض البصر وإعتاد عليه قبل أن يمارس التحرش

ALiaa يقول...

أحسنت فولا علي قول
:)

غير معرف يقول...

احنا مش هنخش الفيلم بقي والا ايه؟ :( يا منفضليييييي

Ma 3lina يقول...

الجملتين لخصوا كل حاجة

دنـيـا محيراني(ايناس لطفي يقول...

والله يا محمد انت عندك حق بس انا من راي ان الكل مشارك في الخطأء من البنت والولد واهلهم هما الاثنين للمدرسه و الجامعه و الاعلام يعني المجتمع كله مشارك في خطوره الموضوع ده مش طرف واحد بس الاي ملاحظ جدا ان ظواهرالتحرش ده ظهرت بكثافه خلال السنين الحاليه بس يعني والدتي كانت بتحكلي ان ايام الستنيات و السبعينات كانوا الستات بيخرجوا بالقصير و العاري و لم يكونوا يتعرضوا لاي من الظواهر ده مش معني كلامي ان موافقه علي الاي كان بيحصل طبعا غلط انا اقصد ان الافكار و العقول اتغيروا و المشاكل كتيرت و ازمات الزواج انتشرت الموضوع ككل عايز دراسه و حل و قبل كل شيء وجود الدين عند كل انسان ولد او بنت هو الحل لكل الازمات ربنا يثبت دينه في قلوبنا و يقوينا ضد شر انفسنا

غير معرف يقول...

الأخ الفاضل:محمد عبد الغفار
السلام عليكم ورحمة الله وبركاته
أشكرلك طرحك لهذا الموضوع الهام

أخى : من المفترض أن مثل هذه الأمور لاتحدث فى مجتمع إسلامى

ولكن المشكلة أننا أصبحنا مجتمعاً فاقداً للهوية

إلا من رحم ربى

وكما قال بعض الأخوة هناك أبعاد كثيرة لهذه المشكلة ولكن أهم الأبعاد هو تأثير الإعلام على الشباب والذى جعلهم يعيشون فى محيط كله إغراء وشهوات مشتعلة
ومما ساعد أكثر هو حال الكثيرات من الفتيات هداهن الله إلى طريق الهداية والصواب

بارك الله فيك أخى الكريم
أخوك
محمد

كلبوزة لكن سمباتيك يقول...

عجبني كومنت ابن عبد العزيز
و رايي ان الموضوع مشترك بين الرجل و المراة
عليها ان تتحشم في حجابها و عليه ان يغض بصره
و على المجتمع ان يامر بالمعروف و ينهي عن المنكر
باختصار
الحل هو العودة للدين

تحياتي

Esmeralda يقول...

ده الذباب
اما فى حاله التحرش صدقنى مفيش فرق بين مكشوف او متغطى و مكسوف

حتى لو واحده منقبه لذيذ ليهم ان يتحرق دمها بكلمه و خلاص

MAKSOFA يقول...

شوف بقي أنت جبت الخلاصه هذا يحدث في مصر دائما ولمتراه في أمريكا ولا أي مكان أخر في الدنيا سواء سارت المرأه محجبه أو عاريه المشكله فينا أحنا

بيتنا القديم يقول...

عبدو
....
من يخشي الذباب فلا يدعوه الي طعامه

ومن اكل مما حط عليه الذباب

فليتبؤا مكانه في الكنيف

تحياتي

ويجعلوعاااااااااااااااااامر

غير معرف يقول...

لا ينبغى ان نلوم ذباباً تكالب على طعام مكشوف
ولا ينبغى ان نتوقف عن مكافحه الذباب لحظة
.
جملتين جابوا المفيد
بس اكتر حاجه عجبتنى التشبيه بالذبابه لانها اغتت حشره وارخم حشره على الاطلاق تقريبا
بس اللى عايزه اقوله ان الذباب مجرد انه بيعرف ان هنا يوجد طعام سواء مكشوف او لا بتتكالب وبتهوهو عليه
والدليل ان فى ناس مش ذباب ولا حاجه وفى طعام مكشوف ياااااامه ومع ذلك بيعرفوا يغضوا بصرهم كويس جدا
شكرا
ياسمين

daktara يقول...

شكرا علي اثارتك للموضع
وكعادتك تقف مع الحق دائما
انا عاجبني جدا جدا جدا رأي
ibn abdel azez
ومتفق معه للغاية
تحياتي
د . خالد عزب

zordeak يقول...

يا ريت حد يفهم

الموضوع بقى خطير فعلا

Monzer يقول...

آسف على التحليق خارج السرب
ولكن إيماننا بدفاعكم عن مبدا الحرية
ندعوكم للتضامن مع المدون عمر الشرقاوى المعتقل فى قسم طلخا

إثر قيامه بتغطية انتخابات مجلس الشورى
والله من وراء القصد
وجزكم الله خيرا

أحمد الشمسي يقول...

شكرا على ترشيحك لمدونتي...
على فكرة السطرين اللي انت قلتهم من جوامع الكلم!
بس احنا ممكن نحط بعدهم "لاكنات" كتيرة!
هرجع

ياسر سليم يقول...

دى أول مرة اتشرف بزيارة مدونتك ..

وانا قريت الموضوع كله ..

والجملتين دول جابوا من الاخر ..

انا شفت بعينى تحرش بعدد مهول من الشباب .. كان يوم رأس السنة .. وكأن الشباب عايز يفرح .. وباين الموضوع مش بس راس سنة وغير راس سنة ..

لكن احنا لو رجعنا لأصل الموضوع هنلاقى الرك مش على البنت بس .. ولا على الشباب بس ..
لاء ده فى حجات كتيره فى المجتمع
من اولها الإعلام الهابط
بعد كدة البطالة ..
ودول يتولدوا شباب هايف
بعد كده تربية الأسرة .. انا لا أظن واحد متربى فى اسرة كويسة يعمل حاجة زى كده ..
وقبل الكلام ده كله الحكومة .. ايوه الحكومة أس كل فساد .. اللى بتشجع اى انحراف وانحلال وفالحة تقبض على الملتزمين ..

فزى ما بيقولوا هنلاقيها منين ولا منين ..
يا حسرة عليكى يا مصر

أميرة البلطجية يقول...

واقع مؤسف صراحة والواحد مش عارف يقول ايه غير انه قرفان

malak يقول...

بجد احييك على الرغم من قصر عدد الكلمات الا انها تحمل معانى كثيرة بداخلها

صاحب البوابــة يقول...

السلام عليكم

اشكر كل من تساءل عن غيابي

ووقف بجانبي في محنتي

تحياتي لكل شريف حر

.:.-=- ELGaZaLy-=-.:. يقول...

السلام عليكم

ازيك يا محمد بجد


عجينى جداا الكلميتن دول

لا ينبغى ان نلوم ذباباً تكالب على طعام مكشوف
ولا ينبغى ان نتوقف عن مكافحه الذباب لحظة
كلمتين بالف كلمة

FATMA يقول...

فكرة الطعام المكشوف و الذباب تعطي انطباع ان المتحرش هو الضحية...

يجب ان نكافح الذباب و كفى

ثم ان المرأه ليست طعام لنكشفه او نغطيه

وجهة نظر شخصية بحتة
وسلامي لك

ألِف يقول...

تقصد يعني أن الستات زي الأكل للاستهلاك؟
و ما هماش شقائق الرجال؟ و للاتقصد أن أكل لحوم البشر مقبول؟

و تقصد أن الرجال عقولهم زي الذباب؟

[بيدعوا] أن الرجل المفروض أنه يعرف يتحكم في نفسه. هو الكلام دا غلط؟ ضحكوا عليّ يعني؟

لما أضربك و أسرق السندوتش ال في إيدك لأني مش متربي و كمان أقوى منك؛ يبقى الغلط موزع علينا بالتساوي و احنا الاثنين ملومين؟

أرجوك جاوبني، ما تسيبنيش حيران، منظومتي الأخلاقية في خطر.

:)

Unknown يقول...

معلش انا لى رأى غير كده

اولاً الانسان مش ذباب ولازم نلومه و كمان يللوم نفسه حتى لو نظر الى فتاه عاريه بالمره

فعرى الفتاه ليس مبرر على النظر لها
لانه يجب ان يكون الانسان على ثبات من امره و لا يتأثر بالجو المحيط


اعلم انا هذا من الصعب جداً و لكنه هو المفترض ان يحدث


تحياتى يا صديقى العزيز