السبت، 16 ديسمبر 2006

دمع الأسى المكتوم



اليأس من كتر يأسى يا ناس يئس خلاص منى
العيلة انهدت من زمان ومين حواليا يهدينى او يطمنى
وحبيبى جفانى كتير وصار غيته يسمع الأه ويأسى ويظلمنى
والصاحب غلبته همومه ومين بعده يقدر فى ديقى يفهمنى
كنت بعلم الناس الحكمة ومين دلوقتى قادر يعلمنى
والصبر كان صديقى وحيلتى دلوقتى جرى وهرب منى
ليه كده يا صبرى انا مش عارف ايه اللى حصل منى
لو كنت اذيتك سامحنى حقك عليا بس تعالى قريب منى
جربت بعدك الأغانى ومقدرتش أبداً تنسينى ولا تلهمنى
وبأيه يفيد الغنى بدام الصبر غضبان وقاعد بعيد بعيد عنى

أنا دلقوتى ببكى والكل قاعد يسقف للى فاكرينه بيغنى
د ه مش غنى والله دى نوح وبكى على كتر مشاكلى وهمى
فاكرينى ايه ؟!! دنا بردو بنى أدم وليا مشاعر بتألمنى
هو عشان مبقلش الأه يبقى كده فكركم عنى
هى الدموع عندكم لازم تكون ميه تجرى من عينى على خدى
لا معلش مهما تقولوا الدموع ديه عمرها ماهتكون عندى
أنا دمعتى جواى ومش ممكن هتظهر أبداَ غصب عنى
دمعتى انا ألم مكتوم فى قلبى خنجر يشقه يقطعه ويألمنى

لو حد حس بيا وعرف حسى يمكن ده يهنينى
أو لقيت حبيب فاهمنى مش غاوى يعذبنى أو يورينى
أنا الحب مالى جواى بس المشكلة يمكن سوء فى تعبيرى
أنى صريح وعملى مش غلطتى ليه عليهم يا دنيا بتحاسبينى
ده ميزه زماننا انك تلاقى حد فى عقله زى تفكيرى
أنا هو كده ومظنش حد يقدر أبداً على تغييرى
ويغيرونى ليه وهما شايفين ان ده صح ومنطقى وتحليلى
تغيرونى يعنى انا خلاص مت ولازم دفنى بعد تكفينى
.

هناك 9 تعليقات:

غير معرف يقول...

Hello Mohamed. I am from Turkey. I wish i know Arabian but i don't :( Nice blog! Good bye!

محمد عبد الغفار يقول...

nice to see u in my blog, but in case u don't read arabic how did u like it
any way u r wellcome any time and u can visit my blog for pics it's easy to understand
http://inside-view-pics.blogspot.com/

غير معرف يقول...

حرام عليك يا محمد هى الدنيا ناقصة نكد فكها شوية خلى ربنا يفكها علينا

أسوور يقول...

كلام معبر قريته بكل إحساس .. ايه الحلاوة دى .. بجد اكثر من رائع .. أنا تخيلت انى هلاقى فى النهاية اسم واحد من المشاهير .. صلاح جاهين مثلا أو البنودى .. بجد برافو
احساس عالى قوى .. حسيت كل كلمة وكل حرف
"كنت بعلم الناس الحكمة ومين دلوقتى قادر يعلمنى"
عبارة لن أنساها

محمد عبد الغفار يقول...

مجهول الهوية
وعد هديها العنب العنب العنب عشان الناس تظقطط

ياسمين
الصارحه اول اما لقيتك بتقولى الأبنودى وصلاح جاهين ، افتكرتك بتسخرى منى واما كملت التعليق فهمت انك بتتكلمى جد
متشكر اوى اوى اوى على تشجيعك ، انا مستحقش التقدير ده كله ، انا عارف كويس ان فيها ركاكه فى بعض الأجزاء ان مكنش كلها مقدرتش اتغلب عليه عشان مبحبش الغى واعدل فى شئ كتبته بحطه كده بعبله ليكون اكثر صدقاً
بس الحمد لله انها عجبت واحده عندها مدونه زى مدونتك ومتشكر على زيارتك مدونتى العبيطه وفى انتظار نقدك قبل تشجيعك

غير معرف يقول...

دمع الاسى المكتوم

تحمل الكثير من مشاعر الحزن و الشجن و

و الروح العامة لها بها اكتئاب واضح

لأن حالة الاكتئاب فقط هى اللى تجعل الانسان يشعر بأنة وحيد والا يوجد حولة صديق او اى انسان يشعر به

و اعتقد ان مهما تكالبت علينا الهموم يعطينا الله اى بصيص امل

الجملة التى شعرتها جدا
هى الدموع عندكم لازم تكون ميه تجرى
من عينى على خدى

لان اصعب دموع هى الدموع المكتومة بداخلنا و التى يزرفها القلب اولا و لا تخرج من العين

أسوور يقول...

محمد .. هو كدة دايما العظماء عندهم تواضع

غير معرف يقول...

كلامك معبر قوى وجميل قوى بس فيه حزن شديد قوى وياس على الرغم من انك دايما بتعطى الامل - يا ترى دى لحظة ضعف ولا لحظة تفريغ لشحنة عندك

محمد عبد الغفار يقول...

نانسى
الأمل موجود ما دامت الحياه ، ضياع الأمل يعنى الموت
شكراً على مشاركتك اللطيفه

ياسمين
بجد يا فندم اخجلتم تواضعنا

Star
واضح ان قوه الأجزاء الأولى طغت على النهايه التى فيما يبدو كانت ضعيفة ، صحيح البدايه منقوع اكتئاب ويأس بس النهايه وبالأخص اخر 3 أبيات ( والله مكسوف وانا بقول ابيات عشان ما كتبته لا يرقى ان يطلق عيه ابيات)كلها قوه وأصرار وانتفاضه وتحدى وثوره على الأوضاع الراهنه كلها
ومتشكر اوى على تعليقك واهتمامك ومجاملتك الرقيقة